CINXE.COM
2019ꈎꍏꑷꌋꆀꃅꄷꄐꌗꃄꌬꐛꐨꌋꆀ
2020ꈎꍏꑷꌋꆀꃅꄷꄐꌗꄐꄉꌠꅇꄜ--ꏓꂱꈄꏍꆈꌠꁱꂷꃅꄉꌠ--人民网
<!DOCTYPE html PUBLIC "-//W3C//DTD XHTML 1.0 Transitional//EN" "http://www.w3.org/TR/xhtml1/DTD/xhtml1-transitional.dtd"> <html xmlns="http://www.w3.org/1999/xhtml" lang="utf-8"> <head> <meta http-equiv="Content-Type" content="text/html; charset=UTF-8" /> <meta http-equiv="content-language" content="utf-8" /> <meta name="robots" content="all" /> <meta name="copyright" content="人民网版权所有" /> <meta name="description" content="ꁧꎁꊈ：ꇩꃷꑼꁠꄀꄉ，ꀋꃋꆏ2019ꈎꍏꑷꌋꆀꃅꄷꄐꌗꃄꌬꐛꐨꌋꆀ2020ꈎꍏꑷꌋꆀꃅꄷꄐꌗꄐꄉꌠꄜꌊꊯꌕꈭꇩꏤꑭꊂꏓꄊꃀꌕꃢꌠꈿꅉꁳꍤꇖꎻ，ꄷꀋꁧꇩꏤꑭꊂꍔꑠꊈꑼꊈꑌꉜꐨꄜꎼꇁꅊꇈ。ꋍ、2019ꈎꍏ" /> <meta name="keywords" content="" /> <meta name="filetype" content="0"> <meta name="publishedtype" content="1"> <meta name="pagetype" content="1"> <meta name="catalogs" content="M_157842"> <meta name="contentid" content="M_15813777"> <meta name="publishdate" content="2020-06-15"> <meta name="author" content="M_1010"> <meta name="editor" content="M_1010"> <meta name="sourcetype" content=""> <meta name="source" content=""> <meta http-equiv="X-UA-Compatible" content="IE=EmulateIE7" /> <title>2019ꈎꍏꑷꌋꆀꃅꄷꄐꌗꃄꌬꐛꐨꌋꆀ<br>2020ꈎꍏꑷꌋꆀꃅꄷꄐꌗꄐꄉꌠꅇꄜ--ꏓꂱꈄꏍꆈꌠꁱꂷꃅꄉꌠ--人民网 </title> <link href="/img/2009yiyu/yiwen090605.css" type="text/css" rel="stylesheet" rev="stylesheet" media="all" /> <script src="/css/searchforeign.js"></script> <script language="javascript" src="/img/2009yiyu/content.js" charset="gb2312"></script> <!--[if IE 6]> <style type="text/css"> .one_2 ul li{padding-bottom:8px;} .wb_5{word-spacing:0px;letter-spacing:0px;} .wb_2 h3{word-spacing:0px;} .wb_3{word-spacing:-4px;} </style> <![endif]--> <STYLE TYPE="text/css"> <!-- /* $WEFT -- Created by: people () on 2009-6-5 -- */ @font-face { font-family: "宋体-18030"; font-style: normal; font-weight: normal; src: url(/img/cpc_yiwen/YI0.eot); } --> </STYLE> </head> <body style="font-family:宋体-18030;"> <!--title--> <div class="title"><form action="http://search.people.com.cn/rmw/GB/arabicsearch/languagesearch.jsp" name="MLSearch" method="post" onSubmit="if(getParameter_DJ(document.MLSearch)==false) return false;"><span> <input type="hidden" name="language" value="7"/> <input type="hidden" name="sitename" value="arabic"/> <input type="hidden" name="XMLLIST"> <label> <input name="names" Id="names" type="text" style="width:117px;"/> </label> <input type="image" name="button" id="button" value="检索" src="/img/2009yiyu/images/serch.gif" align="absmiddle" /> </span></form><em><a style="CURSOR:hand" onclick="var strHref=window.location.href;this.style.behavior='url(#default#homepage)';this.setHomePage('http://yi.people.com.cn');" href="#">ꌌꀨꏾꃅꄉ</a><a href="Javascript:window.external.addFavorite('http://www.people.com.cn','人民网彝文版')">ꎴꇱ</a><a href="mailto:yi@peopledaily.com.cn">ꏓꄻꅇꈄ</a><script language="javascript"> //time var day=""; var month=""; var ampm=""; var ampmhour=""; var myweekday=""; var year=""; mydate=new Date(); myweekday=mydate.getDay(); mymonth=mydate.getMonth()+1; myday= mydate.getDate(); myyear= mydate.getYear(); year=(myyear > 200) ? myyear : 1900 + myyear; if(mymonth == 1) mouthw=" 1 "; else if(mymonth == 2) mouthw=" 2 "; else if(mymonth == 3) mouthw=" 3 "; else if(mymonth == 4) mouthw=" 4 "; else if(mymonth == 5) mouthw=" 5 "; else if(mymonth == 6) mouthw=" 6 "; else if(mymonth == 7) mouthw=" 7 "; else if(mymonth == 8) mouthw=" 8 "; else if(mymonth == 9) mouthw=" 9 "; else if(mymonth == 10) mouthw=" 10 "; else if(mymonth == 11) mouthw=" 11 "; else if(mymonth == 12) mouthw=" 12 "; if(myweekday == 0) weekday=" ꆏꑍ "; else if(myweekday == 1) weekday=" ꆏꊂꋍꑍ "; else if(myweekday == 2) weekday=" ꆏꊂꑍꑍ "; else if(myweekday == 3) weekday=" ꆏꊂꌕꑍ "; else if(myweekday == 4) weekday=" ꆏꊂꇖꑍ "; else if(myweekday == 5) weekday=" ꆏꊂꉬꑍ "; else if(myweekday == 6) weekday=" ꆏꊂꃘꑍ "; </script> <script language="JavaScript" type="text/JavaScript">document.write(year+"ꈎ"+mouthw+"ꆪ"+myday+"ꑍ"+weekday); </script></em></div> <div class="title_b"><img src="/img/2014peoplelogo/rmw_logo_yi.jpg" width="980" height="130" border="0" usemap="#Map" /> <map name="Map" id="Map"> <area shape="rect" coords="767,36,888,97" href="http://www.people.com.cn" target="_blank" /> <area shape="rect" coords="889,36,957,95" href="http://yi.people.com.cn/" target="_blank" /> </map></div> <div class="topnav"><a href='http://yi.people.com.cn/' target='_blank'>ꀨꏾꌠ</a><a href='http://www.people.com.cn/' target='_blank'>ꏓꂱꈄꏍ</a><a href='http://cpc.people.com.cn/' target='_blank'>ꍏꇩꇭꍣꄈꈨꏀꈄꏍ</a><a href='http://mongol.people.com.cn/' target='_blank'>ꎭꆹꁱꂷ</a><a href='http://tibet.people.com.cn/' target='_blank'>ꀒꋤꁱꂷ</a><a href='http://uyghur.people.com.cn/' target='_blank'>ꊉꃶꇓꁱꂷ</a><a href='http://kazakh.people.com.cn/' target='_blank'>ꉳꌒꇻꁱꂷ</a><a href='http://korean.people.com.cn/' target='_blank'>ꍨꑣꁱꂷ</a><a href='http://sawcuengh.people.com.cn/' target='_blank'>ꍌꋇꁱꂷ</a></div> <!--one--> <div class="line line2"><img src="/img/2009yiyu/images/line1.gif" alt="" /></div> <div class="one"> <div class="one_left"> <div class="wb_1" id="p_navigator"><a href="/index.html" class="clink">ꏓꂱꈄꏍꆈꌠꁱꂷꃅꄉꌠ</a></div> <div class="wb_2"> <p></p> <h3 id="p_title">2019ꈎꍏꑷꌋꆀꃅꄷꄐꌗꃄꌬꐛꐨꌋꆀ<br>2020ꈎꍏꑷꌋꆀꃅꄷꄐꌗꄐꄉꌠꅇꄜ</h3> <p>——2020ꈎ5ꆪ22ꑍꊯꌕꈭꌠꇩꏤꑭꊂꏓꂱꁧꎁ꒜ꀉꒉꌕꃢꌠꈿꅉꇬ</p> <p class="red">ꎆꏲꀯ</p> <p><span id="p_publishtime"></span> <span id="p_origin"></span></p> </div> <span id="p_editor"></span> <div class="wb_3"><span>【ꁱꂷꀉꒉꀄꊭꐨ <a target="_blank" href="#" onclick="return doZoom(22)">ꀉꒉ</a> <a target="_blank" href="#" onclick="return doZoom(20)">ꐧꀠ</a> <a target="_blank" href="#" onclick="return doZoom(18)">ꀄꊭ</a>】 <a href="#" onclick="doPrint()">ꍑꄻ</a></span><em> <form action="" method=post name="to_friend" onSubmit='document.to_friend.action="mailto:" + document.to_friend.UserName22.value + "?subject=推荐新闻：" + document.to_friend.newstit.value + "&body=" + document.to_friend.newsid.value'> <input type=hidden name=newsid value="http://yi.people.com.cn/GB/157842/15813777.html" /> <input type=hidden name=newstit value="2019ꈎꍏꑷꌋꆀꃅꄷꄐꌗꃄꌬꐛꐨꌋꆀ<br>2020ꈎꍏꑷꌋꆀꃅꄷꄐꌗꄐꄉꌠꅇꄜ" /> <input type="text" name="UserName22" style="height:16px;vertical-align:middle;border:1px solid #ffffff;" /> <input type="image" name="Submit4" src="/img/2009yiyu/images/serch1.gif" style="vertical-align:middle;"/></form> </em></div> <div class="wb_4"></div> <div class="wb_5" id="p_content"><span id="zoom">ꁧꎁꊈ：<br><br> ꇩꃷꑼꁠꄀꄉ，ꀋꃋꆏ2019ꈎꍏꑷꌋꆀꃅꄷꄐꌗꃄꌬꐛꐨꌋꆀ2020ꈎꍏꑷꌋꆀꃅꄷꄐꌗꄐꄉꌠꄜꌊꊯꌕꈭꇩꏤꑭꊂꏓꄊꃀꌕꃢꌠꈿꅉꁳꍤꇖꎻ，ꄷꀋꁧꇩꏤꑭꊂꍔꑠꊈꑼꊈꑌꉜꐨꄜꎼꇁꅊꇈ。<br><br> <b><center>ꋍ、2019ꈎꍏꑷꌋꆀꃅꄷꄐꌗꃄꌬꐛꐨ</center></b><br><br> 2019ꈎ，ꇩꈐꇩꉈꃨꆰꐨꋓꎭꌠꄇꇖꀕꃅꉀꎆꇁꌠꌼꇪꐛꐪꏭꊝꇬ，ꐋꀨꑮꏣꀻꈯꄜꃅꄉꌠꄈꍏꑷꏟꈯꃅꏃꂠꌠꇂꃴꄉ，ꃅꄷꈁꐥꌠꌤꏲꅉꈁꐥꌠꆏꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꄐꇺꅍꃅꄉ，ꐊꑷꃅꄈꅿꃀꀉꒉꊯꈬꃢꌠꌋꆀꊯꈬꈭꑍꃢ、ꌕꃢ、ꇖꃢꐊꈴꃀꈿꉌꊈꃅꈴꌬꈴ，“ꇖꑵꉪꐨ”ꀉꇨꇱ、ꀋꎪꃅ“ꇖꑵꑴꑇ”ꑌꈬ、“ꑍꑵꀧꌋꃅ”ꌠꃅꇫꑟ，ꄈꍏꑷ、ꇩꃷꑼꁈꏤꄐꁆꌠꃅꇫꑟ，ꏦꇨꃅꊯꌕꈭꇩꏤꑭꊂꏓꄊꃀꑍꃢꌠꈿꅉꇬꍤꄻꈌꁧꄉꌠꄐꌗꃄꌬ，ꎍꐽꌠꇬꄉꁨꆹꌠꌤꃅꈁꉬꅉꃀꉉꈌꌭꈬ，ꃹꅼꃅꀻꎆꉪꉻꀊꏀꌠꃄꌬ，ꇲꁵꁁꏯꐛꉻꐨꐥꃅꄺꀱꌠꌌꀨꑟꃅꄉꇬꎷ，ꊇꁧꀊꂥꃅꀻꎆꌠꄹꇙ，ꏟꈯꃅ“ꃘꎍꐽ”ꌤꃅꋒ，ꏓꇲꄉꎍꐽꃅꉀꎆ、ꄺꀱꌠꊥꎆ、ꐛꉻꋊꄻ、ꉹꁌꐥꐨꈲꁵ、ꐔꈔꉆꐨꄴꏮ、ꎍꐽꌠꄉꀧꌠꄹꎆ，ꎆꏣꐧꋦꐪꊛꄉꐛꒆꃅꀻꎆꇬꎷ，ꋋꈓꌠꀋꉬꀋꉆꌠꑞꅉꁻꌐꂿꃆꃅꌐ，ꐊꑷꃅꊼꇅꌣꈚꌠꐧꋦꋉꐛꌠꎁꃅꏤꐪꐨꐥꌠꅉꃀꌆꄻꄉ。ꍏꑷꌋꆀꃅꄷꄐꌗꃄꌬꐛꐨꊼꇅꉾ。<br><br> (ꋍ)2019ꈎꎃꐚꄉꉻꄐꌗꊌꌬꐛꐨ。<br><br> 1.ꇩꏤꑭꊂꎃꐚꄉꉻꄐꌗ。<br><br> ꇩꏤꑭꊂꎃꐚꄉꉻꄐꌗꊌꎆ190382.23ꂡꂷ，ꄐꌗꄉꌠꇬ98.9%ꉬ，2018ꈓꄩ3.8%ꉀꎆ。ꄚꈐꏭ，ꇗꏸꎴꊌꎆ157992.21ꂡꂷ，1%ꉀꎆ；ꇗꏸꀋꉬꌠꊌꐨ32390.02ꂡꂷ，20.2%ꉀꎆ，ꀋꉬꀋꉆꌠꆏꍏꑷꏱꎆꌐꏤꄉꌠꇩꁨꎆꒉꎆꇁꏲꉻꌋꆀꍏꑷꎆꏂꑘꏮꉎꁵꌠꍍꊱꁦꎆꇱ、ꃅꄷꏱꎆꆏꇩꁨꅐꀦꁨꇐꌬꐨꊋꀥꇱ。ꄀꇱꎆꃀꌋꆀꌗꏮꂫꋒꌠꌫꄻꌠ22160.95ꂡꂷ(ꍏꑷꌋꆀꃅꄷꏱꎆꄐꌗꎍꐽꋊꄻꎆꀨ、ꍔꃚꃤꃅꐙꌠꎆꃀꄐꌗ、ꇩꁨꎆꀨꀰꏢꄐꌗꌠꇬꄉꄀꃹꌠꎆꃀ，ꉈꑴꃅꄷꏱꎆꌗꏮꂫꋒꎆꀨꌬꈧꌠꄚꐊ)，ꊌꎆꈁꉬꃷꁨ212543.18ꂡꂷ。ꇩꏤꑭꊂꎃꐚꄉꉻꄐꌗꌫꎆ238874.02ꂡꂷ，ꄐꌗꄉꌠꇬ101.5%ꃅꌐ，8.1%ꉀꎆ。ꍏꑷꄐꌗꎍꐽꋊꄻꎆꀨꇬꁥꇱꌠ1269.16ꂡꂷꄻꇬꇯꇬꆏ，ꌫꎆꈁꉬꃷꁨꆏ240143.18ꂡꂷ。ꊌꌬꈁꉬꃷꁨꐮꊒꇬꆏ，27600ꂡꂷꌫꁏꇔ，ꄐꌗꄉꌠꌋꆀꐮꆌ。<br><br> 2.ꍏꑷꎃꐚꄉꉻꄐꌗ。<br><br> ꍏꑷꎃꐚꄉꉻꄐꌗꊌꎆ89305.41ꂡꂷ，ꄐꌗꄉꌠꇬ99.4%ꉬ，4.5%ꉀꎆ。ꍏꑷꄐꌗꎍꐽꋊꄻꎆꀨꇬꄉ2800ꂡꂷꄀꇱꈭꐨ，ꍏꑷꍔꃚꃤꃅꐙꌠꎆꀨꄐꌗ、ꍏꑷꇩꁨꎆꀨꀰꏢꄐꌗꌠꇬꄉ394ꂡꂷꄀꇬꇯꇬ，ꊌꎆꈁꉬꃷꁨ92499.41ꂡꂷ。ꍏꑷꎃꐚꄉꉻꄐꌗꌫꎆ109530.25ꂡꂷ，ꄐꌗꄉꌠꇬ98.4%ꃅꌐ，7%ꉀꎆ，ꄚꈐꏭ，ꋋꊐꌠꌫꎆ35115.15ꂡꂷ，ꄐꌗꄉꌠꇬ99.2%ꃅꌐ，6%ꉀꎆ；ꃅꄷꏭꆹꏮꁵꄻꌠ74415.1ꂡꂷ，ꄐꌗꄉꌠꇬ98.7%ꃅꌐ，7.5%ꉀꎆ。ꍏꑷꄐꌗꎍꐽꋊꄻꎆꃀꇬꁥꇱꌠ1269.16ꂡꂷꇱꄉꇬ，ꌫꎆꈁꉬꃷꁨꆏ110799.41ꂡꂷ。ꊌꌬꈁꉬꃷꁨꐮꊒꇬꆏ，ꍏꑷꏱꎆ18300ꂡꂷꌫꁏꇔ，ꄐꌗꄉꌠꌋꆀꐮꆌ。<br><br> ꍏꑷꎃꐚꄉꉻꄐꌗꊌꎆꐘꃆꀋꉬꀋꉆꌠꀑꐱꐛꐨꆏ：ꇩꈐꁌꎆꇗꏸ31161.01ꂡꂷ，ꄐꌗꄉꌠꇬ103.7%ꉬ。ꇩꈐꌬꈧꇗꏸ12561.52ꂡꂷ，ꄐꌗꄉꌠꇬ108.5%。ꈏꃹꎊꈬꁌꎆꇗꏸ、ꌬꈧꇗꏸ15812.3ꂡꂷ，ꄐꌗꄉꌠꇬ93.1%ꉬ。ꈴꀸꇗꏸ2889.11ꂡꂷ，ꄐꌗꄉꌠꇬ105.1%ꉬ。ꎆꏂꑘꊌꐨꇗꏸ23786ꂡꂷ，ꄐꌗꄉꌠꇬ97.4%ꉬ。ꊨꏦꊌꐨꇗꏸ6234.14ꂡꂷ，ꄐꌗꄉꌠꇬ80.5%ꉬ，ꀋꉬꀋꉆꌠꆏꅉꀨꌫꁌꎕꏦꊨꇧꎭ、ꌐꐘꁥꇱꈎꇧꎭꏱꁈꃄꌬꑠꇗꏸꊨꄉꈁꂴꄐꄉꌠꄩꐂ。ꉇꅐꎊꈬꁌꎆꇗꏸ、ꌬꈧꇗꏸꀱꁵꌠ16503.2ꂡꂷ，ꄐꌗꄉꌠꇬ103.5%ꉬ。<br><br> ꍏꑷꎃꐚꄉꉻꄐꌗꋋꊐꌠꌫꎆꐘꃆꀋꉬꀋꉆꌠꀑꐱꐛꐨꆏ：ꎃꐚꄉꉻꁧꃤꃅꌫꎆ1985.16ꂡꂷ，ꄐꌗꄉꌠꇬ99.7%ꃅꌐ。ꉇꉻꑌꑲꌫꎆ615.39ꂡꂷ，ꄐꌗꄉꌠꇬ98.1%ꃅꌐ。ꇩꐏꌫꎆ11896.56ꂡꂷ，ꄐꌗꄉꌠꇬ100%ꃅꌐ。ꄉꉻꋬꂻꌫꎆ1839.45ꂡꂷ，ꄐꌗꄉꌠꇬ102.3%ꃅꌐ。ꂘꑘꌫꎆ1835.88ꂡꂷ，ꄐꌗꄉꌠꇬ100%ꃅꌐ。ꈆꑪꇮꇐꌫꎆ3516.18ꂡꂷ，ꄐꌗꄉꌠꇬ99.2%ꃅꌐ。ꋚꂷꒀꋌꎊꈬꊭꊎꌫꎆ1204.04ꂡꂷ，ꄐꌗꄉꌠꇬ102.3%ꃅꌐ。ꎝꃆꇔꊰꎆꁵꌫꎆ4566.62ꂡꂷ，ꄐꌗꄉꌠꇬ91.4%ꃅꌐ。<br><br> ꍏꑷꃅꄷꏭꆹꏮꁵꄻꌠꀑꐱꐛꐨꆏ：ꎂꀕꃅꐙꌠꆹꏮꁵꄻꌠ66849.4ꂡꂷ，ꄐꌗꄉꌠꇬ98.7%ꃅꌐ，ꄚꈐꏭ，ꐮꐊꏱꎆꌤꌅꆹꏮꁵꄻꌠ31903.25ꂡꂷ，ꄐꌗꄉꌠꇬ100.2%ꃅꌐ；ꌐꐘꆹꏮꁵꄻꌠ7565.7ꂡꂷ，ꄐꌗꄉꌠꇬ99.1%ꃅꌐ。<br><br> 2019ꈎꍏꑷꎃꐚꄉꉻꄐꌗꂫꋒꌠ1269.16ꂡꂷ(ꄚꈐꏭ，ꍏꑷꊭꄎꎆꋋꄹꈎꌌꀋꌬ，ꎆ500ꂡꂷꂫꋒꌠꏓꐛ)，ꉬꇮꃅꆹꏮꌊꍏꑷꄐꌗꎍꐽꋊꄻꎆꀨꇬꇱꌐ。ꍏꑷꏱꎆꎴꌊꀱꇁꌠꇬꈴꄉꎆꃀ3000ꂡꂷꁥꇱ。2019ꈎꈎꂫꇬ，ꍏꑷꄐꌗꎍꐽꋊꄻꎆꀨꊁꋒꃷꁨ5272.49ꂡꂷ。<br><br> 3.ꃅꄷꎃꐚꄉꉻꄐꌗ。<br><br> ꃅꄷꎃꐚꄉꉻꄐꌗꊌꎆ175491.92ꂡꂷ，ꄚꈐꏭ，ꋋꊐꌠꊌꎆ101076.82ꂡꂷ，3.2%ꉀꎆ；ꍏꑷꃅꄷꏭꆹꏮꁵꄻꌠꊌꎆ74415.1ꂡꂷ。ꃅꄷꏱꎆꆏꃅꄷꄐꌗꎍꐽꋊꄻꎆꃀ、ꍔꃚꃤꃅꐙꌠꎆꃀꄐꌗ、ꇩꁨꎆꀨꀰꏢꄐꌗꄀꇱꎆꃀꌋꆀꌗꏮꂫꋒꌫꎆ18966.95ꂡꂷꇱꄉꇬꆏ，ꊌꎆꈁꉬꃷꁨ194458.87ꂡꂷ。ꃅꄷꎃꐚꄉꉻꄐꌗꌫꎆ203758.87ꂡꂷ，8.5%ꉀꎆ。ꊌꌬꈁꉬꃷꁨꐮꊒꇬꆏ，ꃅꄷꏱꎆ9300ꂡꂷꌫꁏꇔ，ꄐꌗꄉꌠꌋꆀꐮꆌ。<br><br> (ꑍ)2019ꈎꍔꃚꃤꃅꐙꌠꎆꃀꄐꌗꊌꌬꐛꐨ。<br><br> ꃅꄷꍔꃚꎝꃆꏲꂠꃆꂮꐥꌠꏤꐪꇬꈴꄉ，ꃅꄷꍔꃚꌐꐘꎝꃆꊌꌬꌠꌌꍔꃚꃤꃅꐙꌠꎆꃀꄐꌗꌠꇬꇱꄉꏲꂠ。<br><br> ꇩꏤꑭꊂꍔꃚꃤꃅꐙꌠꎆꃀꄐꌗꊌꎆ84515.75ꂡꂷ，12%ꉀꎆ。2018ꈓꌗꏮꊌꎆ360.4ꂡꂷꌋꆀꃅꄷꍔꃚꃑꄻꌠꌐꐘꎝꃆꊫꌐꏓꊭꄉꌠꊌꎆ21500ꂡꂷꄻꇬꇯꇬꆏ，ꇩꏤꑭꊂꍔꃚꃤꃅꐙꌠꎆꀨꊌꐨꈁꉬꃷꁨꆏ106376.15ꂡꂷ。ꇩꏤꑭꊂꍔꃚꃤꃅꐙꌠꎆꀨꄐꌗꌫꎆ91364.8ꂡꂷ，13.4%ꉀꎆ。<br><br> ꍏꑷꍔꃚꃤꃅꐙꌠꎆꀨꄐꌗꊌꎆ4039.62ꂡꂷ，ꄐꌗꄉꌠꇬ96.3%，0.1%ꉀꎆ。2018ꈓꌗꏮꊌꎆ360.4ꂡꂷꇱꄉꇬꆏ，ꍏꑷꍔꃚꃤꃅꐙꌠꎆꀨꊌꎆꈁꉬꃷꁨꆏ4400.02ꂡꂷ。ꍏꑷꍔꃚꃤꃅꐙꌠꎆꀨꄐꌗꌫꎆ4178.86ꂡꂷ，ꄐꌗꄉꌠ91.9%ꃅꌐ，3.9%ꉀꎆ，ꄚꈐꏭ，ꋋꊐꌠꌫꎆ3113.41ꂡꂷ，ꃅꄷꏭꆹꏮꁵꄻꌠ1065.45ꂡꂷ。ꄀꌌꎃꐚꄉꉻꄐꌗꇬꇱꌠ4.23ꂡꂷ。ꍏꑷꍔꃚꃤꃅꐙꌠꎆꀨꄐꌗꊌꎆ216.93ꂡꂷꌫꁏꇔ，ꄚꈐꏭ，ꌗꏮꌊꊁꈒꌠꐪꊛꄉꌬꌠ180.04ꂡꂷ；ꄂꐘꍔꃚꃤꃅꐙꌠꎆꀨꐘꃆꌗꏮꌠꋋꈓꊌꎆ30%ꇬꐂꁧꄹꁆꌠꏓꐯꇯꇬ36.89ꂡꂷ，ꏤꐪꇬꈴꄉꍏꑷꄐꌗꎍꐽꋊꄻꎆꀨꇬꁥꇱ。<br><br> ꃅꄷꍔꃚꃤꃅꐙꌠꎆꀨꄐꌗꋋꊐꌠꊌꎆ80476.13ꂡꂷ，12.6%ꉀꎆ，ꄚꈐꏭ，ꇩꁨꃄꅉꌫꄻꌅꈌꏆꅐꊌꎆ72584.42ꂡꂷ，11.4%ꉀꎆ。ꍏꑷꍔꃚꃤꃅꐙꌠꎆꀨꄐꌗꌠꃅꄷꏭꆹꏮꁵꄻꊌꎆ1065.45ꂡꂷꌋꆀꃅꄷꍔꃚꃑꄻꌠꌐꐘꎝꃆꊫꌐꏓꊭꄉꌠꊌꎆ21500ꂡꂷꄻꇬꇯꇬꆏ，ꃅꄷꍔꃚꃤꃅꐙꌠꎆꀨꊌꐨꈁꉬꃷꁨꆏ103041.58ꂡꂷ。ꃅꄷꍔꃚꃤꃅꐙꌠꎆꀨꄐꌗꌫꎆ88251.39ꂡꂷ，13.9%ꉀꎆ。<br><br> (ꌕ)2019ꈎꇩꁨꎆꀨꀰꏢꄐꌗꊌꌬꐛꐨ。<br><br> ꇩꏤꑭꊂꇩꁨꎆꀨꀰꏢꄐꌗꊌꎆ3960.42ꂡꂷ，36.3%ꉀꎆ。ꇩꏤꑭꊂꇩꁨꎆꀨꀰꏢꄐꌗꌫꎆ2287.43ꂡꂷ，6.2%ꉀꎆ。<br><br> ꍏꑷꇩꁨꎆꀨꀰꏢꄐꌗꊌꎆ1635.93ꂡꂷ，ꄐꌗꄉꌠꇬ99.9%ꉬ，23.3%ꉀꎆ。2018ꈓꌗꏮꊌꎆ6.7ꂡꂷꇱꄉꇬ，ꊌꎆꈁꉬꃷꁨꆹ1642.63ꂡꂷ。ꍏꑷꇩꁨꎆꀨꀰꏢꄐꌗꌫꎆ1108.8ꂡꂷ，ꄐꌗꄉꌠꇬ88.4%ꃅꌐ，0.3%ꀁꋌꊰ，ꄚꈐꏭ，ꋋꊐꌠꌫꎆ986.55ꂡꂷ，ꃅꄷꏭꆹꏮꁵꄻꌠ122.25ꂡꂷ。ꄀꌌꎃꐚꄉꉻꄐꌗꇬꇱꌠ389.77ꂡꂷ，ꄀꇱꍆꁧꉀꐕꅷ28%ꇬꑟ。ꂫꏮꌊꊁꈒꌠꌫꅐꌠ144.06ꂡꂷ。<br><br> ꃅꄷꇩꁨꎆꀨꀰꏢꄐꌗꋋꊐꌠꊌꎆ2324.49ꂡꂷ，47.2%ꉀꎆ。ꍏꑷꇩꁨꎆꀨꀰꏢꄐꌗꌠꃅꄷꏭꆹꏮꁵꄻꌠꊌꎆ122.25ꂡꂷꄻꇬꇯꇬꆏ，ꊌꎆꈁꉬꃷꁨꆹ2446.74ꂡꂷ。ꃅꄷꇩꁨꎆꀨꀰꏢꄐꌗꌫꎆ1300.88ꂡꂷ，15.3%ꉀꎆ。ꄀꌌꎃꐚꄉꉻꄐꌗꎆꃀꇬꇱꄉꉀꎆꅷ943.19ꂡꂷꇬꑟ。ꌗꏮꌊꊁꄹꈎꌫꅐꌠ202.67ꂡꂷ。<br><br> (ꇖ)2019ꈎꐧꋦꄜꏂꀧꎆꀨꄐꌗꊌꌬꐛꐨ。<br><br> ꇩꏤꑭꊂꐧꋦꄜꏂꀧꎆꀨꊌꎆ80844.09ꂡꂷ，2.3%ꉀꎆ，ꄚꈐꏭ，ꄜꏂꀧꁌꊌꐨ57849.05ꂡꂷ，ꏱꎆꁥꇱꊌꐨ19392.61ꂡꂷ。ꇩꏤꑭꊂꐧꋦꄜꏂꀧꎆꀨꌫꎆ74989.23ꂡꂷ，11.3%ꉀꎆ。ꋋꄹꈎꊌꌬꂫꋒꎆ5854.86ꂡꂷ，ꈎꂫꊛꊭꊎꂫꋒꎆ94026.97ꂡꂷ。<br><br> ꍏꑷꐧꋦꄜꏂꀧꎆꀨꊌꎆ688.61ꂡꂷ，ꄚꈐꏭ，ꄜꏂꀧꁌꊌꎆ354.44ꂡꂷꑟ，ꏱꎆꁥꇱꊌꎆ319.36ꂡꂷꑟ。ꃅꄷꏮꉎꁵꌠꅉꀨꃀꌠꀨꎹꄜꏂꀧꍏꑷꋊꄻꎆꃀꊌꎆ6280ꂡꂷꇱꄉꇬꆏ，ꊌꎆꈁꉬꃷꁨꆏ6968.61ꂡꂷ。ꍏꑷꐧꋦꄜꏂꀧꎆꀨꌫꎆ663.2ꂡꂷ，ꄐꁆꃅꄷꁵꌠꅉꀨꃀꌠꀨꎹꄜꏂꀧꍏꑷꋊꄻꎆꃀꌫꎆ6273.8ꂡꂷꄻꇬꇯꇬꆏ，ꌫꎆꈁꉬꃷꁨꆏ6937ꂡꂷ。ꋋꄹꈎꊌꌬꂫꋒꎆ31.61ꂡꂷ，ꈎꂫꊛꊭꊎꂫꋒꎆ358.75ꂡꂷ。<br><br> ꃅꄷꐧꋦꄜꏂꀧꎆꀨꊌꎆ80155.48ꂡꂷ，ꄚꈐꏭ，ꄜꏂꀧꁌꊌꎆ57494.61ꂡꂷ，ꏱꎆꁥꇱꊌꎆ19073.25ꂡꂷ。ꅉꀨꃀꌠꀨꎹꄜꏂꀧꍏꑷꋊꄻꎆꃀꊌꎆ6273.8ꂡꂷꇱꄉꇬꆏ，ꊌꎆꈁꉬꃷꁨꆏ86429.28ꂡꂷ。ꃅꄷꐧꋦꄜꏂꀧꎆꀨꌫꎆ74326.03ꂡꂷ，ꅉꀨꃀꌠꀨꎹꄜꏂꀧꍏꑷꋊꄻꎆꃀꌫꎆ6280ꂡꂷꇱꄉꇬꆏ，ꌫꎆꈁꉬꃷꁨꆏ80606.03ꂡꂷ。ꋋꄹꈎꊌꌬꂫꋒꎆ5823.25ꂡꂷ，ꈎꂫꊛꊭꊎꂫꋒꎆ93668.22ꂡꂷ。<br><br> 2019ꈎꈎꂫꇬ，ꍏꑷꏱꎆꇩꎝꋒꐨꃷꁨ168038.04ꂡꂷ，ꋎꍅꌊꇩꏤꑭꊂꏓꄊꈌꁧꄉꌠꎝꃆꋒꐨꑞꅉꃷꁨ175208.35ꂡꂷꈍꈐꄉ；ꃅꄷꍔꃚꎝꃆꊁꋒꃷꁨ213072.26ꂡꂷꐥ，ꎃꐚꎝꃆꊁꋒꃷꁨ118694.14ꂡꂷ、ꌐꐘꎝꃆꊁꋒꃷꁨ94378.12ꂡꂷꇫꐊ，ꋏꌫꌌꇩꏤꑭꊂꏓꄊꈌꁧꄉꌠꎝꃆꊁꋒꃷꁨꑞꅉꐥꃷꁨ240774.3ꂡꂷꈐꇬꄉ。<br><br> ꄚꉎꄐꌗꃄꌬꌠꑭꋧꐛꐨꌋꆀꄚꃆꂮꐥꌠꉉꀽꌠꆏꑭꋧꃅ《ꍏꉸꏓꂱꇭꉼꇩ2019ꈎꇩꏤꑭꊂꄐꌗꃄꌬꐛꐨ2020ꈎꇩꏤꑭꊂꄐꌗ(ꄐꄉꌠ)》ꇬꉜ。<br><br> (ꉬ)2019ꈎꀋꉬꀋꉆꌠꏱꎆꇗꏸꏱꁈꃅꇫꑟꌠꌋꆀꀋꉬꀋꉆꌠꏱꎆꌤꃅꐛꐨ。<br><br> 2019ꈎ，ꎆꏲꌤꏲꅉꆏꎔꎗꃅꄈꍏꑷ、ꇩꃷꑼꁈꏤꄐꁆꌠꃅꈴꌬꈴ，ꄐꌗꏦꃤꌋꆀ《ꏓꄊꄐꌗꍤꄻꍞꊟꀋꉬꀋꉆꌠꌫꎆꄐꌗꌠꌋꆀꏱꁈꌠꏭꍔꀺꌠꃆꂮꄐꇺꉜꐨ》ꇬꈴꄉ，ꏦꇨꃅꇩꏤꑭꊂꏓꄊꄐꌗꏤꐪꌋꆀꍤꇖꉜꐨꇖꐨꃄꌬꇫꑟ，ꊋꇤꄉꈲꁧꉀꐕꌠꏣꀋꑌꌠꏱꎆꏱꁈꃄꌬ，ꀋꉬꀋꉆꁁꏯꊋꁈꄏꌠꊋꀉꒉꃅꇱ，ꐳꃅꏱꎆꇗꏸꏦꉻꄺꀱꌠꄹꎆ，ꀋꆏꃅꏱꎆꏲꂠꑟꐨꉀꐕ。<br><br> ꄉꈁꀊꅰꀉꒉꃅꇗꏸꊨꁌꊰꌠꃄꌬ。ꇗꏸꊨꁌꊰꌠꌋꆀꈛꎂꃅꎆꏂꑘꉹꁌꈲꊌ、ꐽꊯꇿꋌꐥꃅꊌꌠꆹ，ꎆꏣꀁꋌꊰꍅꊋꏭꊝꌠꃄꁈꀉꒉꀊꂾꌠꉬ。ꈁꐥꊐꌠꎆꐪꇗꏸꌤꃅꅉꆏꄉꈁꀊꅰꀉꒉꌠꇗꏸꊨꁌꊰꌠꃅꇫꑟꌠꌌ2019ꈎꏣꀋꑌꌠꏱꎆꏱꁈꃄꌬꌠꌤꀨꐘꌠꃅꄉꃶꐚꃅꒃꋒꉇꋒ。1ꆪ1ꑍꄑꐭꌺꎆꏂ꒧ꈲꈴꐨꐥꃅꇗꏸꊨ、ꊨꏦꊌꐨꇗꏸꌐꐘꁥꇱꄉꈎꇧꎭꌠꃄꌬ；4ꆪ1ꑍꄑꃹꅼꃅꁌꎆꇗꏸꄺꀱꌠꏁꁈꃄꌬ，ꄺꂡꑘꑠꉹꑘꁌꎆꇗꏸꇗꏸꍆꐪꆏ16%ꇬꄉꀁꋌꊨꌊ13%ꇬꑟ，ꈭꈜꎞꎭꑘ、ꋈꄻꑘꑠꉹꑘ10%ꇬꄉꀁꋌꊨꌊ9%ꇬꄉ；5ꆪ1ꑍꄑꐧꋦꄜꏂꀧꌫꁌꊨꒊ。ꐪꊛꄉꏲꑘꌤꑘꃅꐙꌠꁌꎴꌠꌋꆀꍔꃚꃤꃅꐙꌠꎆꀨꎵꄻꋊꍬ。<br><br> ꇗꏸꊨꁌꊰꏱꁈꆏꎆꏂꑘꀵꃤꊨꑾꌙ、ꀀꊿꌬꈧꌠꊥꎆ、ꃷꎏꂴꄐꄉꌠꎍꐽꌠꌋꆀꃅꅍꊌꎻꌠꍔꒉꑠꁁꏯꇬꂿꄐꀋꂿꑘꌠꋊꇤꅐꇁꀐ，ꊋꑌꃅꐥꄜꎆꏣꎍꐽꃅꀻꎆꌠꊋꁈꄏꀐ。2019ꈎꋋꈓꌠꇗꏸꊨꌫꁌ2.36ꃪꂡꂷꑟ，ꄚꈐꏭꀊꏀꃅꁦꎆꌠꇗꏸꊨꌠ1.93ꃪꂡꂷꑟ。ꄺꂡꑘꌋꆀꋍꄚꃆꂮꐥꌠꊨꊭꁌꎆꇗꏸꆏ5928ꂡꂷ，ꇗꏸꊨꐨꆏ24.1%ꑟ；ꋈꄻꑘꌋꆀꈭꈜꎞꎭꑘꁌꎆꇗꏸꂱꑱꅉꃅꇗꏸ257ꂡꂷ、44ꂡꂷꊨ，ꇗꏸꊨꐨ5.2%、6.7%ꑟ；ꐛꏀꁧꃤꃅꑘꌋꆀꐥꐨꁧꃤꃅꑘꑠꀉꁁꉹꑘꁌꎆꇗꏸꀵꃤꑌꑟꐨꐯꀋꌡꃅꀁꋌꊨꌠꃅꇫꑟ。ꉹꁌꀰꏢꌠꎆꏂꑘꏓꌗꇬꇗꏸꊨꌠ1.26ꃪꂡꂷꐥ，ꇗꏸꊨꃷꁨꈁꐥꌠꇬ65.5%ꍆ。ꀄꊭꐭꌠꎆꏂꑘꇗꏸ2832ꂡꂷꊨ，ꎆꏂꑘꈁꊌꇗꏸꊨꏆꈲꊌꌠꇗꏸꏮꊿ626ꃪꁯꇬꑟ，ꁌꎆꇗꏸꀋꎴꌠꄉꈁꀄꊭꌠꇗꏸꏮꊿꀊꏀꃅ456ꃪꁯꁦꎆ。ꊨꏦꊌꐨꇗꏸꌐꐘꁥꇱꈎꇧꎭꌠꏱꁈꃄꌬ，2018ꈓ10ꆨ1ꑍꊨꏦꊌꐨꇗꏸꅉꀨꌫꁌꊨꒊꎕꏦꉀꐕꌠꌋꆀꇗꏸꍆꐪꐛꉻꉾꃪꈴꂥꄓꐊꊈꄻꇬꇯꇬ，ꏓꐯꇯꇬꇗꏸ4604ꂡꂷꊨꒊ，ꇗꏸꏮꊿ2.5ꂡꌠꈛꎂꃅꈲꊌ，ꊾꂷꌠꐽꏡꃅꇗꏸ1842ꂷꀋꇈꊨ。<br><br> ꇗꏸꊨꁌꊨꏱꁈꃅꇫꑟꌠꊋꁈꄏꂿꄷꄉ，ꍔꃚꋍꊐꋑꀋꋒꌠꊋꀉꒉꃅꎃꐚꃅꐙꌠꌬꐨꍅꊨ，ꈭꈜꀉꑌꏢꃅꈴꄉꎆꃀꏓꊭꄉꌌꊨꒊꄉꎴꌠꇬꁥꇱ，ꊋꇤꄉꄐꌗꊌꌬꐮꆽꏣꌠꃅꇫꑟ。ꍏꑷꏱꎆꆏꃅꄷꏭꆹꏮꁵꄻꌠꊋꀉꒉꃅꇱ，ꄷꀋꁧꐽꏡꐨꐥꌠꆹꏮꁵꄻꌠ、ꑤꊐꌠꅉꀨꎆꊋꏦꀧꉺꏦꈁꁠꁥꁵꄮꇬ，ꅉꂫꊐꌠꏱꎆꊋꋠꌠꃅꄷꌋꆀꇗꏸꊨꌫꁌꊼꇅꀉꒉꌠꃅꄷꏭꉜꄉꎎ，ꎆꏲꏦꀧꊋꃤꄻꀉꇨ。ꑤꊐꌠꏱꎆꃄꎆꏦꀧꍞꎖꌗꋏꌋꆀꃨꆰꐨꄤꎖꉺꏦꃄꌬ，ꏱꎆꊌꐨꌬꐨꌋꆀꊭꎆꏲꂠꌠꏓꇲ，ꋭꋽꃅꌬꐨꁆꄻꌊꂴꊁꊱꁨꃅꄉ，ꃶꐚꃅꑤꊐꌠ“ꌕꀧ”(ꅉꀨꉹꁌꐥꐨꀧ、ꃄꎆꀧ、ꏮꈴꀧ)ꂫꑟꐏꈬꃅꄉ。<br><br> ꐪꊛꄉꈢꇓꀖꀉꒉꌕꐘꌠꃅꋒꌠꊋꁈꄏ。ꌢꎭꊋꄏꈢꇓꀖꌠꏭꊋꀉꒉꃅꇱ。ꊒꌸꃅꌢꎭꄏꐓꏁꁈꃄꌬꇫꑟꌋꆀꄻꐛꒆ，“ꑍꀋꐒꌕꏦꀧ”ꑓꅐꎑꃅꀋꇎꅉꇬꅋꑣꌠꇬꆼꒆꄉ，ꎭꑆꇔꈢꇓꀖꌠꇬꎆꇱꏦꀧꌠꄻꀉꇨ。ꍏꑷꏱꎆꃅꄷꁥꇱꌠꌐꐘꌢꎭꄏꐓꎆꀨ1261ꂡꂷ，18.9%ꉀꎆ，ꀒꁨꋍꁘꃅ“ꌕꐎꌕꍏ”ꑠꌢꎭꅼꇨꃅꄷꏭꉜꄉꎎ。ꌜꁕꐂꄉꋠꃅꊌꐨꁥꇱꌠꌋꆀꇓꈓꇓꉈꋈꄻꃄꅉꌬꌠꁦꎆꊨꒊꌠꏓꐯꄀꄉꊁꋒꌐꁧꌬꄉꊌꐨꋊꄻꄉꄐꁆꌠ817ꂡꂷ，ꉬꇮꃅꌌꎭꇔꈢꇓꀖꌠꌋꆀꑣꋂꉀꄓꄐꇐꏤꁈꃄꌬꌠꇬꌬꌐ。ꎞꀉꁁꏀꄉꌢꎭꄏꐓꃅꄷꍔꃚꎃꐚꎝꊫꌐ1294ꂡꂷꃑꀁꋌꎭ，ꋍꈓꏛꃅꀑꐱꃅ“ꊯꌕꉬ”ꄐꎖꋈꄻꂿꃆꃅꌐꌠꊋꁈꄏ。ꎆꏂꑘꌢꎭꄏꐓꄖꁵꌠꈁꊌꇗꏸꏭꇗꏸꏮꂾꃶꐚꈎꇧꎭ、ꌢꎭꄏꐓꎊꈬꄖꁵꌠꏭꁌꎆꇗꏸꀋꎴ、ꍔꃚꃻꄻꄉꎭꑆꇔꈢꇓꀖꊋꁈꄏꑠꏱꁈꄻꅐꇁ，ꐪꊛꄉꃹꅼꃅꌢꎭꑤꂿꑘꃆꂮꐥꌠꎆꀨꋊꍬꐯꇯꀱꌠꃅꉚꅉꄹꎆ。ꌢꎭꄏꐓꐘꃆꈁꉬꈴꎁꃅꐨꇿꋌꏲꂠꌠꄹꎆ。ꏱꎆꌢꎭꄏꐓꎆꃀꇙꐨꍞꊟꋏꆸꐽꈉꋈꄻꌠꊌꐨꀑꐱꃅꊌꅜ。ꋋꈓꇬꄉꉣꄻꈁꁱꄉꌠꌢꎭꊻꂷ1109ꃪꑼꊨꒊ，ꌢꎭꑤꌢꎭꀎꇓꇔꇧꎭꌠ344ꂷꐥ。ꏣꀋꑌꃅꍍꆀꄴꏮꏱꄻꌠꊋꁈꄏ。ꍍꆀꄴꏮꈢꇓꀖꌠꌌꀨꇬꄉꏦꀧꌋꆀꂴꁵꌫꅐꁁꏯꃅꄉ，ꃅꌗ、ꀇꐒ、ꊖꆊꑠꍍꆀꄴꏮꌐꂷꄻꋒꌠꀉꒉꀊꂾꃅꌉꈿꌠꊋꁈꄏ。ꒈꀑꃅꄷꃅꋆꄮꐰꁦꎴꃅꊸꎹꃅꉚꅉꈍꈐꍔꒉ。ꁸꑍꁥꃅꄉꇓꈓ40ꂷꌌꒉꊈꀉꆈꍹꅿꏱꄻꌡꀠꏱꁈꇬꇱꄉ。ꐪꊛꄉꍤꏦꎆꏣꐛꁕꒆꉻꀧꌋꃅꄺꀱꈁꁠꁵꏱꁈꃄꌬ，ꐳꃅꍤꏦꒊꃀꀧꌋꃅꐛꉻꀉꒉꌠꄻꐛꌠꄹꇙ。ꃹꅼꃅꁧꒉꌩꏪꍯꃅꎿꏜꒆꉻꀧꌋꃅꄻꐛꅉꐛꌠꋉꃆꃅꉚꅉꄹꎆ。“ꃴꆧ꒺ꈪ”ꏱꄻꃅꐨꌋꆀꀨꉰ꒺ꏓꇱꏱꄻꌠꃄꌬ，ꎿꃀꒆꉻꀧꌋꃅꀱꐛꅉꐛꌠꊋꁈꄏ。ꇎꏦꇬꊒꌠꍍꆀꄴꏲꌠꌕꁁꏯꌠꎆꏂꑘꊨꒊꌠꆏꇗꏸꍆꐪ15%ꇬꈴꄉꎆꏂꑘꈁꊌꇗꏸꎴ。ꏣꀋꑌꃅꇩꏤꀊꃴꃅꀻꎆꎆꀨꄻꄉꌠꄹꇙ。ꏱꎆꎆꒉꎆꇁꃨꆰꐨꄴꏮꋊꎵ。“ꀃꈈꂴꁬꌠꁉ、ꀃꈈꊁꁬꌠꈢ”ꉪꈜꇬꈴꄉ，ꏓꇲꄉꃅꄷꍔꃚꎝꊫꌐꃑꄻꌫꄻꌠꌋꆀꃨꆰꐨꄴꏮꌠꌤꃅꋒ。ꃅꄷꈧꌠꄹꇙꄉꏦꇨꃅꃅꄷꍔꃚꎝꃆꄐꌗꏲꂠꌠꇬꃆꂮꐥꌠꏤꐪꌋꆀꇖꐨꃄꌬꇫꑟ，ꑴꇙꃅꏓꄊꁳꃅꄷꍔꃚꎝꃆꉛ、ꌬ、ꌣꌠꈁꉬꈴꎁꇬꃅꍞꊟꎻ。ꈀꄸꌬꈧ、ꈀꄸꆽꎍꌠꏥꏦꇬꈴꄉ，ꏦꇨꃅꌐꐘꎝꊫꌐꐘꃆꌤꃅꅉꎝꊒꆽꎍꐨꃄꌬꇫꑟ，ꏦꇨꃅꌐꐘꎝꊫꌐꈔꉆꐨꄴꏮ。ꅉꀕꐛꐪꈴꍞꊟꋎꍅꉺꏦꄻꐛꒆ，ꃅꄷꍔꃚꇗꐆꄉꎆꉛꌠꆽꎍꐨꅑꃤꎹꌠꄻꀉꇨ。ꋍꑞꋍꁁꏯꐯꇯꊋꇤꌠꇂꃴꄉ，ꃅꄷꍔꃚꂁꀀꎝꃆꃨꆰꐨꇿꋌꐥꃅꄴꏮꀐ。ꋍꈭꐨ，ꋭꋽꃅꎆꒉꎆꇁꐔꈔꉆꐨꂥꀘꇧꎭꌠꇇꀨꄉ，ꊋꀥꇱꄉꎆꒉꎆꇁꎆꏂꑘꎆꃆꍞꏲ，ꎆꒉꎆꇁꎆꏂꑘꈅꏹꈴꌗꊇꁧꉀꐕꌠꄹꇙ。<br><br> ꃹꅼꃅꇲꁵꁁꏯꐛꉻꃅꐙꌠꄺꀱꌠꊋꁈꄏ。ꃹꅼꃅꇮꇐꉁꈾꀉꒉꀊꂾꌠꉘꃀꇶ(ꋬꈭ)ꌠꄜꏂꀧꁵꊒꃅꉚꌠꄹꎆ。ꀋꇙꁨꎆꐳꃅꆹꋊꈲꁵꌠꉹꑘꈍꈐꍔꒉꅷꄺꂡꑘꈁꐥꁁꏯꃅꑟꈴ。ꃷꎏꈴꇇꁈꇬꈴꄉꏓꐛꄆꈜꅐꑘꀻꎆꌠꇬꊋꁈꄏ。“ꌕꊨꋍꍅꋍꅋ”ꊌꐨꌆꈬ，ꋋꇅꃅꌐꐘꈁꁠꁵꁥꇱꎆ20ꂡꂷꁆꁵ，ꏛꃅꎸꅍ、ꊖꌋꑠꀋꉬꀋꉆꌠꉹꑘꅐꊋꊨꁻꌐꃅꌐꌠꊋꁈꄏ。ꍏꑷꎃꐚꄉꉻꄐꌗꋋꊐꌠꈆꑪꇮꇐꌫꎆ3516.18ꂡꂷ，12.5%ꉀꎆ，ꈆꑪꇮꇐꄘꄏꄐꊋꌋꆀꈆꑪꇮꇐꀉꒉꀊꂾꌐꐘꐳꃅꈢꇓꀖꌠꊋꁈꄏ。ꐧꋦꉪꏦꃷꎏꎆꏣꇎꏦꇂꃴꀋꉬꀋꉆꌠꈯꄜꇮꇐꈢꇓꀖꀊꏀꉹꌠꇩꏤꏦꉻꋈꄻꌠꄹꇙ。ꀊꏀꃅꀖꁉꅉ58ꈚꊋꁈꄏꄉꋍꑞꋍꉹꇭꀧꃷꎏꈴꌐꑘꈴꌠꊨꄅꃅꐨꉀꐕ，ꐯꀋꌡꌠꉹꑫꑍꀺꊐꄜꄺꂡ。ꇩꏤꏀꄓꅐꑘꑘꀺꎆꇱꄐꏁꎆꀨꂿꄐꋊꇤ，ꏓꌗꐯꇯꇬ5100ꁯꑘꀺꎆꏂꑘꄩꐂꌠꊋꁈꄏ。ꎆꏂꑘꐧꐭꄉꉻꁧꃤꃅꉻꑫꌋꆀꎆꏓꁧꃤꃅꉻꑫꋈꄻꌠꄏꐓ。ꂴꄹꈎꀄꊭꐭꌺꎆꏂꑘꎆꏓꎆꊭꄉꀧꁌꍆꐪ2%ꄩꀋꐂꌠꃅꄷꌌꈁꁠꁵ。ꏃ(ꍏ、ꐎ)59ꂷꊋꁈꄏꄉꃹꅼꃅꉹꁌꀰꏢꌠꌋꆀꀄꊭꐭꌺꎆꏂꑘꎆꒉꎆꇁꁧꃤꃅꏓꇱꄺꀱꃅꉚꌠꃅ。ꉹꁌꀰꏢꎆꏂ꒧、ꐧꐭꎆꏂ꒧ꎝꁭꑠꑓꅐꎑꌤꃆꀞꄻꌠꄹꇙ。<br><br> ꎆꇱꌬꈧꈉꐨꍔꒉꌠꊥꎆ。ꋋꈓꌠꍏꑷꄐꌗꈐꎆꇱꎆꃀ5776ꂡꂷꇬꑟ，ꀋꉬꀋꉆꌠꆏꏦꀧꐨꐥꌠꀀꌒꋉꃆ、“ꌕꂿꑘ”ꋈꄻ、ꀉꒉꀊꂾꌠꅉꃀꉁꈾꋈꄻ、ꏀꀺꄹꇙꌋꆀꐛꉻꋊꄻ、ꐧꋦꌤꑘꌋꆀꐧꋦꏱꄻ、ꊋꀦꏎꏸꋦꈭꀧꌋꃅꌠꌋꆀꒆꉻꋦꈭꋈꄻꑠꁁꏯꇬꊋꁈꄏ。ꃅꄷꍔꃚꌐꐘꎝꊫꌐ21500ꂡꂷꀊꏀꃅꁦꎆ，2018ꈓ8000ꂡꂷꁦꎆ。ꃅꄷꍔꃚꌐꐘꎝꃆꊫꌐꏓꊭꎆꀨꌌꇎꏦꇬꄐꊒꌠꐘꃆꀉꒉꀊꂾꌠꎆꀨꃅꉆꌠꈌꁧꄉ，ꀋꉬꀋꉆꃅꋈꄻꌠꐘꃆꌋꆀꀋꇎꅉꅋꑣꌠꋉꃆꎆꀨꏦꀧꌠꄻꀉꇨ。ꃀꌠꀨꎹ、ꁠꉘ、ꑱꏲꑠꋥꁕꑱꈐꁧꃤꃅꑘꇗꏸꁌꈲꁵꌠꊋꃤꁦꎆꇱ，ꁱꀕꈩꆫꌬꈧꊇꁧꉀꐕꊐꐕꌠꄹꇙ。ꊋꁈꄏꄉꊋꀦꀊꏀꐕꍯꄹꌬ，ꊋꀦꀊꏀꄉꉻꑌꍯꀰꏢꌠꌌꎆꁥꇱ，ꃅꄷꄆꊐꅉꃀꉁꈾꌠꈁꁠꏿ。ꄆꌅꃼꇇꌤꃆꂿꑘꁡꇤꃹꌠꏓꇱꌶꀠꃄꄻ，ꇩꏤꊐꌠꌢꎭꑤꉱꑷꈴꌠꃅꇫꑟ。ꂿꑘꅐꇐꇲꁵꃬꏣꉻꑫꋈꄻꌠꏭꎆꁥꇱ，ꀋꉬꀋꉆꌠꆏꂿꑘꅐꇐꒃꅐꈭꐨꃷꇐꈴꀞꄻꉁꈾꋈꄻꌠꌋꆀꂿꑘꅐꇐꐻꎵꎊꈴꀻꎆꌠꊋꁈꄏ。<br><br> ꇓꈓꇓꉈꃄꁕꋮꄮꃅꀻꎆꌠꊥꎆ。ꂿꑘꂿꑘꁡꇤꌌꂴꄉꀻꎆꌠꊋꁈꄏ，ꋠꃅꋈꄻꇇꀨꁥꇱꎆ671ꂡꂷꃑꁵ，ꎕꏦꀊꂥꌠꋠꃅꌋꆀꋠꃅꈲꒉꋈꄻꌠꇬꊋꁈꄏ。ꐳꃅꃮꉘꅐꑤꀉꒉꌠꌋꆀꃏꍏꃮꆅꄀꇗꇱꄉꈔꋏꁥꇱꎆꃀꃑꁵ，ꃮꎍꐽꃅꉘꇲꁵꌠꄉꀧꌠꊋꁈꄏ。ꀒꁨꋍꁘꃅꂿꑘꏸꐕꃻꄻꁥꁵꏱꁈꄻꐛꒆ。ꋙꅐꑤꀉꒉꌠꈁꁠꁵꊋꃤꀉꒉꃅꇱ。ꐛꏀꂿꑘꅐꑘꐛꅉꌋꆀꂿꑘꅐꑘꀉꇨꌠꍔꋈꄻꌠꊋꁈꄏ，ꂿꑘꁡꇤꅐꑘꋍꑍꌕꉹꌠꃹꅼꃅꐮꉔꌠꊥꎆ。ꂿꑘꁡꇤꅝꒉꋉꃆꄺꂡꀨꎹꌫꎆꄻꍏꑷꏱꎆꄏꐓꈍꈐꇬꇱꄉ，ꀋꉬꀋꉆꌠꆏꈯꄔꁮꐚꃅꄷꏭꁥꇱꎆꁵ。ꃹꅼꃅꂿꑘꁡꇤꊿꀀꋦꈭꏱꄻꌕꈎꃅꐨꃄꌬ。ꏱꎆꇗꏸꄏꐓꏱꁈꎥꃪꅐꇁ，ꃄꁕꄐꇐꏤꁈꀉꒉꀊꂾꌠꃄꌬꌠꄹꇙ。ꊼꇅꀉꒉꃅꍏꑷꃅꄷꏭꆹꏮꁵꄻꌠꄉꈁꁦꎆ，ꄷꀋꁧꀋꉬꀋꉆꌠꆏꈯꄔꁮꐚꁁꏯꌋꆀꌢꎭꃅꄷꏭꉜꄉꎎ，ꀒꁨꋍꁘꃅꃄꁕꇢꊭꇬꅉꀨꄉꉻꁧꃤꃅꐽꏡꈴꌠꑟꐨꊐꐕ。ꊋꁈꄏꄉꇝꂱꀉꆹꃅꄷ、ꊿꋅꃅꄷ、ꃅꋮꃅꄷ、ꌢꎭꃅꄷꐳꃅꀻꎆ。<br><br> ꎍꐽꃅꅉꀨꉹꁌꐥꐨꏦꀧꑞꅉꉀꐕ。ꃅꅍꊌꌠꍔꐯꌠꊥꎆ。ꃅꅍꊌꌠꂴꄉꌠꏱꁈꃄꌬꌠꊋꁈꄏ，ꍏꑷꏱꎆꃅꅍꊌꁥꇱꎆꃀꌫꎆ539ꂡꂷ，14.9%ꉀꎆ。ꃅꅍꀋꊌꄜꏂꀧꎆꀨꂫꋒꌠꇬ1000ꂡꂷꌌꄉꃅꑘꇮꇐꄐꊋꉀꐕꌠꊋꁈꄏ，ꐳꃅꋍꑞꋍꑵꇮꇐꄐꅍꌧꊿꉘꉚ。ꃅꑘꇮꇐꊐꐕꌠꌋꆀꃅꈉꆹꏮꃅꑘꆹꏮꁰꍋꌠ1500ꃪꑼꃢꄩꐂ。ꑴꌅꃅꃅꅍꊌꎞꆏꂽꑼꌋꆀꊿꁥꀋꉬꀋꉆꌠꑘꀺꌠꃅꅍꊌꇗꏸꃷꁨꀁꋌꊨꐨꉀꐕ，ꏱꁈꈲꊌꌠꎆꏂꑘꈍꈐꍔꒉ。ꐪꊛꄉꏱꎆꂘꑘꇬꎆꁦꎆꃅꇱ。ꇓꈓꇓꉈꋍꃱꃅ、ꀋꉬꀋꉆꌠꆏꂿꑘꁡꇤꉬꌠꋭꑘꂘꑘꌫꎆꏦꀧꉺꏦꄻꈫꈈ，ꌷꂾꂘꑘ、ꃅꑘꂘ꒧、ꀊꂥꊐꌠꂘꑘꀻꎆꌠꊥꎆ。ꇩꏤꑭꊂꇓꈓꇓꉈꋭꑘꂘ꒧ꊬꌠꇬꌶꌺ1.5ꂡꀋꇈꌶꁌꋲꑞꁌꇤꇧꎭꄷꀋꁧꂘꅍꄯꒉꁌꀋꁵꌠꊌꅜ，ꑱꈐꎆꏣꊋꋠꌠꌶꌺ1900ꃪꑼꐥꐨꁥꇱꎆꊌ，1400ꃪꇓꈓꄉꇮꃅꇁꌠꂿ꒧ꊿꐊꇁꌠꌺꇖꄚꃆꂮꐥꌠꂘꑘꌫꁌꄻꐯꇯꉆꌠꃅꇫꑟ，ꂿꑘꁡꇤꋭꑘꂘ꒧ꊬꌠꇬꌶꌺ3700ꃪꑼꈲꋌꅝꅍꁥꇱꌠꊌꅜ。ꐧꊐꌠꃅꑘꂘ꒧ꇩꏤꈁꁠꎆꄻꐛ，ꃅꑘꂘ꒧ꀊꂥꊐꌠꌷꉔꈁꁠꇇꀨꎆꉱꑷꐨꍔꒉ、ꇇꀨꎕꏦꉀꐕ，ꃅꑘꂘ꒧ꌶꅉꀊꂥꊐꌠ100ꃪꑼꍔꒉꃅꊙꎹꌠꁻꌐꁣꀋꐥꃅꃅꌐꌠꊋꁈꄏ。ꃀꌠꀨꎹꏦꀧꑞꅉꉀꐕ。ꅉꀨꃀꌠꀨꎹꄜꏂꀧꄹꏦꄺꀱꌠꌋꆀꄻꐛꒆꌠꉻꄜꄐꉻꄻꅐꇁ，ꃀꌠꀨꎹꄜꏂꀧꌜꊐꌠꏓꇲꌠꄹꎆ。ꃀꌠꀨꎹꄜꏂꀧꎆꀨꍏꑷꋊꄻꍆꁧꉀꐕꅷ3.5%ꇬꑟ，ꈯꄔꁮꐚꃅꄷꌋꆀꇮꑘꀉꆹꐛꅉꌜ22ꂷꌠꋋꈓꇬ1512ꂡꂷꈲꊌ。ꏟꈯꃅꇩꁨꎆꀨꄹꁆꁵꏮꌊꐧꋦꏦꀧꎆꀨꇬꇱꌤꃅꌠꄹꎆ。ꎆꏂꑘꌋꆀꌤꏲꅉꌤꑘꌤꃅꅉꎞꆏꊿꅉꀨꃀꌠꀨꎹꎆꎕꏦꉀꐕ，ꐽꏡꉀꎆꐨ5%ꀋꇈꐥ。ꋬꂻꍏꇩꋈꄻꌠꄹꎆ。ꐊꑷꃅꇓꈓꇓꉈꋍꃱꃅꐙꌠꀀꊿꅉꀨꆅꉁꆄꄻꄜꏂꀧꄹꏦꄻꐛꌠꄹꇙ，ꀀꊿꆅꉁꆄꄻꄜꏂꀧꊿꂷꐽꏡꏱꎆꁥꁵꎕꏦ30ꂷꁦꎆ。ꆄꈻꂿꀋꋻꌠꁬꋌꑠꁌꎆꇗꏸꊨꏆꏱꁈꏤꄻꅐꇁ，ꌦꍑꊋꀊꂥꌠꌋꆀꎬꐚꍂꆅꆅꉚꁬꋌꌬꌠꌌꆅꉁꄜꏂꀧꄉꌗꋊꅉꇱ、ꊿ3ꂡꎖꑹꇬꉱꑷꌠꊋꁈꄏ。ꉹꁌꐥꐨꏱꁈꂫꀧꀉꇨꈴ。ꐪꊛꄉꇓꈓꇓꉈꀁꂥꀧꑠꐧꋦꈭꋏꇇꀨꑟꐨꌋꆀꂴꄉꀨꎹꊜꀠꑠꊿꈧꌠꏭꁥꁵꎕꏦꉀꐕ，ꎞꆏꂽꑼꐧꋦꄜꏂꀧꌠꐥꍂꃅꄉꀧꑠꊋꐨꂥꀘꏱꁈꏤꄻꅐꇁ。ꅉꀨꀀꑳꏦꀧꊋꃤꀉꒉꃅꇱ。ꑲꆹꇣꆹꋈꄻꌠꊋꁈꄏꄉ316ꃪꂷꄺꀱꋈꇬ，ꄉꉣꄻꈁꁱꄉꌠꌢꎭꑱꁯꑠꇖꉹꂿꑘꁡꇤꑲꎓꇣꐡꄺꀱꌠ135.5ꃪꁯꐥ，ꃅꄷ27ꈚꇬꆏꀀꁕꀉꆹ352ꃪꁯ、3.2ꂡꐽꎏꂰꄺꀱ。ꍏꑷꏱꎆꀀꑳꊤꄻꃷꎏꀻꎆꊋꁈꄏꌠꃅꉚ。ꁱꀕꈯꎟꌤꑘꀻꎆꌠꄹꇙ。ꍏꑷꃅꄷꇇꀨꄉꄉꉻꁱꀕꁧꃤꃅꉻꑫꋈꄻꌠꌐꐘꎆꀨ147ꂡꂷꌫꅐ，14%ꉀꎆ。ꍏꉸꋊꃅꁱꀕꉾꃪꌠꊪꊛꀻꎆꌠꊋꁈꄏ，ꊋꀥꇱꄉꁱꀕꍸꇐꀧꌋꃅ。<br><br> ꃹꅼꃅꏱꎆꇗꏸꏦꉻꄺꀱꌠꄹꎆ。ꀒꁨꋍꁘꃅꍏꑷꌋꆀꃅꄷꏱꎆꐮꃆꂮꎵꃪ。ꏣꀋꑌꃅꏲꄸꇬꍏꑷꌋꆀꃅꄷꏱꎆꌤꃆꌅꈌꌋꆀꌫꎆꃅꎁꁷꄻꄺꀱꌠꄹꎆ，ꂘꑘ、ꈆꑪꇮꇐ、ꈭꈜꎞꎭꑠꁁꏯꄺꀱꄐꉻꄻꅐꇁ。ꍏꑷꌋꆀꃅꄷꊌꐨꁷꄻꄺꀱꌠꄹꎆ，ꁌꎆꇗꏸ“ꉬꁆꁸꊌ”ꍆꁧꎍꐽꇬꎷ，ꁌꎆꇗꏸꊏꌊꇗꏸꀱꁵꃣꁧꁸꀵꉺꏦꋊꄻꐛꒆ，ꌬꈧꇗꏸꎳꄻꈭꊭꊁꎞꌠꊨꄅꄷꀋꁧꎍꐽꃅꁸꃅꄷꁵ。ꄐꌗꏲꂠꄹꏦꄻꃪ。ꍔꃚꃤꃅꐙꌠꎆꀨꄐꌗꌠꌋꆀꎃꐚꄉꉻꄐꌗꌠꋍꃱꃅꄐꏤꌠꊋꀉꒉꃅꇱ，ꀒꁨꋍꁘꃅꍏꑷꇩꁨꎆꀨꀰꏢꄐꌗꃄꌬꈍꈐꍔꒉ。ꐊꑷꃅꄐꌗꃅꐨꇿꋌꏲꂠꌠꃄꌬ，ꃅꐨꇿꋌꌐꁧꌋꆀꎕꏦꉻꑫꄻꐛꒆ，ꐪꊛꄉꀋꉬꀋꉆꌠꃅꐨꇿꋌꉉꍣꈍꈐꍔꐯ，ꈋꍣꊌꐨꌫꄻꌠꊋꀥꇱ。ꐪꊛꄉꇩꎝꏲꂠꃷꎏꈴꄺꀱꌠꄹꎆ，ꇩꎝꅐꑫꏤꈉꐛꉻꉾꃪꈴ。ꍔꃚꏱꎆꅇꄜꏓꁱꃅꉚꈍꈐꍔꒉꅷꍏꑷꌤꏲꅉ40ꂷꌋꆀꃅꄷ36ꈚꇬꑟ。ꀒꁨꋍꁘꃅꃹꅼꃅꍔꃚꃻꄻꄹꏦꄺꀱ。ꐊꑷꃅꍔꃚꁧꃤꃅꃻꄻꏲꂠꌠꋊꍬꌋꆀꊋꀥꇱ。ꊋꇤꄉꇗꏸꄹꏦꄺꀱꌠꄹꎆ。ꁌꎆꇗꏸꄹꏦꄻꐛꒆ，ꏓꇱꌠꌋꆀꉹꁸꌠꏓꐯꇯꌠꊨꏦꊌꐨꇗꏸꄹꏦꀑꐱꃅꄻꐛ。ꅐꀦꇗꏸꏦꃤꆏꇩꏤꑭꊂꏓꄊꎮꊈꉼꍤꇖꉌꃹꈴꄉ，ꇓꈓꌋꃅꋈꄻꇗꏸꏦꃤ、ꋯꏤꇗꏸꏦꃤꄐꄉꌠꈭꎁꇬꈴꄉꄜꌊꇩꏤꑭꊂꏓꄊꎮꊈꉼꁳꉘꃀꃢꌠꍤꇖꎻ。ꋍꁘꋍꁘꃅꎍꐽ、ꐪꊛꉆꌠꃅꄷꇗꏸꉻꑫꄻꐛꒆꌠꎥꃪ。ꏣꀋꑌꃅꇩꁨꁨꇐꇩꁨꎆꏂꑘꄺꀱꌠꄹꇙ。ꇩꏤꑭꊂꏓꄊꎮꊈꉼꏭꇩꏤꑭꊂꇩꁨꁨꇐꏲꂠꏓꉻꐛꐨꅇꄜ。ꏣꀋꑌꃅꇩꁨꎆꀨꎆꇱ、ꀰꏢꇬꌦꏓꄻꌠꄹꇙ，ꍏꇩꇩꏤꎸꈜꏓꉻꑞꅉꐥꇬꌦ、ꍏꇩꒀꍔꉻꏑꑞꅉꐥꇬꌦꄹꏦꄺꀱꌠꄹꇙꄉꃅꌐ。ꀒꁨꋍꁘꃅꇩꁨꎆꒉꎆꇁꌠꎆꀨꏲꂠꏦꉻꎵꄻ。<br><br> ꀋꆏꃅꏱꎆꏲꂠꄐꐨꉀꐕ。ꊋꀉꒉꃅꇤꄉꄐꌗꃄꌬꌠꒃꉇꋒ。ꐳꃅꈎꀨꇬꄐꌗꌠꅇꀱ，ꐳꃅꆹꏮꁵꄻꄐꌗꌠꃑꀁꋌꎭ，ꃅꄷꍞꊥꄉꐳꃅꎆꀨꁷꑣꌊꑭꋧꐘꑘꇬꑟ，ꏛꃅꎆꃀꈲꁧꌋꆀꏱꁈꂿꄐꋊꇤꅐꇁ。ꑖꑟꃅꄐꌗꃄꌬꁨꎆꐨꊂꈹ，ꊋꀥꇱꄉꄐꌗꃄꌬꌠꎥꃪ，ꏎꏸꄎꌠꆏꏎꏸꌠꏥꏦꇬꈴꄉ，ꈎꂫꂾꌌꁆꄻꀱꀋꉆꌠꌫꎆꏎꏸꎼꇁ，ꏟꈯꃅꈎꂫꇬ“ꄳꑣꏽꄉꎆꌬ”ꌠꄴꏮ。ꃅꄷꄐꇺꄉꃶꐚꐛꐨꇬꈴꄉ，ꏦꃤꇬꈴꄉꄐꌗꋊꄻꌤꃅꋒ。ꏱꎆꏲꂠꅉꃀꌤꃅꌠꀥꇱ。ꄐꌗꏲꂠꋍꉻꈴꉻꑫꋈꄻꌠꄹꎆ，ꇩꏤꑭꊂꋍꃱꃅꄐꌗꏲꂠꋊꍬꌠꌋꆀꇮꇐꎕꏦꉻꑫꏓꐛꌠꄹꇙ。ꇩꎆꊐꑳꏓꋧꎆꁵꎆꀨꇘꄟꍞꋏꌠꀉꇨꈴ，ꀑꐱꃅꈁꐥꊐꌠꏱꎆꄐꌗꃄꌬꇘꄟꍞꋏꉻꑫꉱꑷꌠꄻꐛ。ꏦꃤꇬꈴꄉꏓꄊꄐꌗꌠꁳꍞꊟꎻ。ꇩꏤꑭꊂꏓꄊꌋꆀꋍꎮꊈꉼꄚꃆꂮꐥꌠꄐꌗꏤꐪꃄꌬꇫꑟ，ꀋꎪꃅꌤꃆꑭꋧꌠꂥꀘꌠꌋꆀꎴꈲꉺꏦꋈꄻꌠꋍꋓꃅꄹꎆ，ꐳꃅꇩꏤꑭꊂꏓꄊꎮꊈꉼꏭꍤꌗꅐꇁꌠꌤꃆꑓꅐꎑꌠꄺꀱꃆꂮꄛꇰ。ꏣꀋꑌꃅꏓꄊꐊꄉꄐꌗꍤꄻꌤꃅ。ꏣꀋꑌꃅꏓꄊꁧꎁꏭꄐꌗꁰꄻꌤꃅꃆꂮꅇꄜ，ꀋꆏꃅꄐꌗꁰꄻꌤꃅꌠꄻꃪ。ꊋꀥꇱꄉꏓꄊꁧꎁꌋꆀꐮꈴꐮꑌꑲ，ꋒꐯꋒꃅꉜꐨꇖꐨꅱꄻ，ꇇꈤꃅꇫꉈꇬꌠꅇꏮ。<br><br> ꀑꐱꃅꉜꇬ，2019ꈎꄐꌗꃄꌬꐛꐨꊼꇅꉾ，ꏱꎆꄺꀱꀻꎆꌠꋍꑞꋍꐘꌤꃅꌠꏣꀋꑌꃅꑌꎆꆹꄉ，ꎆꏣꐪꊛꄉꐛꒆꃅꀻꎆꌠꌋꆀꐧꋦꐮꄮꑘꒃꌠꎁꃅꏦꀧꅍꊋꑌꌠꇲꁵꀐ。ꋋꆹꐋꀨꑮꏣꀻꈯꄜꃅꄉꌠꄈꍏꑷꏟꈯꃅꏃꂠꌠꊌꐨꉬ，ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꈆꑪꃅꄐꂘꌠꊌꐨꉬ，ꇩꏤꑭꊂꏓꄊ、ꇩꏤꑭꊂꍔꑠꌋꆀꁧꎁꊈꑼꈧꌠꍞꊟꄐꇺꌠꊌꐨꉬ，ꃅꄷꈧꌠ、ꌤꃅꅉꈧꌠꌋꆀꇩꏤꑭꊂꊿꋅꈀꐥꌠꏓꂱꐯꇯꊋꇤꌠꊌꐨꉬ。<br><br> ꋍꈭꐨ，ꄐꌗꃄꌬꌠꌋꆀꏱꎆꌤꃅꌠꇬꌤꃆꌋꆀꊋꋠꐨꈨꊝꎍꑴꌦ。ꀋꉬꀋꉆꌠꆏ：ꃅꄷꋍꈨꋋꈨꇬꅉꂫꊐꌠꏱꎆꊌꌬꐮꄙꐨꀊꅰꃅꃛꇁ，“ꌕꀧ”ꍅꊋꀉꒉ。ꋍꈨꁁꏯꌫꎆꄃꐛꌠꐛꄟꄡꇗꐥꑴꌦ，ꎆꀨꋍꈨꌌꌬꌠꑘꅐꐨꀊꂥꃅꀋꐛ。ꄐꌗꃅꐨꁻꌐꏤꄻꌊꈆꑪꃅꀋꐛꑴꌦ，ꃅꐨꇿꋌꊨꏦꈋꍣꌠꆹꎃꊒꃅꀋꐛꑴꌦ，ꃅꐨꇿꋌꊌꐨꃄꌬꌠꆹꉈꑴꀉꇨꃅꃄꄻꅐꑴꌦ。ꃅꄷꍔꃚꎝꃆꀵꃤꊼꇅꀉꇖ，ꂁꀀꎝꃆꃨꆰꐨꆏꉜꀋꁨꀋꉆ。ꉪꊇꆏꀊꂥꃅꌤꃆꋋꈨꉜꁨꄉ，ꏣꀋꑌꃅꏁꁈꏁꌬꄉꌌꂥꀘꇧꎭꂿ。<br><br> ꁧꎁꊈ：<br><br> ꎼꈎꅑꅸꇁꌠ，ꋋꇅꃅꅐꇁꌠꏀꉹꌀꌡꋍ꒜ꆅꇵꆅꐯꇳꐨꆹꉪꇩꏤꎆꏣꐧꋦꀻꎆꌠꇬꋌ꒜ꑠꐥꀋꋻꃅꎟꄜ。ꄈꍏꑷꆏꇵꆅꄴꏮꋎꍅꌠꌌꌤꀉꒉꀊꂾꌠꃅꄉꒃꉇ，ꑮꏣꀻꊝꎻꏹꑭꄑꄉꄐꇺ、ꑭꄑꄉꄐꁆ，ꀋꎪꃅꏓꂱꀑꇬꋬꂻꌠꌋꆀꇭꀧꈯꄿꉾꃪꌠꌌꀨꇬꄉ，ꄈꑭꊂꂽꑭꊂꇩꏤꑭꊂꊿꋅꈁꐥꌠꏓꂱꏃꂠꌌꇵꆅꐯꇳꐨꄴꏮꋎꍅꌠꏓꂱꉈꈽ、ꉻꄜꉈꈽ、ꐏꄙꉈꈽꌠꃅꋒ。ꎭꏿꅦꈠꃅꊋꇤꇈ，ꃶꉴꐏꁇꉈꈽ、ꃛꀙꐏꁇꉈꈽꌠꊌꐨꏤꄻꐨꃅꐙꌠꊌꅜ， ꇵꆅꐯꇳꐨꄴꏮꋎꍅꌠꆏꄐꇐꊌꐨꀉꒉꀊꂾꌠꊌꅜ，ꏓꇲꄉꇵꆅꐯꇳꐨꄴꏮꋏꆸꌠꌋꆀꎆꏣꐧꋦꀻꎆꌤꃅꌠꄹꎆꌠꊌꐨꈲꁧꏣꀋꑌꌠꊌꅜ。<br><br> ꎆꏲꌤꏲꅉꆏꎔꎗꃅꄈꍏꑷ、ꇩꃷꑼꁈꏤꄐꁆꌠꃄꌬꇫꑟ，ꉌꊋꑌꈬ、ꆲꁏꉐꐙꃅꐮꐊ、ꈆꑪꃅꄴꏮ、ꊒꌸꌠꏁꁈꏂꌠꇖꐨꇬꈴꄉ， ꇵꆅꐯꇳꐨꄴꏮꎆꀨꏦꀧꌠꄻꀉꇨ，ꊿꆅꉃꄻꁌꀵꃤꊨꒊ、ꇵꆅꐯꇳꐨꄴꄻꊿꊌꐨꉀꐕ、ꇵꆅꐯꇳꐨꄴꋏꎊꈬꇲꁵꌠꏦꀧ、ꐳꃅꆅꁿꋌꌋꆀꁬꋌꎥꃑꑠꇬꆼꒆꄉꏱꎆꇗꏸꄏꐓꏱꁈꋍꋬꈭꌠꄻꅐꇁ，ꊋꈀꑌꃅꇤꄉꇵꆅꐯꇳꐨꄴꋏꉈꈽꌠꊋꁈꄏ。ꅑꅸ4ꆪꂫꇬꑟꇬ，ꈁꐥꊐꌠꏱꎆꐯꇯꇵꆅꐯꇳꐨꄴꏮꋎꍅꎆꃀ1499ꂡꂷꄐꁆꄉ，ꏓꂱꉹꁌꌫꁌꐒꊀꄉꉃꄻꀋꀬꄻꀋꅐꌠꄉꀧ，ꃅꄷꈧꌠꎆꀨꌤꃆꒉꄸꃅꆅꉁꈭꋏꌠꌋꆀꇵꆅꐯꇳꐨꄴꏮꋎꍅꌠꇬꁧꀋꏖꌠꄉꀧ。<br><br> ꇵꆅꐯꇳꐨꄴꏮꃆꂮꐥꌠꌤꃅꌠꒃꉇꋒꈭꐨ，ꋍꊭꃅꐙꌠꎆꏂꑘꇇꀨꃅꈉꎍꐽꉱꄏꑠꏱꎆꇗꏸꏱꁈꈨꃄꌬ，ꎆꏂꑘꊋꄏꄉꊋꋠꐨꂥꀘꌋꆀꀻꎆ，ꊱꁨꃅꃄꀱꄺꀱꌠꄹꇙ，ꐳꃅꒃꅐꐥꐨꐥꀹꀱꐛꅉꐛ。ꁸꌕꁥꃅꏛꃅ2020ꈎꀊꏀꃅꁦꎆꄉꌠꎝꃆꑞꅉꐥꃷꁨ28480ꂡꂷꃑꀁꋌꎭ，ꎃꐚꎝꃆꑞꅉꐥꃷꁨ5580ꂡꂷꌋꆀꌐꐘꎝꃆꑞꅉꐥꃷꁨ22900ꂡꂷꇫꐊ，ꐘꃆꀋꉬꀋꉆꌠꀉꑌ、ꐔꈔꉆꐨꀁꂥ、ꇿꋌꐥꃅꎆꇱꈺꇙꂿꄐꀉꒉꃅꐥꌠꃅꄷꏭꉜꄉꎎ，ꐳꃅꐘꑘꀉꒉꀊꂾꌠꌋꆀꉹꁌꐥꐨꋉꃆꀉꒉꀊꂾꌠꋈꄻ，ꏛꃅꐥꇐꌤꃅꃷꁨꏓꐛꌠꄹꇙ，ꎆꏣꉀꎆꌠꈺꇙ。3ꆪ1ꑍꅑ6ꆪꂫꇬꑟꌠ，ꋍꊭꃅꐙꌠꃅꄷꏱꎆꎆꃀꊏꄉꌬꍆꁧꉐꊮꌺ5ꂷꉀꐕ，ꁦꎆꌠꊏꄉꌬꎆꃀꀊꏀ1100ꂡꂷ，ꉬꇮꃅꊏꑤꊐꌠꁳꌬꎻ，ꊋꑌꃅꅉꂫꊐꌠꏱꎆꎍꐽꃅꒈꇁꌠꏦꀧ。<br><br> <b><center>ꑍ、2020ꈎꍏꑷꌋꆀꃅꄷꄐꌗꄐꄉꌠ</center></b><br><br> 2020ꈎꆹꐊꑷꃅꊼꇅꌣꈚꌠꐧꋦꋉꐛꌠꌋꆀ“ꊯꌕꉬ”ꄐꎖꂫꍅꈒꌠꉬ，ꎭꑆꇔꈢꇓꀖꌠꃛꌉꂫꋓꊋꐛꈒꌠꑌꉬ，ꄐꌗꁰꄻꌠꌋꆀꏱꎆꌤꃅꋒꇬꈻꇐꀉꒉꀊꂾꃅꐥ。ꄈꍏꑷ、ꇩꃷꑼꄐꇺꇖꐨꇬꈴꄉ，ꏓꇲꄉꇵꆅꐯꇳꐨꄴꏮꋏꆸꌠꌋꆀꎆꏣꐧꋦꀻꎆꌤꃅꌠꄹꎆ，ꈆꑪꃅꏱꎆꃅꒊꃅꇁꎥꇽ，ꋭꋽꃅꏱꎆꄐꌗꌠꁰꄻ，ꉻꑫꃅꏱꎆꌤꃅꌠꄐꎖ，ꂫꋓꊋꐛꃅꎭꑆꇔꈢꇓꀖꌠꑞꅉꁻꌐꂿꃆꃅꌐꌠꄉꀧ，ꐊꑷꃅꊼꇅꌣꈚꌠꐧꋦꋉꐛ。<br><br> (ꋍ)2020ꈎꏱꎆꊌꌬꃅꒊꃅꇁꎥꃪ。<br><br> ꀋꃋꋋꇅꇬ，ꅉꆺꑭꊂꃅꇵꆅꐯꇳꐨꇱꎟꑣꄉ，ꋧꃅꎆꏣꀉꇨꃅꀁꋌꊰ，ꅐꑘꊛꇺꇲꇺꀰꏮꌠꇬꋍꇈ，ꇩꏹꃼꇇꎆꇱꌠꍕꒊ，ꃷꇐꀉꒉꌠꃷꎏꇙꈧ。ꇩꈐꌬꈧ、ꎆꇱ、ꉇꅐꀁꋌꉔ，ꃅꑘꊌꍅꊋꄇꇖꀕꃅꀉꒉ，ꎆꏂꑘꈜꀕꇈꉹꁌꀰꏢꎆꏂ꒧、ꐧꀠꀄꊭꐭꌺꎆꏂꑘꊋꋠꌠꑓꅐꇁ，ꏱꎆꊌꌬꐮꄙꐨꀊꅰꃅꃛꇁ，ꏱꎆꒈꇁꍅꊋꁦꎆ。<br><br> ꏱꎆꊌꎆꇬꄉꉜꇬ，ꇵꆅꐯꇳꐨꇱꎟꄜ、ꇗꏸꊨꁌꊰꑠꐊꊈꇱꁧꏖꄉ，ꎼꈎ1—4ꆪꏱꎆꊌꎆ14.5%ꀁꋌꊰ，ꄚꈐꏭ1ꆪꇬ3.9%ꀁꋌꊰ，2ꆪꇬ21.4%ꀁꋌꊰ，3ꆪꇬ26.1%ꀁꋌꊰ，4ꆪꇬ15%ꀁꋌꊰ，ꀁꋌꒊꌊꋍꄮꐰꇬꑟꈭꐨꆏꋍꁮꆪꋍꁮꆪꃅꍔꒉꈭꐨꆏꀄꊭꇁꌠꐛꐪꇫꅐꇁ。ꎼꈎꊁꈍꑍꁮꆪꌠꇬ，ꒃꅐꐥꐨꐥꀹꀱꐛꅉꐛꌠꇬꐊꄉ，ꏱꎆꊌꎆꎍꐽꃅꉀꐕꇁꏭꐛ，ꄚꄡꇗꊨꀋꄅꐨꊼꇅꀉꒉꑴꌦ。ꎃꐚꋍꏅꄐꌗꊌꎆꆏꑍꄮꐰꇬꉀꀋꎆꇁꏭꐛ，ꊁꈎꁂꌠꇬꆏꉀꎆꌠꀱꐛꅉꐛꇁꄷꀋꁧꂴꈎꁂꌠꇬꊌꐨꊨꒊꌠꇬꁥꇱꌠꇫꅐꇁꉆ。<br><br> ꏱꎆꌫꎆꇬꄉꉜꇬ，ꏓꇲꄉꇵꆅꐯꇳꐨꄴꏮꋎꍅꌠꌋꆀꎆꏣꐧꋦꀻꎆꌤꃅꌠꄹꎆ，ꊋꈀꑌꃅꇤꄉꃛꌉꏿꄉꎭꑆꇔꈢꇓꀖꌠꑞꅉꁻꌐꂿꃆꃅꌐꌠꏦꀧ、ꐊꑷꃅꊼꇅꌣꈚꌠꐧꋦꋉꐛꇬ，ꏱꎆꌫꎆꄡꇗꊼꇅꀉꇨꌠꄉꀧ，ꈜꀕꇈꏱꎆꈁꐥꊐꌠꆏꇵꆅꐯꇳꐨꄴꏮꋎꍅꌠꎁꃅꎆꀨꀉꑌꃅꇱ，“ꃘꀧ”ꂿꃆꃅꇫꑟ、ꇗꏸꊨꁌꊰꌠꑌꎆꊋꄘꄏꌠꈉ，ꃅꄷꋍꈨꇬꋍꊭꐨꐥꃅꐧꋦꄜꏂꀧꁌꊨꏆꄉꎆꀨꌌꏱꎆꄻꅐꃅꀥꋍꇱꄻꅐ。<br><br> ꀋꃋꌋꆀꋌꊂꋍꊭꇬ，ꉪꇩꏤꀻꎆꌠꇬꊝꇁꌠꃨꆰꐨꋓꎭꐨꆹꋌ꒜ꑠꐥꀋꋻ，ꄚꉪꊇꆹꐋꀋꌡꌠꍔꍞꌋꆀꄹꏦꂱꎆꅑꐨ、ꎆꏣꅉꃀꀉꇨꌠ、ꃷꎏꊋꂫꀉꒉꐯꀉꒉꌠꐥ，ꄙꇁꃪꌠꏓꂱꈪꑌꀑꁮꐨꐥ。ꊒꆽꀕꃅꋓꎭꐨꏭꊝ，ꀻꎆꌠꉌꊋꑌꈬ，ꀻꎆꇙꊋꄻꀉꇨꀐꄷꆏ，ꀋꃋꋋꇅꇬꊋꋠꐨꆹꈍꃅꑌꈳꅐꇁꄎꌠ，ꍏꇩꀻꎆꌠꆹꉘꇉꐨꀉꇨꃅꐥꇁꌠꉬ。ꋋꆹꉪꊇꏱꎆꌤꃅꋒ、ꏱꎆꌅꊋꂿꄐꋊꇤꌠꅉ꒜ꈫꈈꌠꌋꆀꊫꁱꊋꃤꀉꇨꌠꉬ。<br><br> (ꑍ)2020ꈎꄐꌗꁰꄻꌠꌋꆀꏱꎆꌤꃅꌠꄐꇺꉪꇐꌋꆀꏥꏦ。<br><br> ꎼꈎꄐꌗꁰꄻꌠꌋꆀꏱꎆꌤꃅꌠꆏ，ꐋꀨꑮꏣꀻꈯꄜꃅꄉꌠꄈꍏꑷꀉꇨꃅꏲꂠꄉꌠꇂꃴꄉ，ꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꄐꇺꅍꃅꄉ，ꐊꑷꃅꄈꅿꃀꀉꒉꊯꈬꃢꌠꌋꆀꊯꈬꈭꑍꃢ、ꌕꃢ、ꇖꃢꐊꈴꃀꈿꉌꊈꃅꈴꌬꈴ，ꏟꈯꃅꄈꅿꅉꀨꌧꇗ、ꅉꀨꈛꏦ、ꅉꀨꄐꁈꃄꌬ，“ꇖꑵꉪꉻ”ꀉꇨꇱ、ꀋꎪꃅ“ꇖꑵꑴꑇ”、“ꑍꑵꀧꌋꃅ”ꌠꃅꇫꑟ，ꏟꈯꃅꐊꑷꃅꊼꇅꌣꈚꌠꐧꋦꋉꐛꌠꑞꅉꁻꌐꂿꃆꇬꆼꒆ，ꏓꇲꄉꇵꆅꐯꇳꐨꄴꏮꋏꆸꌠꌋꆀꎆꏣꐧꋦꀻꎆꌤꃅꌠꄹꎆ，ꇵꆅꐯꇳꐨꋌꐛꃅꐙꈴꌠꄴꏮꏱꄻꌠꇎꏦꇂꃴꄉ，ꎍꐽꌠꇬꄉꀒꁨꆹꌠꌤꃅꀑꐱꅉꃀꉉꈌꌭꈬꇬꎷ，ꀻꎆꉪꉻꀊꏀꌠꌭꈬ，ꇲꁵꁁꏯꐛꉻꃅꐙꌠꄺꀱꌠꌌꀨꑟꃅꄉꇬꎷ，ꏟꈯꃅꄺꀱꁉꃑꌠꌌꇘꊋꃅꄉꊇꁧꀊꂥꃅꀻꎆꌠꄹꇙꇬꎷ，ꏟꈯꃅꈢꇓꀖꀉꒉꌕꐘꌠꃅꋒ，“ꃘꎍꐽ”ꌤꃅꊋꃤꀉꒉꃅꇱ，ꀀꊿꃅꅍꊌꌠꄉꀧ、ꅉꀨꉹꁌꐥꐨꄉꀧ、ꃷꎏꀨꄜꄉꀧ、ꋚꂷꅐꀦꉮꀋꐥꌠꄉꀧ、ꅐꑘꊛꏣꇲꁵꎍꐽꌠꄉꀧ、ꅉꂫꊐꌠꏮꈴꌠꄉꀧ，ꏟꈯꃅꈏꇓꈉꐨꍔꐯꌠꄐꇐꏤꁈꃄꌬ，ꉻꒉꏱꁈꊋꃤꀊꅰꃅꀉꒉꌠꌌꄉꇵꆅꐯꇳꐨꁧꏖꌠꏭꊝ，ꏣꀋꑌꌠꏱꎆꏱꁈꆏꀊꅰꃅꏣꀋꑌꂿꄐꐥ，ꌫꁏꇔꐨꉀꐕ，ꆄꄙꐋꀋꌡꇩꎝꃑꄻ，ꃅꄷꍔꃚꌐꐘꎝꃆꊫꄳꁦꎆꇱ，ꌗꋧꏢꋧ、ꎆꃀꌌꀋꉬꀋꉆꅉꇬꌬꌠꌭꈬ，ꎆꃀꌫꄻꑘꅐꐨꉀꐕ，ꃶꐚꃅꎆꏣꎍꐽꌠꀋꂿ꒧ꂿꄐꋊꇤ，ꎆꏣꀻꎆꌠꌋꆀꐧꋦꎍꐽꌠꃅꇴꄉꉻꀉꒉꌠꀧꌋꃅ，ꃛꌉꏿꄉꎭꑆꇔꈢꇓꀖꌠꑞꅉꁻꌐꂿꃆꃅꌐꌠꄉꀧ，ꐊꑷꃅꊼꇅꌣꈚꌠꐧꋦꋈꄻꐛ。<br><br> ꄚꉎꉉꌠꄐꇺꉪꇐꃄꌬꇬ，ꀋꉬꀋꉆꌠꆏꄚꊁꏥꏦꋋꈨꒃꉇꋒꌶ：ꋍꆏꎬꅧꃅꉈꈽ、ꈪꑌꃅꏎꏸ。ꏟꈯꃅꍔꃚꃶꐚꃅꏎꏸꄉꐥꌠꇖꐨꃄꌬꇫꑟ，ꇁꀦꀺꅐꀦꏏ、ꁦꎆꊌꏏꄉꌬ、ꌗꋧꏢꋧ，ꀋꆠꀋꄶꇬꎷ、ꉋꇷꊂꄡꈹ，ꀉꇨꃅꏎꏸꄉꌤꈁꐥꌠꀞ。ꑍꆏꊌꎆꉜꄉꌫꎆꏤ、ꊇꁧꉀꐕꇿꋌꁦꎆ。ꑞꉬꌠꑞꃅꄉꊌꐨꄐꌗꏓꁱ，ꏱꎆꊌꐨꊇꁧꉀꐕ。ꀋꎪꃅꊌꐨꎖꄉꌬ、ꀧꐥꍅꐥ、ꍅꉆꆏꍅꇬꎷ，ꅉꀨꃷꁨꉪꉻꌋꆀꌬꐨꄃꐛꐛꉻꅥꁖ。ꌕꆏꊋꀥꇱꄉꏲꂠ、ꏦꇨꃅꍬꏦꍬ。ꀋꎪꃅꂴꄐꌗꊁꌫꅐꌠꌭꈬ，ꏦꇨꃅꄐꌗꁦꎆꇱꌤꐘꋎꍅ。ꏦꇨꃅꎆꐪꆿꂷꏦꃤꏦꇗꌋꆀꄹꏦꏤꐪꇬꍬ，ꎆꐪꎆꏣꍬꏦꇬꆼꁏꌠꏭꆏ，ꏦꇨꃅꃅꎁꅑꑘꎹ。ꇖꆏꐰꉎꏓꇙ、ꉌꂵꋍꂷꃅꊋꇤ。ꇩꏤꑭꊂ“ꋍꃱꃅ”ꌠꉪꇐꀉꇨꈴ，ꍏꑷꌋꆀꃅꄷꋮꐊꌠꊋꀥꇱ，ꇵꆅꐯꇳꐨꄜꎟꌠꏭꊝ、ꏱꎆꇗꏸꄺꀱꄐꇺꌠꃅꇫꑟ、ꏱꎆꊌꌬꏱꄻꌠꀉꇨꇱ、ꏱꎆꐪꊛꉆꐨꌋꆀꎆꏣꐧꋦꀻꎆꊋꂫꀉꇨꇱꑠꁁꏯꇬꏓꊋꀉꇨꐯꀉꇨꌠꐛ。<br><br> (ꌕ)2020ꈎꏱꎆꏱꁈꌋꆀꏱꎆꌤꃅꌠ。<br><br> 2020ꈎꏣꀋꑌꌠꏱꎆꏱꁈꆹꀊꅰꃅꏣꀋꑌꂿꄐꐥꌶ，“ꃘꎍꐽ”ꌤꃅꋒ、“ꃘꄉꀧ”ꂿꃆꃅꇫꑟꌠꇬꆼꒆꄉ，ꏱꁈꊋꃤꀊꅰꃅꀉꒉꌠꌌꄉꇵꆅꐯꇳꐨꁧꏖꌠꏭꊝ，ꇯꍝꃅꎆꏣꎍꐽꌠꂿꄐꀋꉬꀋꉆꌠꋊꇤ。2020ꈎꏱꎆꏱꁈꀋꉬꀋꉆꌠꆏꋋꈨꇫꐊ：<br><br> ꋍꆏꇗꏸꊨꁌꊰꌠꇬꊋꀉꒉꃅꇱ。ꊨꊭꃅꐙꌠꏱꁈꄻꀉꇨ，ꄹꏦꃅꐙꌠꄐꁆꌠꌋꆀꏓꐯꇯ，ꀋꉬꀋꉆꌠꆏꐧꐭꎆꏂꑘ、ꑱꄂꇮꃅꃼꇇꃅꊿꌋꆀꊋꋠꌠꉹꑘꎆꏂꑘꇗꏸꃣꁧꊨꑾꌙ。ꂴꊬꌠꇬꄻꅐꇁꌠ6ꆪꂾꏤꈉꑟꌠꀋꉬꀋꉆꌠꇗꏸꊨꁌꊰꌠꏱꁈ，ꃄꌬꏤꈉꄯꌊꎼꈎꈎꂫꇬꑟ，ꃷꎏꀨꄜꊋꋠꐨꂥꀘꀻꎆꌠꇬꊋꁈꄏ，ꊋꇤꄉꎆꏂꑘꃅꅍꊌꌠꄉꀧ。ꋋꈓꇬꃷꎏꀨꄜꎁꃅꀊꏀꃅꁦꎆꇁꌠꀵꃤꊨꐨ2.5ꃪꂡꂷꇬꐂꏭꐛ。<br><br> ꑍꆏꍬꈜꀉꑌꃅꎆꀨꏓꊭ。ꐋꀋꌡꊬꌠꇬꏁꁈꐋꀋꌡꌠꏁꌬ，ꌫꁏꇔꐨ2.8%ꇬꄉꉀꐕꅷ3.6%ꈋꉐꑟ，ꏱꎆꌫꁏꇔꄉꈁꀋꉊꄻꈎꄩ1ꃪꂡꂷꁦꎆ，ꏣꀋꑌꃅꇵꆅꐯꇳꐨꄜꎟꄉꊌꎆꊨꒊꌫꎆꁦꎆꌠꁧꏖꐨꏭꊝ，ꃷꎏꉌꊋꄻꑘꒃꄷꀋꁧꄖꄑ。ꋍꈭꐨꆅꄙꐋꀋꌡꇩꎝ1ꃪꂡꂷꃑꄻ。ꋍꑞꋍꉹꂫꏮꎆꃀꌬꈧꌠꊋꀉꒉꃅꇱ，ꊋꇤꄉꎆꊋꌬꉆꐨꁦꎆ，ꏱꎆꊌꎆꊨꒊꌫꎆꁦꎆꌠꇬꅋꑣ。<br><br> ꌕꆏꌫꎆꐛꉻꋊꄻꉾꃪ。ꅉꀨꉹꁌꐥꐨꌫꎆꁧꀉꄂꎆꉆꀁꋌꀋꊨ，ꀋꉬꀋꉆꁁꏯꌫꎆꆏꃶꐚꃅꏦꀧ，ꎂꀕꃅꐙꌠꌫꎆꀋꎪꃅꊨꒊ，ꍔꃚꌬꌠꑲꇤꀊꏀꃅꋈꄻꌠꏢꑲ，ꁧꈿꆿꈿꌠꏢꑲ。ꍏꑷꍔꃚꌤꏲꅉꂴꅑꄉꏎꏸꄉꐥ，ꍏꑷꋋꊐꌠꌫꎆ0.2%ꀁꋌꊰ，ꄚꈐꏭꃛꊸꃅꀋꐛꀋꉬꀋꉆꃅꀋꐛꌠꌫꎆ50%ꈋꉐꊨꒊ。ꃅꄷꏱꎆꑌꄡꇗꊋꒉꃅꎃꐚꃅꐙꌠꌫꎆꊨꍅ，ꐪꊛꄉ“ꌕꉻ”ꌫꎆꊨꒊ，ꏦꇨꃅꃀꈿꌤꀞꆿꀞ、ꅲꇫꁰꍋ、ꈋꍣꃀꈿꑠꌫꎆꋎꍅ。ꋍꑞꋍꉹꂫꋒ、ꉱꑘꎆꃀꆏꎴꄡꑟꌠꆏꎴꌐ，ꌌꄐꁆꀱ。ꏱꎆꎆꀨꆏꊋꀉꒉꃅꇤꄉꊇꁧꉀꐕꇿꋌꁦꎆ，ꀋꎪꃅꌗꋧꏢꋧꃅꄉ，ꎆ꒜ꌌꀋꌬꀋꉆꅉꇬꌬ。<br><br> ꇖꆏꃅꄷꏱꎆꊋꋠꐨꆣꄯ。ꀊꏀꃅꁦꎆꌠꏱꎆꌫꁏꇔꌠꌋꆀꆅꄙꐋꀋꌡꇩꎝꉬꇮꃅꁆꄻꃅꄷꁵ，ꀋꎪꀋꑴꃅ“ꃘꀧ”ꂿꃆꌋꆀꇗꏸꊨꌬꁌꊰꑠꁁꏯꌬ。ꐋꀋꌡꃅꆹꏮꁵꄻꉺꏦꄻꄉ，ꎆꀨꈛꎂꃅꏃꑤꅉꂫꊐꌠꇬꑟ，ꈛꎂꃅꎆꏂꑘꈲꁧꊌꉹꁌꒇꏣꐥ，ꀋꉬꀋꉆꌠꆏꃅꅍꊌꌠꏦꀧ、ꅉꀨꉹꁌꐥꐨꏦꀧ、ꃷꎏꀨꄜꏦꀧ，ꇗꏸꊨꁌꊰ、ꊤꊰꊨꇔꊰꊨꒊ、ꌬꈧꍔꒉꌠꌋꆀꎆꇱꌠꊋꁈꄏꑠꇫꐊ，ꄉꉻꏱꎆꐊꊈꊋꇨꇱ，ꈍꃅꑌꈛꌬꄌꌬꀋꉆ。<br><br> ꉬꆏꍔꃚꎆꇱꄉꈁꍔꒉ。ꆅꄙꐋꀋꌡꇩꎝꀋꉬꀋꉆꌠꌌꃅꄷꄉꉻꁦꎴꆄꄻꑠꅉꃀꉁꈾꋈꄻꌠꌋꆀꆅꄙꃆꂮꌫꎆꇬꌬ，ꄷꀋꁧꎆꃀꄹꁆꊏꄉꌌꃅꄷꇬꅉꂫꊐꌠꇬꐋꀋꌡꌠꊋꋠꐨꂥꀘꌠꇬꌬ。ꃅꄷꍔꃚꄐꁆꌊꀊꏀꃅꌐꐘꎝꊫꌐ3.75ꃪꂡꂷꁦꎆꌠꇱ，ꀋꉊꄻꈎꄩ1.6ꃪꂡꂷꁦꎆ，ꇿꋌꐥꃅꀋꇎꅉꅋꑣ、ꉹꁌꐥꐨꈲꁵ、ꌬꈧꌠꊥꎆ、ꈏꇓꈉꐨꍔꒉꌠꊋꁈꄏ。<br><br> 2020ꈎꊌꌬꏱꁈꀋꉬꀋꉆꌠꌋꆀꊁꊬꌠꀋꂿꑘꌠꏱꎆꌤꃅ：<br><br> 1.ꈢꇓꀖꀉꒉꌕꐘꌠꃅꋒꌠꇬꊋꁈꄏ。<br><br> ꏟꈯꀕꃅꎭꑆꇔꈢꇓꀖꌠꃅꊋꐛ。ꐪꊛꄉꏱꎆꌢꎭꄏꐓꎆꇱꌠꊋꀉꒉꃅꇱ，ꍏꑷꏱꎆꃅꄷꁥꇱꌠꌐꐘꌢꎭꄏꐓꎆꀨ1461ꂡꂷꄐꁆ，ꐪꊛꄉꉬꈎꋍꈓꋑꀋꋒ200ꂡꂷꁦꎆ，ꄷꀋꁧꂫꏮꎆꀨꉈꑴꋍꃢꃅꐙꌠ300ꂡꂷꁦꎆꌠꇬꈴꄉ，ꀒꁨꋍꁘꃅ“ꌕꐎꌕꍏ”ꑠꌢꎭꅼꇨꃅꄷ、ꁱꄀꄉꍞꏲꃅꄷꌋꆀꇵꆅꐯꇳꐨꁧꏖꐨꊼꇅꀙꃅꄷꏭꉜꄉꎎ。ꌢꎭꊋꋠꑤꂿꑘꃆꂮꎆꀨꋊꍬꐯꇯꀱꌠꊋꀉꒉꃅꇱ，ꅐꑘꌢꎭꄏꐓ、ꃅꅍꊌꌢꎭꄏꐓ、ꌬꈧꌢꎭꄏꐓ、ꂘ꒧ꌢꎭꄏꐓꑠꏱꁈꃅꇫꑟ，ꊋꀥꇱꄉꎞꀉꁁꏀꄉꌢꎭꄏꐓꌠꊁꊛꄉꄏꐓ。ꐪꊛꄉꇙꄟꍞꊟꋏꆸꐽꈉꄻꃪ，ꏱꎆꌢꎭꄏꐓꎆꀨꍞꏲꌠꊋꀥꇱ，ꌢꎭꄏꐓꐘꃆꎆꀨꈴꎁꉬꇮꃅꃅꐨꇿꋌꏲꂠꌠꀉꇨꈴ。ꐪꊛꄉꌢꎭꀎꇓꇔꀐꌠꑤꇬꌢꎭꄏꐓꏱꁈꀋꉬꀋꉆꌠꃄꌬ。ꀱꌢꎭꇁꌠꄴꏮꍞꎖꌠꌋꆀꇇꀨꊋꄏꌠꌤꃅꋒ，ꏟꈯꃅꎭꑆꇔꈢꇓꀖꊌꐨꄻꈫꈈ、ꊛꄉꊼꇅꌢꎭꂥꀘꌠꊋꁈꄏꏱꁈꎥꃪ，ꎭꑆꇔꈢꇓꀖꌠꌋꆀꑣꋂꌄꆣꌠꊜꋽꃅꐯꊛꌠꄹꇙ。<br><br> ꍍꆀꄴꏮꈢꇓꀖꌠꋍꊭꇬꑞꅉꁻꌐꃅꇫꑟꌠꄹꇙ。ꀋꎪꃅꃅꍜꐛꀋꐈ、ꊋꃤꀁꋌꀋꊨꇬꎷ，ꏦꃤꇬꈴ、ꈆꑪ、ꊒꌸꃅꍍꆀꌠꏱꄻꌠꌌꀨꇬꄉ，ꒆꉻꋦꈭꊇꁧꐪꊛꄉꆹꏮꌊꉾꃪꇁꌠꄹꇙ。ꀋꉬꀋꉆꌠꆏꃅꑆꃴꇉꀕ、ꀇꐒꐝꍚꀕ、ꃄꅉꁦꎴꌠꐏꁇꌠꊋꁈꄏ，ꌗꃀ、ꀇꐒ、ꊖꆊꑠꁁꏯꇬꍍꆀꄴꏮꎆꀨꁸꄉ250ꂡꂷ、317ꂡꂷ、40ꂡꂷꄐꁆ。ꐳꃅꇓꈓꀇꐒꒉꋩꍹꅿꌠꏱꄻ、ꈯꄔꁮꐚꇓꈓꏦꎫꍍꒉꋊꄻꊇꁧꉀꐕꊌꐨꉀꎆ、ꍤꏦꌋꆀꉸꉼꒊ꒜ꈳꁕꀧꌋꃅꄻꐛꅉꐛ、ꂿꑘꂿꑘꁡꇤꍍꆀꏱꄻ、ꊵꒀꀉꆹꌠꎊꈬꈻꍯꇤꇧꎭꑠꌤꃅꀋꉬꀋꉆꌠꄹꎆ。ꃹꅼꃅꁧꒉꌩꏪꍯꃅꎿꏜꒆꉻꀧꌋꃅꄻꐛꅉꐛꋉꃆꃅꉚꌠꄹꎆ，ꐪꊛꄉ“ꀊꃴ꒺ꈪ”ꏱꄻꃅꐨꌋꆀꀨꉰꎿꏓꇱꏱꄻꌠꃅ。ꇩꏤꋍꏅꈩꅉꌌꀨꄜꃅꄉꌠꋌꐛꀧꌋꃅꅉꉻꑫꄻꐛꌠꊋꁈꄏ，ꂤꏂꄴꏮꂤꏂꏱꄻꌠꌋꆀꇩꏤꃄꅉꃴꆧꈴꌠꃅꐨꃄꌬ，ꌩꏪꑘꅔꏂꒆꉻꀧꌋꃅꄻꐛꅉꐛꌠꊋꃤꁦꎆꇱ。ꇩꏤꀊꃴꀻꎆꎆꀨꂓꌐꄉꀰꏢꌠꄹꇙ。ꒆꉻꄐꊋꐛꅉꀋꉬꀋꉆꅉꏭꒆꉻꁥꇱꊋꃤꀉꒉꃅꇱ。ꐳꃅꍤꏦ、ꉸꉼꒊ꒜ꈳꁕꇂꃴꎆꒆꉻꁵꊒꉺꏦꋈꄻꌠꄹꎆ。<br><br> ꃶꐚꃅꃨꆰꐨꄴꏮꌠꌤꃅꋒ。ꃅꄷꍔꃚꎝꃆꎃꐚꈴꌠꍞꎖꉺꏦꄻꐛꒆ，ꉉꈌꋍꃱꃅ、ꍞꏲꋍꃱꃅ，ꋋꇅꃅꃨꆰꐨꌋꅜꌋꆀꀞꄻ。ꏓꇱꋍꑞꋍꉹꏡꁈꏁꌬꄉꋭꋽꃅꊭꊎꃷꁨꂁꐥꎝꃆꋊꑣ，ꏦꇨꃅꈰꄻꎝꉛꌠꏢꇋ，ꈍꃅꑌꀁꉘꊭꇬꌤꃆꂥꀘꇈꉮꐴꐥꌠꃅꀋꉆ。ꀉꇨꃅꍞꊟꅑꎹ，ꐥꍂꃅꅑꃤꎹ、ꀱꆽꃅꍤꄻꌠꃅꇫꑟ。ꋭꋽꃅꃅꄷꃨꆰꐨꀊꂥꌠꎆꒉꎆꇁꏲꉻꃨꆰꐨꀞꄻ，ꋍꑞꋍꁁꏯꆽꎍꐨꎵꃪ，ꏦꃤꇬꈴꄉꃨꆰꐨꁮꑋꌠꆹꄜ。ꊋꇤꄉꇩꈐꃨꆰꐨꌋꆀꉇꉻꈏꃹꃅꐙꌠꈔꉆꐨꄅꇱꇙꈧꌠꄴꏮ。ꏟꈯꃅꉻꑫꃅꐙꌠꐔꈔꉆꐨꅐꀋꇁꌠꂫꑟꐏꄉ。<br><br> 2.ꊋꁈꄏꄉꈏꇓꈉꐨꍔꒉꌠꄐꇐꏤꁈꃄꌬ。<br><br> ꌬꈧꀱꉈꑴꌄꆣꌠꊥꎆ。ꈆꑪꃅꇵꆅꐯꇴꐨꄴꏮꋎꍅꌠꇎꏦꇂꃴꄉ，ꋍꑞꋍꉹꃼꇇꃄꅉ、ꃷꎏꐊꑷꃅꀱꃼꇇꃅ、ꐥꐨꁧꃤꃅꑘꐛꀕꃅꀰꏢꌠꊋꁈꄏ。ꈄꏍꇬꄉꌬꈧꌠꑠꃅꑘꐛꄟꀊꏀꌠꀻꎆꌠꊋꊡ，ꀊꃴ、ꋬꂻꌬꈧꌠꍔꒉ。ꊋꀦꀊꏀꐕꍯꄹꌬꏱꎆꁥꇱꏱꁈꃄꌬꏤꈉꁦꎆꃅꆣꄯꌊ2022ꈓꈎꂫꇬꑟ，ꁥꁵꐨꉈꑴꎞꌠꌋꆀꐳꐨꆣꄯ，ꐳꃅꇓꈓꄉꉻꈭꈜꑠꁁꏯꇬꐕꍯꄆꇙꎻ，ꐪꊛꄉꄆꊐꌺꁧ、ꄆꆦꍉꑠꋈꄻꌠꊋꁈꄏ。ꄆꌅꃼꇇ、ꐳꃅꌞꎭꌠꂿꑘꁡꇤꃹꌠꊋꁈꄏ，ꂿꑘꅐꇐꈻꐻꎊꈴꉁꈾꀋꇎꅉꀥꇱ。ꐳꃅꃀꌠꀨꎹꁧꃤꃅꉻꑫꋈꄻ，ꃹꅼꃅꆅꉚꋬꂻꀨꎹꐮꐊꌠꄹꎆ，ꑘꒃꃅꀊꉗꃅꀨꎹꄜꏂꀧꄹꏦꃅꉚꌠꄹꎆ。<br><br> ꏣꀋꑌꃅꇿꋌꐥꃅꎆꇱꌠꍔꒉ。ꍏꑷꏱꎆꆏꆅꄙꐋꀋꌡꇩꎝ10000ꂡꂷꃑꄻ，ꉬꇮꃅꏮꃅꄷꁵꄉꀋꉬꀋꉆꌠꌌꋍꏅꁦꎴꆄꄻꑠꅉꃀꉁꈾꋈꄻꌠꌋꆀꆅꄙꃆꂮꐥꌠꌫꎆꇬꌬꌐ。ꊋꀥꇱꄉꆅꄙꐋꀋꌡꇩꎝꌋꆀꀉꁁꏱꎆꎆꃀꏓꇲꐯꊛ，ꃅꄷꎆꃀꌫꄻꑴꌅꌅꈌꀉꇨꇱ。ꃅꄷꍔꃚꌐꐘꎝꊫꌐꀉꒉꃅꁦꎆ，“ꎆꀨꐘꑘꊂꈹꁧ”ꌠꏥꏦꌭꈬ，ꃅꄷꍔꃚꎝꃆꃨꆰꑟꐨꌋꆀꐘꃆꊭꄎꃆꂮꏓꇲꄉꋭꋽꃅꁷꄻ，ꀋꉬꀋꉆꌠꆏꌌꄈꍏꑷ、ꇩꃷꑼꏤꄻꄉꌠꀋꉬꀋꉆꁁꏯ、ꄐꇐꏤꁈꐘꃆꀉꒉꀊꂾꌠꇬꌬ，ꉹꁌꎆꇱꌠꈺꇙ，ꇿꋌꐥꃅꀋꇎꅉꅋꑣ、ꉹꁌꐥꐨꈲꁵ、ꌬꈧꌠꊥꎆ、ꈏꇓꈉꐨꍔꒉꌠꊋꁈꄏ。ꍏꑷꄐꌗꈐꎆꇱꌠ6000ꂡꂷꄐꁆ，ꀒꄹꈎꄩ224ꂡꂷꁦꎆ。ꍏꑷꏱꎆꆏꍏꇩꇩꏤꎸꈜꉻꏑꏭꎆꃀ500ꂡꂷꇱ，ꎸꈜꋈꄻꎝꃆꊫꄳ500ꂡꂷꃑꄻꄉꌌꎆꀨꃅꌬꌠꊋꁈꄏ，ꎿꋮꈜꀦꐳꈴꎸꈜ、ꇓꈓꇢꊭꎸꈜꌋꆀꒉꋮꐳꈴꎸꈜꐘꃆꋈꄻꌠꊋꀉꒉꃅꇱ。<br><br> 3.ꀀꊿꃅꅍꊌꌠꄉꀧꌠꊋꁈꄏ。<br><br> ꁈꏂꁈꇭꄉꃅꅍꊌꌠꎍꐽꌋꆀꍔꒉ。ꃅꅍꊌꌠꄉꀧꌠꌌꀨꇊꀨꇬꄉ，ꃅꅍꊌꌠꈁꉬꃷꁨꎍꐽ，ꃅꅍꊌꐛꉻꄻꉾꃪ，ꃅꑘꊌꊇꁧꉀꐕ。ꍏꑷꏱꎆꃅꅍꁵꀥꇱꎆꃀ539ꂡꂷꄐꁆ，ꃅꅍꀋꊌꄜꏂꀧꎆꀨꂫꋒꅉꇬꄉꋊꌌꌬꌠ1000ꂡꂷꄩꐂꌠꃅꑘꇮꇐꉀꐕꃅꐨꎆꀨ，ꉈꑴꇮꑘꎆꏂꑘꐛꉻꋊꄻꌐꐘꈁꁠꁵꁥꇱꎆꀨꌬꋒ，ꃅꄷꋍꑞꋍꐘꃅꑘꊌꑘꀺꏱꁈꃅꇫꑟꌠꊥꎆ。ꌶꅉꀊꂥꊐꌠꌶꅐꌠꌶꌺ、ꎞꆏꂽꑼ、ꂿꑘꊿꇮꃅꌠꑠꀋꉬꀋꉆꌠꉹꁌꃅꅍꊌꌤꃅꌠꌌꀨꄉꃅꌠꊋꁈꄏ，ꈭꈜꀉꑌꏢꃅꃅꅍꊌꑘꀺꌠꊥꎆ。ꐪꊛꄉꃅꑘꇮꇐꄐꊋꉀꐕꌠꌋꆀꃅꑘꌶꅉꁦꎆꃅꊙꎹꊇꁧꉀꐕꌠꊋꁈꄏ，ꎼꈎꌋꆀꑎꄻꈎꑍꈓꇬꃅꑘꇮꇐꄐꊋꁱꂘꌠ3500ꃪꑼꃢꈋꉐꐥ、ꀊꂥꊐꌠꃅꑘꌶꅉꌶꌺ200ꃪꑼꁦꎆꃅꊙꎹ。ꀱꂱꑱꃅꄷꄉꑘꀺꌠꂿꑘꇮꃅꊿꆏꏤꐪꇬꈴꄉꌌꋍꃢꃅꐙꌠꑘꀺꁥꇱꈍꈐꇬꇱꄉ。<br><br> ꃅꅍꀋꊌꊿꅉꀨꐥꐨꏦꀧ。ꐪꊛꄉꃅꅍꀋꊌꄜꏂꀧꎆꀨꌬꋒ，ꊋꀥꇱꄉꃅꅍꀋꊌꊿꅉꀨꐥꐨꏦꀧꌠꌋꆀꀱꃅꅍꊌꎻꌠꁧꃤꃅ，ꎼꈎꏤꄻꅐꇁꀐꌠꈎꄜꀉꒉꌠꃅꅍꀋꊌꌠꄜꏂꀧꎆꋊꌬꄡꈉꄯꀊꌠꎴ、ꊨꊭꃅꐙꌠꃅꅍꀋꊌꁥꁵꎆꃄꌬ、ꁌꏤꊼꇅꁥꁵꎕꏦꉀꐕꑠꃅꅍꀋꊌꊿꇇꀨꏁꁈꃄꌬꇫꑟ，ꃅꅍꀋꊌꄜꏂꀧꏦꀧꉱꑷꈍꈐꍔꒉ。<br><br> 4.ꅉꀨꉹꁌꐥꐨꏦꀧꌠꊋꁈꄏ。<br><br> ꐽꊯꇈꊇꁧꐥꌠꂘꑘꀻꎆꌠꇬꊋꁈꄏ。ꂘꑘꌫꎆꌬꈧꐛꉻꄻꃪ，ꊋꀥꇱꄉꌫꎆꃅꐨꇿꋌꏲꂠ，ꀋꉬꀋꉆꌠꆏꋭꑘꂘ꒧ꂘꃀꃄꎆꊌꐨꃅꇫꑟꌠꏦꀧ，ꐪꊛꄉꈯꄔꁮꐚꃅꄷꌢꎭꃅꄷꌷꀞꇎꏦꄻꃪꌠꊋꁈꄏ，ꀋꆏꃅꇓꈓꇓꉈ、ꃄꁕ、ꌶꅉꇢꊭꍣꐨꃛꀄꊭ。ꊋꒉꃅꃅꄷꂘꑘꁁꏯꆹꏮꁵꄻ，ꇓꈓꇓꉈꋭꑘꂘꑘꁥꁵꌫꎆ8.3%ꉀꎆ、ꌷꂾꂘ꒧ꀻꎆꊋꁈꄏꌠꎆꀨ11.8%ꉀꎆ、ꌶꌺꇇꀨꎆꁥꇱꌫꎆ9.6%ꉀꎆ、ꎃꐚꇨꍏꌶꅉꌶꅉꀞꄻꇎꏦꄻꃪꁥꇱꎆ9.2%ꉀꎆ。ꐳꃅꇓꈓꇓꉈꋭꑘꂘ꒧ꋍꃱꃅꀻꎆꌠꄹꎆ，2020ꈎꑋꈌꄮꐰꄯꒉꌷꄮꇬꄑ，ꇩꏤꑭꊂꋭꑘꂘ꒧ꌶꌺꐽꏡꃅꉻꌬꌫꎆꅉꀨꎕꏦꏤꄉꌠꃷꁨꏓꋍꃱꃅꄉ。ꊋꀥꇱꄉꑣꍔꁠꀀꄹꏦꌶꅉ、ꑣꋂꌶꅉꄉꈁꀄꊭꌠꌋꆀꑤꇓꈓꇬꌶꅉꋈꄻ。ꇿꋌꐥꃅꇓꈓꄉꑘꃅꇁꌠꊿꌳꃈꅮꄯꒉꌷꇬꊋꋠꌠꌤꃆꂥꀘ。ꀒꁨꋍꁘꃅꈲꈴꃅꐙꌠꌷꂾꂘ꒧ꅐꀦꇲꁵꌠꁦꎆꇱ，ꐪꊛꄉꌢꎭꅼꇨꃅꄷꏭꉜꄉꎎ。ꐳꃅꇨꍏꊬꌠꂘꑘꁊꈴꈢꇓꀖꌠꄹꎆ，ꃅꑘꂘꑘꊇꁧꉀꐕꉾꆹꌠꊥꎆ，ꐳꃅꒉꌶꅉꋍꉎꀋꐥꌠꌋꆀꌷꉹꋍꉎꀋꐥꌠꋈꄻꌠꊋꁈꄏ，ꈯꄔꁮꐚꃅꄷꒉꌶꅉꀻꎆꌠꇬꊋꁈꄏ，ꌶꅉꄩꏠꌠꈐꐛꊈꐨꐥꃅꀻꎆꑟꐨꊐꐕ。<br><br> ꋬꂻꍏꇩꄐꇐꏤꁈꄹꎆ。ꀋꎪꃅꏓꂱꉹꁌꀑꇬꋬꂻꌠꌋꆀꇭꀧꂄꌠꌭꈬꌠꌌꀨꇬꄉ，ꏟꈯꃅꅉꀕꐛꈴꌠꆅꐨꄴꋏꇖꐨꃅꇫꑟ，ꊋꇤꄉꏱꎆꎆꇱ，ꐪꊛꉆ、ꄽꂫꑞꅉꏦꀧꌠꌌꄞꅐ，ꏓꂱꇭꀧꂄꌠꌋꆀꆅꉁꁦꎴꆄꄻꑟꐨꉀꐕꌠꊥꎆ。ꀀꊿꆅꉁꄜꏂꀧꊾꂷꌠꐽꏡꃅꏱꎆꁥꁵꎕꏦ30ꂷꉀꐕ，ꊾꂷꋍꈓꌠ550ꂷꇬꑟ，ꋍꋓꃅꊿꑴꅉꏮꁌꎕꏦꉀꐕ。ꅉꀨꄉꉻꁦꎴꁧꃤꃅꌫꎆꊾꂷꌠꐽꏡꃅꏱꎆꁥꇱꎕꏦ5ꂷꉀꐕ，ꊾꂷꋍꈓꌠꎆꃀ74ꂷꑟ，ꀊꏀꃅꁦꎆꌠꅉꀨꄉꉻꁦꎴꁧꃤꃅꏱꎆꁥꇱꌫꎆꆏꉬꇮꃅꌌꇓꈓꇓꉈꋥꁕꇬꌬ，ꅉꂫꊐꌠꁦꎴꆄꄻꆄꄵꌠꀉꇨꈴ。ꅉꀨꆅꉁꄜꏂꀧꆅꉚꅉꀀꄉꆅꉁꌫꁌꌞꃅꄷꄉꆅꉁꌠꈛꎂꃅꌗꂫꇽꉺꏦꄻꈫꈈꄻꐛꒆ。ꎍꐽꃅꆅꉁꄜꏂꀧꎆꀨꏓꇲꏠꊐꉀꐕ，ꏟꈯꃅꏃꊐꌠꏓꇲꌠꄹꎆ。ꃹꅼꃅꆅꉁꆄꄻ、ꆅꉁꆄꄻꄜꏂꀧ、ꉃꄻꁬꋌꏓꇙꄉꄺꀱꌠꊋꁈꄏ。ꊱꁨꐥꃅꇩꏤꊥꇬꄉꁬꋌꏓꇱꄉꃻꄻꌠꌋꆀꌫꄻꌠꁬꋌꉹꑫꈍꈐꍔꒉ，ꇩꏤꊥꇬꄉꁌꒉꉃꌬꃸꅐꌬꇐꏓꇱꎳꃼꃅꉚꅉꍔꆙꄉꃅ。ꆅꉁꁦꎴꆄꄻꅐꀦꎆꊐꐛꉻꄻꃪ，ꐪꊛꄉꃹꅼꃅꉻꀞꆅꉚꅉꏓꇱꄺꀱꌠꊋꁈꄏ。ꍏꑳꁬꋌꄖꄑꀻꎆꌠꊥꎆ。ꊋꀥꇱꄉꄉꉻꁦꎴꆄꄻꉻꑫꋈꄻ，ꇵꆅꐯꇳꐨꀉꒉꀊꂾꌠꄴꏮꉃꄻꉻꑫꌋꆀꃛꊸꏭꊝꎊꈬꏦꀧꉻꑫꋈꄻꌠꄹꇙ，ꑘꒃꃅꃄꁕꆅꉁꈯꄜꋈꄻꌠꄹꎆ。ꁦꎴꆄꄻꄚꄿꌧꊿꉗꄻꁱꂘꌤꃅꌠꊋꁈꄏꄉꃅꋒ。<br><br> ꎍꐽꃅꃀꌠꀨꎹꏦꀧꑞꅉꉀꐕ。ꃷꁨ5%ꇬꈴꄉꎞꆏꊿꅉꀨꃀꌠꀨꎹꎆꉀꐕ，ꋍꈭꐨꄉꄐꃅꇓꈓꇓꉈꀀꊿꅉꀨꃀꌠꀨꎹꎆꀁꂥꐯꀁꂥꌠꎕꏦꉀꐕ。ꐊꑷꃅꅉꀨꃀꌠꀨꎹꄜꏂꀧꌜꊐꌠꏓꇲꌠꄹꎆ，2020ꈎꈎꂫꂾꎆꀨꌜꊐꌠꏓꏲꌠꃅꇫꑟ。ꐳꃅꃀꌠꀨꎹꄜꏂꀧꌠꇩꏤꑭꊂꃅꏓꇲꌠꄹꎆ。ꎆꏂꑘꌤꃅꊿꅉꀨꃀꌠꀨꎹꄜꏂꀧꎆꀨꍏꑷꋊꄻꌠꍆꁧꉀꐕꌊ4%ꇬꑟ，ꊋꒉꃅꊋꋠꃅꄷꄏꐓꊋꃤꇱ，ꎞꆏꊿꅉꀨꃀꌠꀨꎹꎆꏤꈉꇬꈴꄉꃷꁨꇎꃅꃑꁵꌠꄉꀧ。ꊋꀥꇱꄉꋥꁕꏭꉜꄉꃀꌠꀨꎹꁧꃤꃅꇲꁵꌠꌋꆀꉁꈾꋈꄻ，ꐪꊛꄉꉃꉘꐮꐊꐙꌠꄹꇙ，ꃀꌠꀨꎹꌤꑘꀻꎆꌠꊋꁈꄏ。<br><br> ꉹꁌꐥꐨꂫꇽꌠꌤꃅꋒ。ꌢꎭꉹꁌꅉꀨꐥꐨꏦꀧꑠꅉꀨꉹꁌꐥꐨꌫꅐꌠꌌꂴꄉꏦꀧꌠꉆꈉꀋꂿꑘꅉꄉ，ꍏꑷꏱꎆꊋꋠꌠꉹꁌꈭꋏꇇꀨꁥꇱꎆ1484ꂡꂷꄐꁆ，ꃅꄷꈧꌠꊋꄏꄉꀁꂥꏦꀧ、ꐋꀋꌡꃅꊋꋠꐨꐥꌠꈭꋏꇇꀨꇲꉘ、ꋍꇅꇬꈭꋏꇇꀨ、ꄂꐺꋚꂟꊿꈭꋏꇇꀨ、ꊾꍸꅉꀨꐥꐨꏦꀧꑠꌤꃅꋒ。ꊾꄣꌤꑘꀻꎆꌠꊋꁈꄏ。ꀁꂥꀧꏦꀧꈍꈐꍔꒉ，ꇓꈓꇓꉈꊋꋠꌠꑱꈐꏭꆏꀧꄡꑟꌠꄾꌦꋩꃅꏦꀧꄉ，ꐳꃅꇎꏦꇬꄉꄐꌠꇓꈓꏦꎫꃅꅍꀋꊌꌋꆀꀱꂱꑱꃅꄷꇁꌠꊿꌌꄉꀁꂥꀧꑠꈭꋏꇇꀨꈍꈐꇬꇱꄉ。ꇇꈤꃅꐧꋦꈭꋏꇇꀨꌋꆀꏦꀧꎕꏦꉈꑴꎊꈬꁌꏤꉀꄓꐯꎏꑌꑲꉺꏦꃄꇬ，ꋍꊭꇬꁌꏤꋍꇅꇬꁥꇱꌠꊋꃤꀉꒉꃅꇱ，ꊋꇤꄉꎊꈬꁌꏤꉀꄓꄉꊋꋠꉹꁌꅉꀨꐥꐨꇬꁧꏖꌠꀁꋌꊨꒊ。ꍏꑷꏱꎆꆅꉁꆄꄻꇇꀨꎆꃀ286ꂡꂷꄐꁆꄉ，ꌌꌢꎭꉹꁌꉃꄻꀵꃤꊨꑾꌙꌠꇬꌬ，ꆅꉁꏦꀧꉱꆏꌠꃅꋒ。<br><br> ꅉꀨꀀꑳꏦꀧꉻꑫꄻꐛꒆ。ꍏꑷꏱꎆꇓꈓꏦꎫꏦꀧꐨꐥꌠꀀꌒꋉꃆꇇꀨꎆꆏ707ꂡꂷꄐꁆ，ꀋꉬꀋꉆꌠꆏꇓꈓꏦꎫꀀꁕꀉꆹꅉꄺꀱꌠꌋꆀꊣꄻꀀꑳꀻꎆꌠꊋꁈꄏ，ꇓꈓꇬꊋꋠꉹꁌꀀꑳꏦꀧꌠꊋꀥꇱ，ꐪꊛꄉꑲꆹꇣꆹꐛꅉꄺꀱꌠꊋꁈꄏ。ꍏꑷꏱꎆꂿꑘꁡꇤꑲꎓꇣꐡꄺꀱꁥꇱꎆꃀ185ꂡꂷꄐꁆ，ꐪꊛꄉꂿꑘꁡꇤꑲꎓꇣꐡꄺꀱꌠꌋꆀꂿꑘꀀꑳꃄꇙꄙꄺꀱꌠꄹꎆ。<br><br> ꊋꀥꇱꄉꄉꉻꁱꀕꁧꃤꃅꉻꑫꋈꄻ。ꍏꑷꃅꄷꄉꉻꁱꀕꁧꃤꃅꉻꑫꋈꄻꁥꁵꎆ152ꂡꂷꄐꁆ，ꅉꀨꄉꉻꁱꀕꁧꃤꃅꌠꉱꑷꐨꌋꆀꌬꉆꐨꉀꐕꌠꊋꁈꄏ，ꅉꀨꄉꉻꁱꀕꁧꃤꃅꐽꏡꈴꌠꊥꎆ。ꏣꀋꑌꃅꇵꆅꐯꇳꐨꇱꎼꁧꏖꌠꁱꀕꅐꑘꄹꁆꀱꀻꎆꌠꇬꇇꀨꄏꐓ。ꍏꉸꉾꃪꋊꃅꐥꌠꁱꀕꊪꊛꀻꎆꋉꃆꄹꎆꌠꊋꁈꄏ。ꀙꏢꃅꋆꉪꒀꉼ、ꃅꋆꊾꄣꉪꒀꉼꀞꄻꌠꊭꄎꌠꌋꆀꇩꏤꄐꉪꒀꊭꄎꌠꎆꊋꏦꀧꌤꃅꌠꃅꋒ。<br><br> 5.ꃷꎏꀨꄜꏦꀧꌠꊋꁈꄏ。<br><br> ꇗꏸꊨꁌꊰꌠꊋꀉꒉꃅꇱ。ꎼꈎꐪꊛꄉ2019ꈎꁌꎆꇗꏸꇗꏸꍆꐪꌋꆀꎆꏂꑘꃀꌠꀨꎹꄜꏂꀧꁌꐨꑠꏱꁈꃄꌬ，ꇗꏸꊨꁌꊰꂥꄓꌠ5000ꂡꂷꀋꇈꑟ。ꂴꊬꌠꏤꎼꇁꌠꊨꊭꐨꐥꃅꇗꏸꊨꒊꌠꏱꁈꄹꁆꆏ，ꐧꐭꎆꏂꑘꃀꌠꀨꎹ、ꃅꅍꀋꊌꌋꆀꇮꃅꂷꊂꌸꄜꏂꀧꌤꃅꅉꏮꁌꀋꎴ，ꄉꈁꀄꊭꌠꇗꏸꏮꊿꁌꎆꇗꏸꊨꇔꇧꎭ，ꄉꉻꈭꈜꎞꎭ、ꋠꇐꅝꒉꀀꅉ、ꈩꆫꈩꀜ、ꁱꀕꈯꎟꑠꁧꃤꃅꁌꎆꇗꏸꀋꎴ，ꃅꈯꇬꌦꂱꉴꀻꎆꎆꀨ、ꎿꀸꋈꄻꁌꊨꏆ，ꃄꌬꏤꈉꆏꉬꇮꃅꁦꎆꅷꎼꈎꈎꂫꇬꑟ。ꀄꊭꐭꌺꎆꏂꑘ、ꑱꄂꇮꃅꃼꇇꑱꁯꈁꊌꇗꏸꄯꌊꑎꄹꈎꏮ。ꏟꈯꃅꇗꏸꊨꁌꊰꏱꁈꃅꌊꑞꅉꑟ，ꄾꌦꋩꃅꎆꏂ꒧ꈜꀕꇈꐧꐭꎆꏂ꒧、ꑱꄜꇮ꒧ꃼꇇꑱꁯꇇꀨꄉꊋꋠꐨꇬꈳꅐ。<br><br> ꎆꏂꑘꒃꅐꀰꏢꀨꊰꊨꒊꌠꄹꇙ。ꎆꃀ、ꅐꑘꏱꁈꌋꆀꐮꐊꄉꊋꅐ，ꇵꆅꐯꇳꐨꇱꁧꏖꊼꇅꀙꌠꉹꑘꎆꏂꑘꏭꊋꁈꄏꌠꀉꇨꈴ，ꊋꁈꄏꄉꎆꏂ꒧ꎆꏓꊋ、ꎆꏓꁌꇨꌤꃆꀞꄻ。ꇩꁨꑳꇤꊤꎆꊨꏆ，ꑘꌋ꒔ꑞ꒔ꉹꌠꊋꊡꄉꑲꊤꁌꊨꏆꅀꄯꎴ。ꍔꃚꃤꃅꐙꌠꎆꏓꄉꀧꉹꑘꁌꈮꁁꊨꄉꎴ，ꏓꇱꎆꏓꄉꀧꁌꍆꐨꀁꋌꊰꌊ1%ꈍꐯꇬꑟ。ꇩꏤꎆꏓꎆꊭꄉꀧꎆꀨ2020ꈎꀊꏀꃅꁦꎆꌠꉈꑴꄉꀧꃅꑘꄉꈁ4000ꂡꂷꇂꃴꀋꊰ。ꇎꏦꇬꊒꌠꑘꀺꄉꀧꎆꉛꏤꈉꍔꐯꉆꎻ，ꀒꁨꋍꁘꃅꉻꁥꊋꁈꄏꌠꁦꎆ、ꃹꉆꇎꏦꊨꒊ，ꇵꆅꐯꇳꐨꇱꎼꁧꏖꌠꑱꄜꇮꃅꃼꇇꑱꁯ、ꊤꑌꍯꇽꊿꑠꌌꊋꁈꄏꈍꈐꇬꇱꄉ。<br><br> ꐪꊛꄉꃷꎏꀨꄜꄓꊋꄖꄑ。ꃹꅼꃅ‘ꄝꏲꃅ’ꄺꀱ，ꃹꅼꃅꋍꏅꑘꀺꋍꉻꏀꀺꌠꄹꎆ，ꐯꅑꈴ、ꌐꑘꈴꌠꄉꉻꁧꃤꃅꐽꈉꋈꄻꌠꊋꁈꄏ，ꇩꏤꊐꌠꀊꏀꃄꁕ、ꇮꇐꀊꂥꀊꏀꃄꁕ、ꋓꀺꌡꀠꅉꁍꈺꇙꂿꄐꋊꇤꋒ。ꑘꀺꎆꇱꀻꎆꌠꇗꏸꎴꈲꁵꏱꁈꊋꊡꌠꃅꇫꑟ。ꐪꊛꄉꀄꊭꐭꌺꎆꏂ꒧ꎆꏓꄉꀧꁌꀁꋌꊨꈁꁠꁵꁥꇱꏱꁈꃄꌬ，ꐥꄜꎆꏣꁁꏯꀄꊭꐭꌺꎆꏂꑘꎆꏓꄉꀧꃅꑘꄉꈁꍔꒉꌠꊋꊡ，ꀄꊭꐭꌺꎆꏂꑘꎆꏓꄉꀧꁌꍆꐨꀁꋌꊨ。ꐪꊛꄉꉹꁌꀰꏢꌠꎆꏂꑘ、ꐧꐭꎆꏂꑘꎝꃆꍤꌗꌠꌤꃅꋒ。<br><br> 6.ꋚꂷꊋꀦꋬꂻꌠꏦꀧ。<br><br> ꊋꈀꑌꃅꇤꄉꋚꂷꑠꂿꑘꅐꇐꀋꂿꑘꌠꇲꃷꌠꏦꀧ。ꋚꂷꊪꏽꃅꊂꌋꆀꅐꐨꄻꑘꒃ，ꇩꏤꋚꂷꋬꂻꏦꀧꄐꊋꉀꐕ，ꋙꋠꍔꌺꏟꈯꀕꃅꄌꊨꏦꇇꈐꊐꄉ。ꋠꃅꀧꌋꃅꌠꌋꆀꋠꃅꈲꒉꋈꄻꌠꀉꇨꈴ，ꎕꏦꀊꂥꌠꋠꃅ8000ꃪꂿꀊꏀꃅꋈꄻꌠꊋꁈꄏ，ꑌꌋꈤꊖꆈꀧꌋꃅꐨꃅꊪꏽꌠ4000ꃪꂿꃄꌬ。ꃹꅼꃅꆖꂷꉀꄓꎖꄎꌠꄹꎆ，ꃹꅼꃅꋚꂷꎴꊎꄹꏦꄺꀱ，ꍯ、ꎭꎳꃼꁌꏤꀄꊭꇊꀄꊭꌠꏱꁈꌋꆀꀀꃆ、ꆖꂷꃷꎏꈴꃅꎳꃼꌠꇬꒃꅐꊿꎆꁥꇱꌠꄻꇱꉺꏦꄻꐛꒆ。ꇩꈐꋚꂷꒉꂷꇲꄻꌠꌋꆀꃷꎏꎍꐽꌠꏦꀧꌠꊋꁈꄏ。ꃮꉘꒃꅐꌠꇇꀨꄉꀱꐛꅉꐛꌠꏱꁈꃄꌬ，ꇩꈐꃮꎸꃷꎏꇲꁵꌠꄻꑘꒃꌋꆀꏦꀧ。ꐪꊛꄉꊋꀥꇱꄉꃏꍏꃮꆅ、ꀉꇨꃅꆅꌸꌠꅐꅑꆅꐨꑠꇙꀕꀉꒉꀊꂾꌠꆄꈻꄴꏮꋎꍅ，ꆫꑘꒉꉘꑘꐊꑷꃅꀻꎆꌠꊥꎆ。<br><br> ꊋꇤꄉꊋꀦꋬꂻꌠꏦꀧ。ꐪꊛꄉꃪꄅꐞꌗ、ꊖꌋꊐꐞꌗꑠꎃꐚꀋꉬꌠꋌꐛꐞꌗꅣꄻꌬꈧꌠꊋꁈꄏ，ꀱꒆꉆꊋꀦꁣꀋꐥꃅꀻꎆꌠꊋꁈꄏ，ꊋꀦꐛꉻꋊꄻꌠꊥꎆ。ꊋꀦꋬꂻꊭꊎꄹꏦꄻꐛꌋꆀꄻꐛꒆ。ꎆꏂꑘꄆꌫꄻꁌꀁꋌꊰ，ꐪꊛꄉꊋꃹꇨꌠꉇꄉꈭꐨꇮꑘꀉꒉꌠꌋꆀꎃꐚꇮꃅꃼꇇꑘꄆꁌ5%ꀁꋌꊰ；ꄏꐓꐨꑍꑵꄹꏦꄆꁌꏤꏱꁈꃄꌬ，ꊋꒉꌠꆏꑍꑵꄹꏦꄆꊋꌬꑱꁯ(ꈉ)ꃷꁨꄆꁌꀵꃤꊨꏆ，ꀊꏀꃅꋉꌠꍔꒉꃅꋉꌠꆅꉁꅉꏭꆏꉘꇉꉆꐨꀊꂥꌠꄆꁌꀋꎴ；ꊨꊭꐨꐥꃅꀀꊿꀋꉬꌠꐞꌗꁌꏤꀁꋌꊰ，ꌬꌠꀁꑌꄮꐰꋌꐛꐞꌗꁌꏤꏱꁈꃄꌬ，ꐈꑭꑠꂿꑘꃆꂮꐥꌠꒃꅐꄷꀋꁧꇵꆅꐯꇳꐨꇱꁧꏖꐨꀉꒉꌠꉹꑘꏭꐞꌗꁌꏤꀊꅰꃅꈲꁵ。<br><br> 7.ꅐꑘꊛꏣꇲꁵꊛꏣꎍꐽꌠꏦꀧꌠꊋꁈꄏ。<br><br> ꄺꂡꑘꊇꁧꀊꂥꃅꀻꎆꌠꊋꁈꄏ。ꐳꃅꅐꑘꊛꏣꇲꁵꊛꏣꀱꐛꅉꐛꌠꌋꆀꎍꐽꌠꄹꇙ。ꊋꊡꄉꉁꈾꏀꆦꌠꌋꆀꇮꇐꄺꀱꌠꇬꎆꇱ，ꋊꃅꐥꌠꄺꂡꑘꄻꃪꊐꐕꌠꄹꇙ，ꄐꇐꀋꉬꀋꉆꁁꏯꋉꃆꈴꈢꇓꀖ、ꀨꎍꅐꑘꊐꐕꁧꃤꃅꐽꈉꋈꄻꌠꊋꁈꄏ。ꇮ꒧ꐯꏑꈄꏍꀻꎆꌠꊋꁈꄏ，ꀑꁮꄺꂡꌠꄹꎆ。ꇮꇐꉁꈾꀉꒉꀊꂾꌠꉘꃀꇶ(ꋬꈭ)ꌠꄜꏂꀧꁵꊒꃅꉚꏱꁈꃅꇫꑟ，ꊋꒉꃅꏀꀺꅐꇐꄹꌬꌠꊥꎆ。ꃷꁨꎆꏣꃅꑘꐛꄟꀊꏀꌠꉘꉚꃅꐨꃄꌬ，ꃷꂷꇲꁵꊛꏣꋈꄻꌠꊋꁈꄏ。ꏓꐛꄆꈜꌋꆀꆓꎊꅐꑘꊇꁧꀊꂥꃅꀻꎆꌠꊋꁈꄏ。ꏀꀺꌋꆀꐮꄉꄐꌠꍔꃚꃻꄻꃼꇇꃅꄹꏦ、ꀨꊰꏲꂠꌋꆀꃨꆰꐨꁸꀵꉺꏦꄻꐛꌋꆀꊋꁈꄏꌠꎥꃪ。ꂴꅑꌠꄺꂡꑘꌋꆀꀋꃋꋋꄮꁧꃤꃅꑘꃹꅼꃅꐮꉔꄉꀻꎆꌠꊥꎆ，ꍏꇩꁧꃤꃅꂓꁦꀊꂥꌠꅐꇐꄺꑣ。<br><br> ꈆꑪꇮꇐꏀꀺꄘꄏꄐꊋꉀꐕ。ꊋꀉꒉꃅꏀꉹꌀꌡꋍꃀꆅꁿꋌ、ꁬꋌꌋꆀꐳꃅꍤꎖꇮꇐꈆꑪꎥꃪꈢꇓꀖꌠꊋꁈꄏꊋꃤꇱ，ꃶꐚꃅꎆꃀꈉꐨꏦꀧ。ꅉꃀꎥꃪ、ꇬꀦꏀꀺꌠꊋꊡꄏꐓꏦꉻꉺꏦꄻꐛꒆ，ꀋꉬꀋꉆꌠꈯꄜꇮꇐꏀꀺꄐꊋꁦꎆꃅꇱ。ꇩꏤꎖꉚꅉꋈꄻꌠꌋꆀꇩꏤꀨꄉꋒꃯꉜꅉꉻꑫꏓꇱꀱꌠꊋꁈꄏ，ꇩꏤꄐꇐꈆꑪꇮꇐꊋꃤꄻꀉꇨ。ꈆꑪꇮꇐꌐꐘꀉꒉꀊꂾꌠꏠꊐꊪꊛꃆꂮꐥꌠꌤꃅꌠꍔꆙ，ꈆꑪꇮꇐꏀꀺ2030—ꐘꃆꀉꒉꀊꂾꌠꐳꃅꃄꌬꌠꄹꇙ。ꇩꏹꈆꑪꇮꇐꇷꃅꌠꃹꅼꈴ。ꊋꀥꇱꄉꌧꇐꅐꌅꀧꌋꃅ。ꐘꃆꀋꉬꀋꉆꌠꂵꅐ“ꃅꐨꄜꊥꃀꌋ”ꌠꃅꌠꊋꁈꄏ。ꈆꑪꎥꃪꌤꃅꊿꄉꅍꈆꑪꇮꇐꊌꐨꈁꁨꌅꈌꅀꀊꉗꃅꌫꄻꌅꈌꄻꇬꁳꉚꅉꄹꎆ，ꈆꑪꎥꃪꏲꉻꌋꆀꌤꃅꊿꏀꀺꄓꊋꃑꄻ。<br><br> ꉇꉻꃼꇇꉇꎆꅉꀨꐛꉻꄻꈫꈈ。ꐪꊛꄉꋯꐂꄆꌅꃼꇇꏓꇱꋒꃯꉜꅉꋈꄻꌠꊋꁈꄏ，ꐳꃅꉇꉻꃼꇇꉀꎆꅉꀊꏀꌠꉘꉚ。ꐳꃅꉰꇂꄿꐨꃼꇇꎿꀸꋈꄻ。ꃅꋮꆹꏮꎆꏣꇷꃅꃅꄷꑠꀋꉬꀋꉆꃅꄷꄉꉻꁧꃤꃅꑟꐨꉀꐕꌠꊋꁈꄏ，ꂴꅑꉁꈾꌋꆀꇮꇐ、ꎸꇺꎸꂷꀋꉬꀋꉆꌠꑠꈏꃹꌠꍔꒉꌠꊋꊡ。ꁧꃤꃅꃼꇇꏀꀺꀻꎆꃅꉚꅉꃹꅼꈴ，ꇩꏹꁧꃤꃅꉇꀧꃅꑘ、ꇮꇐꌋꆀꇮꇐꁧꃤꃅꉇꅐꑠꊪꊛꌠꊋꊡ。ꉇꉻꃼꇇꃅꊿꎆꊐꁧꃤꃅꉻꑫꊥꎆꌠꄻꐛꒆ，ꊱꁨꃅꉇꉻꎆꇱꇷꃅꌠꄐꏁ，ꐯꇯ“ꋍꁕꋍꈜ”ꋈꄻꌠꄹꇙ。<br><br> 8.ꅉꂫꊐꌠꏮꈴꌠꏦꀧꌠꊋꁈꄏ。<br><br> ꍏꑷꏱꎆꌫꁏꇔꀊꏀꃅꁦꎆꌠ、ꋌꃀꃅꈎꂫꏮꎆꃀ、ꋋꊐꌠꌫꎆꍅꊨꌊꇁꌠꏱꎆꊋꃤꑠꈴꈜꇲꈴꏂꈴ，ꃶꐚꃅꃅꄷꎆꊋꄏꐓꌠꊋꃤꁦꎆꇱ，ꃅꄷꊌꎆꉀꎆꐨꆣꄯꄉꇫꐊꇁꌠꏱꎆꌫꅐꍅꊋꆣꄯ。ꍏꑷꃅꄷꏭꆹꏮꁵꄻꌠ12.8%ꉀꎆ，ꄚꈐꏭꎃꐚꃅꐙꌠꆹꏮꁵꄻ(ꐯꇯꏱꎆꌤꑘꌅꈌꆹꏮꁵꄻꌠꄚꀋꐊ)7.5%ꉀꎆ，ꍏꑷꋋꊐꌠꌫꎆꇬꉐꊮꌺ7.7ꂷꁦꎆ，ꀋꉬꀋꉆꌠꆏꇝꂱꀉꆹꃅꄷ、ꊿꋅꃅꄷ、ꃅꋮꆹꏮꃅꄷ、ꌢꎭꃅꄷꌋꆀꇵꆅꐯꇳꐨꇱꁧꏖꐨꊼꇅꀉꒉꃅꐥꌠꃅꄷꏭꉜꄉꎎ，ꃅꄷꀊꅰꃅꌢꎭꃅꄷꎃꐚꃅꏮꈴꌠꊋꁈꄏ。ꎃꐚꃅꐙꌠꆹꏮꁵꄻꅉꇬ，ꐽꏡꃅꐙꌠꆹꏮꁵꄻꌠ17192ꂡꂷꄐꁆ，10%ꉀꎆ；ꑤꊐꌠꅉꀨꎆꊋꏦꀧꉺꏦꈁꁠꁥꁵꎆꀨ2979ꂡꂷꄐꁆ，10%ꉀꎆ；ꇝꂱꀉꆹꀁꑌꊿꋅꃅꋮꆹꏮꌢꎭꃅꄷꆹꏮꁵꄻꌠ2796.1ꂡꂷꄐꁆ，12.4%ꉀꎆ。ꐋꀋꌡꃅꆹꏮꁵꄻꌠ6050ꂡꂷꄐꁆ，ꃅꄷꇬꊋꁈꄏꄉ“ꃘꀧ”ꌠꂿꃆꃅꇫꑟ，ꃄꌬꌠꇬꊨꀋꄅꌠꐊꊈꏭꊝ。ꋍꈭꐨ，ꏣꀋꑌꃅꏱꎆꎆꀨꁷꄻꄟꏀꀺ，ꄾꌦꋩꃅꎆꊋꌌꀁꋌꒉꄉ，ꎆꀨꈛꎂꃅꌌꏃꑤꅉꂫꊐꌠꇬꑟ，ꈛꎂꃅꎆꏂꑘꇬꈲꏓꂱꇬꈲꌠꄉꀧ。<br><br> 9.ꇓꈓꇓꉈꃄꁕꋮꄮꃅꀻꎆꌠꊋꁈꄏ。<br><br> ꊋꀥꇱꄉꄉꉻꁧꃤꃅ。ꇵꆅꐯꇳꐨꄴꏮꋎꍅꌠꌌꊋꋠꅉꃅꄉ，ꊋꀥꇱꄉꂿꑘꁡꇤꊿꀀꋦꈭꏱꄻꌠꌋꆀꋍꏅꁦꎴꆄꄻꉻꑫꋈꄻ，ꈍꃅꋭꅉꈍꃅꃅꄉꂿꑘꁡꇤꅊꁧꒈꅉꄺꀱꌠꄹꎆ，ꂿꑘꁡꇤꐥꐨꑶꌩꀖꑘꌋꆀꍍꒉꂥꀘꌠꀉꇨꈴ，ꎔꃨꌠꑣꋂꋈꄻꊐꐕꌠꄹꇙ。ꏣꀋꑌꃅꂿꑘꁡꇤꅝꒉꋉꃆꄺꂡꀨꎹꄷꀋꁧꌢꎭꃅꄷꏭꉜꄉꎎꌠꊋꁈꄏ，ꒉꑫꐮꈴꌠꌋꆀꂿꑘꁡꇤꒉꑫꏓꇱꄺꂡꃅꉚꌠꃄꇬ。ꐳꃅ“ꇖꑵꂄꂿꑘꁡꇤꈝꃀ”ꑠꂿ꒧ꁡꇤꅉꃀꉁꈾꋈꄻꌠꄹꇙ。ꃹꅼꃅꂿꑘꁡꇤꏓꇱꄺꀱꃅꉚꅉꎖꉚꌠꄹꎆ，ꊋꀥꇱꄉꂿ꒧ꁡꇤꅉꂫꊐꌠꎀꍹꏮꈴꌫꎆꏦꀧ，ꃄꄻꇿꋌꐥꌠꑣꋂꏱꄻꈁꏦꀊꏀꌠꎹꎥ。<br><br> ꂿꑘꊿꐪꊛꄉꊌꐨꁦꎆꌠꊥꎆ。ꇶꏦꀉꑌꑵꃅꄉꋭꋽꃅꀰꏢꀨꄜꏭꊋꁈꄏꊋꃤꇱ，ꊋꀥꇱꄉꄉꈁꀄꊭꌠꊪꉘꑱꁯꏭꁧꃤꃅ。ꃹꅼꃅꂿꑘꁡꇤꋍꑍꌕꅐꑘꃹꅼꃅꐮꉔꄉꀻꎆꌠꄹꎆ，ꐪꊛꄉꐛꏀꂿꑘꅐꑘꃄꅉꋈꄻꌠꌋꆀꂿꑘꅐꑘꀉꇨꍔꋈꄻꌠꊋꁈꄏ，ꂱꎆꅑꐋꀋꌡꌠꅐꑘꁥꏓꋈꄻꌠꃄꇬ，ꂿꑘꀰꏢꅐꐨꉀꐕ。ꂿꑘꊿꈛꑌꃅꑘꀺꃅꅍꊌꌠꊋꁈꄏ，ꂿꑘꊿꃅꑘꇮꇐꄐꊋꁱꂘꄉꈁꍔꒉ，ꀉꇨꃅꀱꂱꑱꃅꄷꇁꌠꂿꑘꇮꃅꊿꑘꀺꄉꀧꎆꉛꌠꌋꆀꁥꇱꌠꏭꊋꁈꄏ。<br><br> ꃹꅼꃅꀊꏀꉹꌠꇓꈓꏦꎫꐛꈴꌠꄹꎆ。ꊋꀉꒉꃅꇤꄉꇓꈓꅉꃀꉁꈾꌋꆀꄉꉻꁧꃤꃅꌠꑟꐨꉀꐕ，ꍔꃚꎆꇱꌠꊋꃤꁦꎆꇱ，ꏣꀋꑌꃅꐧꋦꎆꀨꎆꇱꌠꈻꏁ。ꂿꑘꊻꂷꆹꏮꌊꇓꈓꀀꊿꐛꌠꊋꁈꄏꌠꏱꎆꏱꁈꄻꐛꒆ，ꍏꑷꏱꎆꂿꑘꊿꆹꏮꇓꈓꊿꐛꈁꁠꎆ350ꂡꂷꄐꁆ，ꃅꄷꈜꀕꇈꇓꈓꍔꃚꄐꇺꄉꏣꀋꑌꃅꂿꑘꆹꏮꊻꂷꈻꎷꌌꑱꈿꎻ，ꃶꐚꃅꂿꑘꆹꏮꊻꂷꇓꈓꀀꊿꐛꈴꌠꊇꁧꉀꐕ。ꏱꎆꏦꀧꊋꃤꀉꇨꇱ，ꃅꄷꍔꃚꊋꁈꄏꄉꂿꑘꆹꏮꊻꂷꃅꅍꊌꌠꁧꃤꃅ、ꐧꋦꄜꏂꀧ、ꏦꀧꐨꐥꌠꀀꑳ、ꇫꐊꎞꀀꌳꃈꅮꂘꑘꅉꀨꄉꉻꂿꃆꊇꁧꐕꀊꂥ。<br><br> ꇩꏤꃄꁕꀉꒉꀊꂾꌠꄐꇐꃅꇫꑟꌠꄹꇙ。ꐪꊛꄉꁮꐚꏭꀉꒉꃅꀖꁉꌠꄹꎆꄉꐛꉻꀊꏀꌠꏓꐛ、ꑌꌋꈤꐊꑷꃅꄖꄑ、ꈯꄔꃅꄷꉀꄓ、ꁭꅐꏭꂴꅑꄉꀻꎆ。ꏱꎆꇗꏸꏱꁈꊋꄏꊋꃤꀉꒉꃅꇱ，ꐪꊛꄉꏢꏸꏹꋮꄮꃅꀻꎆ、ꒀꇤꉪꄊꊅꐎꋈꄻ、ꍤꏦꌕꎐꃅꄷꋍꉻꈴꃅꀻꎆꑠꇩꏤꃄꁕꀉꒉꀊꂾꌠꀻꎆꄐꇐꏤꁈꄹꎆꌠꊋꁈꄏ，ꏟꈯꃅꑪꉢꑟꐎꋈꄻꌠꄹꎆ，ꍤꏦꎆꏣꐛꁕꐯꇯꀧꌋꃅꏁꁈꀉꒉꌠꒃꉇꌠꃅꇫꑟ，ꉸꉼꒊ꒜ꈳꁕꒆꉻꀧꌋꃅꌠꌋꆀꊇꁧꀊꂥꃅꀻꎆꌠꄹꇙ，ꍰꒄꃅꄷꑍꇓꈓꎆꏣꈭꑠꋈꄻꌠꄹꇙ。ꅐꀦꈤꌐꌠꇓꈓꉹꏮꀻꎆꌠꊋꁈꄏ。ꇝꂱꀉꆹꃅꄷ、ꊿꋅꃅꄷ、ꃅꋮꃅꄷ、ꌢꎭꃅꄷꐳꃅꀻꎆꌠꊥꎆ。“ꊯꇖꉬ”ꊬꌠꑭꊗ、ꑟꏦꐧꋦꎆꏣꀻꎆꏱꎆꇗꏸꏱꁈꎥꃪꏤꄻ。<br><br> ꋍꈭꐨ，ꃛꀙꌜꎆꏣꐧꋦꀻꎆꌠꊋꁈꄏꌠꋍꑞꋍꐘꏱꎆꇗꏸꏱꁈꃄꌬꋒ，ꊋꇤꄉꃅꑘꊌꌠꏦꀧ、ꉹꁌꐥꐨꏦꀧ、ꏮꈴꏦꀧꌠꌤꃅꋒ，ꐳꃅꃄꀱꄺꀱ、ꃼꇇꃄꀱꌠꌋꆀꅐꑘꊛꏣꇲꁵꌠꎍꐽꃅꒈꇁꌠꄹꇙ，ꃛꀙꌜꎆꏣꐧꋦꐊꑷꃅꀱꐛꅉꐛ、ꏱꎆꎍꐽꃅꏮꈴꌠꊥꎆ。<br><br> 10．ꇩꐏ、ꉇꉻꑌꑲꌤꃅꌠꊋꁈꄏ。<br><br> ꀊꅰꃅꉾꃪꃅꄈꌋꆀꇩꏤꃅꇴꄉꉻꀉꒉꌠꁧꃤꃅꌠꇬꆼꒆꄉ，ꀋꉬꀋꉆꌠꆏꇩꐏꌫꎆꏦꀧ，ꇩꐏꌋꆀꂽꐛꏀꈴꋈꄻꌠꊋꁈꄏ。ꐳꃅꂽꌋꆀꏓꂱꐯꈽꃹꅼꃅꀻꎆꌠꄹꎆ，ꎆꃀꏦꀧꌠꃅꋒ，ꇱꄻꏱꁈꄻꐛꒆ。ꂴꄉꀨꎹꃅꅍꁵꏱꁈꄻꐛꒆ，ꎞꆏꂽꑼꁧꃤꃅꏦꀧꉻꑫꋈꄻꌠꊋꁈꄏ，ꃶꐚꃅꎞꆏꂽꊌꐨꏦꀧꋒ。ꍏꇩꐛꐨꇩꏤꀉꒉꌠꉇꉻꑌꑲꌠꊋꁈꄏ，ꑴꇙꃅꋧꃅꎆꏣꏱꄻꄺꀱꌠꃅꈽ。<br><br> (ꇖ)2020ꈎꎃꐚꄉꉻꄐꌗꊌꎆꄐꌗꌠꌋꆀꌫꎆꄐꁆꌠ。<br><br> 1.ꍏꑷꎃꐚꄉꉻꄐꌗ。<br><br> ꍏꑷꎃꐚꄉꉻꄐꌗꊌꎆ82770ꂡꂷ，2019ꈎꃄꌬꃷꁨꇬ7.3%ꀁꋌꊰ。ꍏꑷꄐꌗꎍꐽꋊꄻꎆꀨꇬꄉ5300ꂡꂷ(ꌗꂫꇽꋊꄻꊬꌠꈐꇬꀊꏀꃅꁥꇱꄉꌠꎆꀨꄹꁆꄚꐊ)ꄀꇱ，ꍏꑷꍔꃚꃤꃅꐙꌠꎆꀨꄐꌗ、ꍏꑷꇩꁨꎆꀨꀰꏢꄐꌗꌠꇬꄉ3580ꂡꂷꄀꇱꇬꆏ，ꊌꎆꈁꉬꃷꁨ91650ꂡꂷ。ꍏꑷꎃꐚꄉꉻꄐꌗꌫꎆ119450ꂡꂷ，9.1%ꉀꎆ。ꊌꌬꈁꉬꃷꁨꐮꊒꇬꆏ，ꍏꑷꏱꎆꌫꁏꇔꌠ27800ꂡꂷ，2019ꈎꄩ9500ꂡꂷꁦꎆ。<br><br> 2020ꈎꍏꑷꎃꐚꄉꉻꄐꌗꌫꎆꁸꌊꍏꑷꋋꊐꌠꌫꎆ、ꃅꄷꏭꆹꏮꁵꄻ、ꍏꑷꊭꄎꎆꃅꄉꄛꑣꅐꇁ。<br><br> (1)ꍏꑷꋋꊐꌠꇬꌫꎆ35035ꂡꂷ，0.2%ꀁꋌꊰ。ꄚꈐꏭ，ꎃꐚꄉꉻꁧꃤꃅꌫꎆ1721.76ꂡꂷ，13.3%ꀁꋌꊰ；ꉇꉻꑌꑲꌫꎆ543.05ꂡꂷ，11.8%ꀁꋌꊰ；ꇩꐏꌫꎆ12680.05ꂡꂷ，6.6%ꉀꎆ；ꄉꉻꋬꂻꌫꎆ1832.72ꂡꂷ，0.7%ꉀꎆ；ꂘ꒧ꌫꎆ1699.09ꂡꂷ，7.5%ꀁꋌꊰ(ꃅꄷꌫꎆꇱꄉꈭꐨ，ꇩꏤꑭꊂꂘꑘꌫꎆ5.4%ꉀꎆ)；ꈆꑪꇮꇐꌫꎆ3196.51ꂡꂷ，9.1%ꀁꋌꊰ(ꃅꄷꌫꎆꄻꇬꇯꄉꈭꐨ，ꇩꏤꑭꊂꈆꑪꇮꇐꌫꎆ3.1%ꉀꎆ)；ꋛꂷꒀꋌꎊꈬꊭꊎꌫꎆ1216.18ꂡꂷ，1%ꉀꎆ；ꎝꃆꇔꊰꎆꁵꌫꎆ5399.43ꂡꂷ，18.2%ꉀꎆ。<br><br> (2)ꃅꄷꏭꆹꏮꁵꄻꌠ83915ꂡꂷ，12.8%ꉀꎆ。ꎃꐚꃅꐙꌠꆹꏮꁵꄻꌠ70107.62ꂡꂷ，4.9%ꉀꎆ，ꄚꈐꏭ，ꐯꇯꏱꎆꌤꌅꆹꏮꁵꄻꌠ32620.01ꂡꂷ，2%ꉀꎆ，ꀋꉬꀋꉆꌠꆏꃅꄷꊋꁈꄏꄉꂘꑘ、ꃀꌠꀨꎹ、ꆅꉁꄜꏂꀧꑠꁁꏯꐯꇯꏱꎆꌤꌅꃆꂮꐥꌠꏱꁈꃅꇫꑟ，ꅉꀨꄉꉻꁧꃤꃅꐽꏡꈴꌠꊥꎆ；ꀉꁁꎃꐚꃅꐙꌠꆹꏮꁵꄻꌠ37487.61ꂡꂷ，7.5%ꉀꎆ，ꍏꑷꋋꊐꌠꌫꎆꉀꎆꐨꇬꉐꊮꌺ7.7ꂷꁦꎆ，ꍏꑷꏱꎆꊋꇤꄉꃅꄷꎆꊋꄏꐓꌠꊋꀉꒉꃅꇱ、ꌢꎭꃅꄷꏱꎆꏦꀧꄐꊋꁦꎆꇱꌠꏱꁈꍝꄎꌠꄛꑣꅐꇁꀐ。ꌐꐘꆹꏮꁵꄻ(ꍏꑷꄐꌗꈐꎆꇱꌠꇫꐊ)7757.38ꂡꂷ，2.5%ꉀꎆ，ꎆꀨꏓꐯꇯꄉꃅꄷꄐꏁꌊꄈꍏꑷ、ꇩꃷꑼꏤꁈꄐꁆꀉꒉꀊꂾꌠꃅꇫꑟ，ꅉꃀꉁꈾꋈꄻ、ꍍꆀꏱꄻ、ꑣꋂꄖꄑꑠꁁꏯꏭꊋꁈꄏ。<br><br> ꋍꈭꐨ，ꍏꑷꃅꄷꏭꆹꏮꁵꄻꌠꇬꀊꏀꃅꁦꎆꄉꐋꀋꌡꃅꆹꏮꁵꄻꌠꄻꄉꀐ，ꌌꋍꃢꃅꐙꌠꎆꊋꄐꁆꌠꃅꄉ，ꌌꃅꄷꄏꐓꄉ“ꃘꀧ”ꂿꃆꃅꇫꑟꌠꇬꌬ，ꀋꉬꀋꉆꌠꆏꌌꅉꀨꉹꁌꐥꐨꏦꀧ、ꅉꂫꊐꌠꏮꈴꌠꄉꀧ、ꄉꉻꁦꎴꆄꄻꉻꑫꋈꄻ、ꇵꆅꀉꒉꀊꂾꌠꄴꋏꈭꋏꉻꑫꋈꄻ、ꃛꊝꎊꈬꏦꀧꉻꑫꋈꄻꌠꌋꆀꊁꈎꁂꌠꇬꐊꊈꊨꀋꄅꌠꏭꊝꌠꑠꇬꌬ。2020ꈎꎆꀨ6050ꂡꂷꄐꁆ，ꃄꌬꄮꇬꆏꄚꂴꉉꌠꌬꍩꇬꈴꄉꌌꑭꋧꈴ。<br><br> (3)ꍏꑷꊭꄎꎆ500ꂡꂷ，2019ꈎꄐꌗꄉꌠꌋꆀꐯꌟ。ꊭꄎꎆꃄꌬꄮꇬꃶꐚꌬꍩꇬꈴꄉꂱꑱꅉꃅꌗꌌꍏꑷꋋꊐꌠꌫꎆꌋꆀꃅꄷꏭꆹꏮꁵꄻꌠꇬꇱ。<br><br> 2.ꃅꄷꎃꐚꄉꉻꄐꌗ。<br><br> ꃅꄷꎃꐚꄉꉻꄐꌗꋋꊐꌠꊌꎆ97500ꂡꂷ，3.5%ꀁꋌꊰ。ꉈꑴꍏꑷꃅꄷꏭꆹꏮꁵꄻꊌꎆ83915ꂡꂷ、ꃅꄷꏱꎆꄀꇱꎆꃀꌋꆀꌗꏮꂫꋒꎆꃀ21100ꂡꂷꌬꈧꌠꇱꄉꇬꆏ，ꊌꎆꈁꉬꃷꁨ202515ꂡꂷ。ꃅꄷꎃꐚꄉꉻꄐꌗꌫꎆ212315ꂡꂷ，4.2%ꉀꎆ。ꃅꄷꏱꎆꌫꁏꇔꌠ9800ꂡꂷ，2019ꈎꄩ500ꂡꂷꁦꎆ，ꃅꄷꍔꃚꎃꐚꎝꊫꌐꃑꄻꌠꇬꈴꄉꅋꑣ。<br><br> 3.ꇩꏤꑭꊂꎃꐚꄉꉻꄐꌗ。<br><br> ꍏꑷꌋꆀꃅꄷꄐꌗꌠꏓꌗꇬ，ꇩꏤꑭꊂꎃꐚꄉꉻꄐꌗꊌꎆ180270ꂡꂷ，5.3%ꀁꋌꊰ。ꄀꇱꎆꃀꌋꆀꌗꏮꂫꋒꌠꌫꄻꌠ29980ꂡꂷꇱꄉꇬ，ꊌꎆꈁꉬꃷꁨ210250ꂡꂷ。ꇩꏤꑭꊂꎃꐚꄉꉻꄐꌗꌫꎆ247850ꂡꂷ(ꍏꑷꊭꄎꎆ500ꂡꂷꐊ)，3.8%ꉀꎆ。37600ꂡꂷꌫꁏꇔ，2019ꈎꄩ10000ꂡꂷꁦꎆ。<br><br> (ꉬ)2020ꈎꍔꃚꃤꃅꐙꌠꎆꀨꄐꌗꊌꎆꄤꎖꌋꆀꌫꎆꄐꁆ。<br><br> ꍏꑷꍔꃚꃤꃅꐙꌠꎆꀨꄐꌗꊌꎆ3611.41ꂡꂷ，10.6%ꀁꋌꊰ。ꉈꑴꂴꈒꌠꌗꏮꊌꎆ180.04ꂡꂷꌋꆀꆅꄙꐋꀋꌡꇩꎝꊌꎆ10000ꂡꂷꄻꇬꇯꇬꆏ，ꊌꎆꈁꉬꃷꁨ13791.45ꂡꂷ。ꍏꑷꍔꃚꃤꃅꐙꌠꎆꀨꄐꌗꌫꎆ10788.95ꂡꂷ，ꄚꈐꏭ，ꋋꊐꌠꌫꎆ2781.32ꂡꂷ，10.7%ꀁꋌꊰ；ꃅꄷꏭꆹꏮꁵꄻꌠ8007.63ꂡꂷ，ꀋꉬꀋꉆꌠꆏꆅꄙꐋꀋꌡꇩꎝꄐꁆꌠꏭꌫꎆꁦꎆꌠꉬ。ꄀꌌꎃꐚꄉꉻꄐꌗꇬꇱꌠ3002.5ꂡꂷ。<br><br> ꃅꄷꍔꃚꃤꃅꐙꌠꎆꀨꄐꌗꋋꊐꌠꊌꎆ77834.64ꂡꂷ，3.3%ꀁꋌꊰ，ꄚꈐꏭ，ꇩꁨꃄꅉꌫꄻꌅꈌꏆꅐꊌꎆ70406.89ꂡꂷ，3%ꀁꋌꊰ。ꍏꑷꍔꃚꃤꃅꐙꌠꎆꀨꄐꌗꌠꃅꄷꏭꆹꏮꁵꄻꊌꎆ8007.63ꂡꂷ、ꃅꄷꍔꃚꌐꐘꎝꃆꊌꎆ37500ꂡꂷꇱꄉꇬꆏ，ꃅꄷꍔꃚꃤꃅꐙꌠꎆꀨꊌꎆꈁꉬꃷꁨꆏ123342.27ꂡꂷꉬ。ꃅꄷꍔꃚꃤꃅꐙꌠꎆꀨꄐꌗꌫꎆ123342.27ꂡꂷ，39.8%ꉀꎆ。<br><br> ꍏꑷꌋꆀꃅꄷꄐꌗꌠꏓꌗꇬ，ꇩꏤꑭꊂꍔꃚꃤꃅꐙꌠꎆꀨꄐꌗꊌꎆ81446.05ꂡꂷ，3.6%ꀁꋌꊰ。ꉈꑴꂴꈒꌠꌗꏮꊌꎆ180.04ꂡꂷ、ꆅꄙꐋꀋꌡꇩꎝꊌꎆ10000ꂡꂷꌋꆀꃅꄷꍔꃚꌐꐘꎝꃆꊌꎆ37500ꂡꂷꄻꇬꇯꇬꆏ，ꇩꏤꑭꊂꍔꃚꃤꃅꐙꌠꎆꀨꊌꎆꈁꉬꃷꁨꆏ129126.09ꂡꂷ。ꇩꏤꑭꊂꍔꃚꃤꃅꐙꌠꎆꀨꄐꌗꌫꎆ126123.59ꂡꂷ，38%ꉀꎆ。ꄀꌌꎃꐚꄉꉻꄐꌗꇬꇱꌠ3002.5ꂡꂷ。<br><br> (ꃘ)2020ꈎꇩꁨꎆꀨꀰꏢꄐꌗꊌꎆꄐꌗꌋꆀꌫꎆꄐꁆ。<br><br> ꍏꑷꇩꁨꎆꀨꀰꏢꄐꌗꊌꎆ1691.65ꂡꂷ，3.4%ꉀꎆ。ꂴꈒꌠꌗꏮꊌꎆ144.06ꂡꂷꇱꄉꇬꆏ，ꊌꎆꈁꉬꃷꁨꆏ1835.71ꂡꂷ。ꍏꑷꇩꁨꎆꀨꀰꏢꄐꌗꌫꎆ1258.21ꂡꂷ，13.5%ꉀꎆ，ꄚꈐꏭ，ꋋꊐꌠꌫꎆ1197.6ꂡꂷ，21.4%ꉀꎆ；ꃅꄷꏭꆹꏮꁵꄻꌠ60.61ꂡꂷ。ꄀꌌꎃꐚꄉꉻꄐꌗꇬꇱꌠ577.5ꂡꂷ，ꄀꇱꍆꁧꀒꁨꋍꁘꃅꉀꐕꌊ35%ꀑꂪꑟ，ꀋꉬꀋꉆꌠꆏꇗꏸꊨꁌꊰꃅꇫꑟꈭꐨꎃꐚꄉꉻꄐꌗꐮꆽꏣꌠꏦꀧꂿꄷꌠꉬ，ꎆꀨꏓꇲꊋꃤꀉꒉꃅꇱꀐ。<br><br> ꃅꄷꇩꁨꎆꀨꀰꏢꄐꌗꋋꊐꌠꊌꎆ1946.61ꂡꂷ，16.3%ꀁꋌꊰ。ꍏꑷꇩꁨꎆꀨꀰꏢꄐꌗꌠꃅꄷꏭꆹꏮꁵꄻꊌꎆ60.61ꂡꂷ、ꀒꄹꈎꌗꏮꊌꎆ202.67ꂡꂷꄻꇬꇯꇬꆏ，ꊌꎆꈁꉬꃷꁨꆏ2209.89ꂡꂷ。ꃅꄷꇩꁨꎆꀨꀰꏢꄐꌗꌫꎆ1417.32ꂡꂷ，9%ꉀꎆ。ꄀꌌꎃꐚꄉꉻꄐꌗꇬꇱꌠ792.57ꂡꂷ。<br><br> ꍏꑷꌋꆀꃅꄷꄐꌗꌠꏓꌗꇬ，ꇩꏤꑭꊂꇩꁨꎆꀨꀰꏢꄐꌗꊌꎆ3638.26ꂡꂷ，8.1%ꀁꋌꊰ。ꀒꄹꈎꌗꏮꊌꎆ346.73ꂡꂷꇱꄉꇬ，ꊌꎆꈁꉬꃷꁨꆏ3984.99ꂡꂷ。ꇩꏤꑭꊂꇩꁨꎆꀨꀰꏢꄐꌗꌫꎆ2614.92ꂡꂷ，14.3%ꉀꎆ。ꄀꌌꎃꐚꄉꉻꄐꌗꇬꇱꌠ1370.07ꂡꂷ。<br><br> (ꏃ)2020ꈎꐧꋦꄜꏂꀧꎆꀨꄐꌗꊌꎆꄐꎖꌋꆀꌫꎆꄐꁆ。<br><br> ꍏꑷꐧꋦꄜꏂꀧꎆꀨꊌꎆ1384.44ꂡꂷ，101%ꉀꎆ，ꀋꉬꀋꉆꌠꆏꍏꑷꌤꏲꅉꌤꑘꌤꃅꅉꏓꋧꄉꂴꄹꈎꃀꌠꀨꎹꄜꏂꀧꁌꏮ，ꄚꈐꏭ，ꄜꏂꀧꁌꊌꎆ741.61ꂡꂷ，ꏱꎆꁥꇱꊌꎆ630.92ꂡꂷ。ꃅꄷꏮꉎꁵꌠꅉꀨꃀꌠꀨꎹꄜꏂꀧꍏꑷꋊꄻꎆꃀꊌꎆ7379.55ꂡꂷꄻꇬꇯꇬꆏ，ꊌꎆꈁꉬꃷꁨꆏ8763.99ꂡꂷ。ꍏꑷꐧꋦꄜꏂꀧꎆꀨꌫꎆ1407.82ꂡꂷ，112.3%ꉀꎆ。ꄐꁆꃅꄷꁵꌠꅉꀨꃀꌠꀨꎹꄜꏂꀧꍏꑷꋊꄻꎆꃀꌫꎆ7370.05ꂡꂷꇱꄉꇬꆏ，ꌫꎆꈁꉬꃷꁨꆏ8777.87ꂡꂷ。ꋋꈓꊌꌬꀋꇎꐨ13.88ꂡꂷ，ꈎꂫꊛꊭꊎꂫꋒꌠ344.87ꂡꂷ。<br><br> ꃅꄷꐧꋦꄜꏂꀧꎆꀨꊌꎆ75902.94ꂡꂷ，5.3%ꀁꋌꊰ，ꄚꈐꏭ，ꄜꏂꀧꁌꊌꎆ51676.28ꂡꂷ，ꏱꎆꁥꇱꊌꎆ20998.04ꂡꂷ。ꅉꀨꃀꌠꀨꎹꄜꏂꀧꍏꑷꋊꄻꎆꃀꊌꎆ7370.05ꂡꂷꇱꄉꇬ，ꊌꎆꈁꉬꃷꁨꆏ83272.99ꂡꂷ。ꃅꄷꐧꋦꄜꏂꀧꎆꀨꌫꎆ80876.29ꂡꂷ，8.8%ꉀꎆ。ꅉꀨꃀꌠꀨꎹꄜꏂꀧꍏꑷꋊꄻꎆꃀꌫꎆ7379.55ꂡꂷꇱꄉꇬ，ꌫꎆꈁꉬꃷꁨꆏ88255.84ꂡꂷ。ꋋꈓꊌꌬꀋꇎꐨ4982.85ꂡꂷ，ꈎꂫꊛꊭꊎꂫꋒꎆ88685.37ꂡꂷ。<br><br> ꍏꑷꌋꆀꃅꄷꄐꌗꌠꏓꌗꇬ，ꇩꏤꑭꊂꐧꋦꄜꏂꀧꎆꀨꊌꎆ77287.38ꂡꂷ，4.4%ꀁꋌꊰ，ꄚꈐꏭ，ꄜꏂꀧꁌꊌꎆ52417.89ꂡꂷꑟ，ꏱꎆꁥꇱꊌꎆ21628.96ꂡꂷꑟ。ꇩꏤꑭꊂꐧꋦꄜꏂꀧꎆꀨꌫꎆ82284.11ꂡꂷ，9.7%ꉀꎆ。ꋋꈓꊌꌬꀋꇎꐨ4996.73ꂡꂷ，ꈎꂫꊛꊭꊎꂫꋒꎆ89030.24ꂡꂷ。ꉉꀽꄻꅐꌠꆏ，ꇩꏤꑭꊂꐧꋦꄜꏂꀧꎆꀨꄐꌗꌠꆏꏤꄻꅐꇁꀐꌠꏱꁈꇬꈴꄉꁰꄻ，ꋍꇅꇬꀋꃋꌌꎥꃪꑭꋧꃅꄉꌠꋍꊭꐨꐥꃅꐧꐭꎆꏂꑘꃀꌠꀨꎹ、ꃅꅍꀋꊌꌋꆀꇮꃅꂷꊂꌸꄜꏂꀧꌤꃅꅉꏮꎴꌠꑠꏱꁈꄚꀋꐊ。<br><br> 2020ꈎ，ꍏꑷꏱꎆꇩꎝꋒꐨꑞꅉꃷꁨ213008.35ꂡꂷ；ꃅꄷꍔꃚꎃꐚꎝꃆꋒꐨꑞꅉꃷꁨ142889.22ꂡꂷ、ꌐꐘꎝꃆꋒꐨꑞꅉꃷꁨ145185.08ꂡꂷ。<br><br> ꉉꀽꄻꅐꌠꆏ，ꃅꄷꄐꌗꌠꆏꃅꄷꈁꐥꊐꌠꏓꂱꍔꃚꁰꄻꄉ，ꄜꌊꋋꊐꌠꏓꂱꁧꎁ꒜ꀉꒉꈿꅉꁳꈌꁧꎻ，ꀋꃋꇬꊎꏓꐯꇯꇰꑴꌦ，ꄜꅇꋌꋐꇬꃅꄷꊌꎆꄐꌗꃷꁨꌋꆀꌫꎆꁆꄻꃷꁨꆏꐯꇯꍏꑷꏱꎆꀑꐱꃅꏓꇱꃷꁨꉬ。<br><br> ꄐꌗꑭꋧꃅꄐꁆꌠꌋꆀꄚꃆꂮꐥꌠꉉꀽꌠꆏꑭꋧꃅ《ꍏꉸꏓꂱꇭꉼꇩ2019ꈎꇩꏤꑭꊂꄐꌗꃄꌬꐛꐨ2020ꈎꇩꏤꑭꊂꄐꌗ(ꄐꄉꌠ)》ꇬꉜ。<br><br> ꄐꌗꏦꃤꏤꐪꇬꈴꄉ，ꄐꌗꃅꈎꃄꇬꈭꐨ，ꇩꏤꑭꊂꏓꂱꁧꎁ꒜ꀉꒉꈿꅉꄐꌗꄐꄉꌠꋋꏢꈌꁧꂾ，ꄚꐰꌫꎆꋋꈨꄐꁆꉆ：ꂴꈒꌠꂫꏮꌫꎆ；ꀒꄹꈎꈁꉬꋋꊭꇬꄐꌗꌫꎆꃷꁨꇬꉜꄉꀋꎪꃅꁵꌠꋋꈓꇬꌤꃅꅉꅉꀨꌫꎆ、ꐘꃆꌫꎆꄐꁆ，ꉈꑴꐰꊐꌠꍔꃚꆹꏮꉹꌠꌫꎆ；ꏦꃤꏤꄻꄉꇬꀋꎪꃅꎆꁵꋭꑘꍬꄻꅐꌠꌫꎆ，ꉈꑴꌌꋌꐛꉮꌸꑠꋋꇅꃅꇫꅐꇁꌠꌤꆿꀞꄻꌠꇬꌬꌠꌫꎆ。ꄚꂴꉉꌠꏤꐪꇬꈴꄉ，2020ꈎ1—4ꆪꇬ，ꇩꏤꑭꊂꎃꐚꄉꉻꄐꌗꌫꎆ73595.89ꂡꂷ，ꐯꌟꉜꇬ2071.32ꂡꂷꀁꋌꒊ，2.7%ꀁꋌꊰ。ꄚꈐꏭ，ꍏꑷꎃꐚꄉꉻꄐꌗꋋꊐꌠꌫꎆ10314.55ꂡꂷ，ꐯꌟꉜꇬ0.1%ꉀꎆ，ꇩꐏ、ꎝꃆꇔꊰꁵꄻꌫꎆꇤꇧꎭꈭꐨꌌꐯꌟꉜꇬ9.3%ꀁꋌꊰ；ꃅꄷꎃꐚꄉꉻꄐꌗꌫꎆ63281.34ꂡꂷ，ꌌꐯꌟꉜꇬ3.2%ꀁꋌꊰ。ꃅꄷꏱꎆꌫꎆꀁꋌꊰ，ꀋꉬꀋꉆꌠꆏꇵꆅꐯꇳꐨꇱꁧꏖ，ꇵꆅꐯꇳꐨꄴꏮꋎꍅꌋꆀ“ꌕꀧ”ꌫꎆꉇꄉꈭꐨ，ꐘꃆꌫꎆꄹꁆꐳꐨꆹꂴꄹꈎꌠꋋꊭꇬꀋꏣ。ꇩꏤꑭꊂꏓꂱꁧꎁ꒜ꀉꒉꈿꅉꄐꌗꌠꈌꁧꊂꆏ，ꈌꁧꄉꌠꄐꌗꇬꈴꄉꃄꌬꂯ。<br><br> <b><center>ꌕ、ꏟꈯꃅ2020ꈎꏱꎆꄺꀱꌠꌋꆀꄐꌗꏲꂠꌠꌤꃅꋒ</center></b><br><br> (ꋍ)ꎔꎗꃅꄐꌗꏦꃤꃄꌬ。<br><br> ꐊꑷꃅꄐꌗꏦꃤꇖꐨꃅꇫꑟ，ꀒꁨꋍꁘꃅꄐꌗꏢꑲꌠꄻꀉꇨ，ꍔꃚꎴꌬꃅꐨꋊꍬ。ꃹꅼꃅꄐꌗꏲꂠꄹꏦꄺꀱ，ꀈꈥꅉꃀꄐꌗꉪꉻꌫꄻ，ꌬꐨꄃꐛꈴꌠꐛꐪꅥꁖ，ꄐꌗꁰꄻꌠꈆꑪꃅꐙꐨꌋꆀꎃꊒꐨꉀꐕ。ꏦꃤꇬꈴꏤꐪꇬꈴꄉꏱꎆꊌꐨꊥꇬ，ꏦꇨꃅꋋꊐꌠꏓꄊꈌꁧꄉꌠꄐꌗꃄꌬ，ꏦꇨꃅꄐꌗꋊꄻꁦꎆꇱꌠꋎꍅ。ꐲꃬꃅꄐꌗꎆꃀꃑꀁꋌꎭ。ꄐꌗꃄꌬꇘꄟꍞꊟꋎꍅꌠꄻꀉꇨ，ꏱꎆꌢꎭꄏꐓꎆꀨ、ꇩꏤꎆꊐꅉꏓꇱꁵꄻꎆꃀ、ꃅꉚꌤꃅꅉꃶꐚꃅꐥꌠꎆꃀꑠꎆꀨꍞꊟꋏꆸꉺꏦꄻꐛꒆ。ꃶꐚꃅꊋꀥꇱꄉꄐꌗꃄꌬꌠꌋꆀꏱꎆꎆꀨꋬꂻꏲꂠ。ꊋꀉꒉꃅꇤꄉꏱꎆꊭꊎꎆꀨꌬꈧ，ꏤꐪꇬꈴꄉꇇꈤꃅꀊꉗꃅꉱꑘꎆꀨꎴꌊꀱꇁꄉ，ꌌꀉꁁꎆꀨꄏꐓꈇꁆꏯꇬꌬ。ꏦꇨꃅꄐꌗꂫꇽꄇꄜꋊꌠꏤꐪꃄꌬ，ꄐꌗꌗꂫꇽꌠꄇꄜꋊꐛꏦꈴ、ꎃꐚꈴ、ꄹꏦꈴꌠꄹꇙ，ꏱꎆꂿꈴꐨꉀꐕ，ꑴꇙꃅꋍꑞꋍꁆꏯꁳꍞꊟꎻ。<br><br> (ꑍ)ꃶꐚꃅ“ꌕꀧ”ꂫꑟꐏꈬ。<br><br> ꅉꂫꊐꌠꍔꃚꑌꐚꃅꄉꅍꍬꌬꌠꌋꆀꋍꑞꋍꐘꏱꁈꇿꋌꐥꃅꃄꌬꌠꏦꀧꂿꄷꄉ，ꍏꑷꏱꎆꆏꃅꄷꎆꊋꄏꐓꌠꁦꎆꇱꈭꐨ，ꃅꄷꏱꎆꏮꈴꌠꊂꈹꄉꎥꃪꌠꊋꀥꇱ，ꋍꃱꃅꁆꄻꌋꆀꍞꏲꌠꀉꇨꈴ，ꃅꄷꄐꇺꍞꊥꌤꃅꂾꍤꄻ、ꌤꃅꇬꍞꋏ、ꌤꃅꊂꀞꄻꌠ“ꌕꀧ”ꄐꌗꏲꂠꌤꃅꉺꏦꃅꋒꎻ，ꊭꊎꎆꃀꁆꄻꐨꄻꀉꇨ，“ꍏꑷꇬꄉꌜꇬꑟꌠ、ꌜꇬꄉꏃꑤꇬꑟ”ꌠꍞꊟꋎꍅꉺꏦꄻꐛꒆ。ꌜꊐꌠꏱꎆꆏꃶꐚꃅꀨꄜꆽꎍꐨꆹꄜꄉ，ꊋꒉꃅꑤꊐꌠ“ꌕꀧ”ꌠꇬꎆꇱ，ꑤꈁꐥꌠ“ꌕꀧ”ꄐꌗꌠꏭꀊꏀꃅꍤꄻꌠꎵꄻꀱ，“ꌕꀧ”ꄐꌗꃷꁨꇎꃅꄐꁆꌠꄉꀧ，ꑖꑟꃅꅉꂫꊐꌠ“ꌕꀧ”ꃄꌬꐛꐨꊂꈹ，ꃨꆰꐥꃅꄷꏭꉜꄉꏛꃅꊜꄻꄐꉻꏤꄻ。ꑤꊐꌠꏱꎆꆏꐊꑷꃅꏦꀧꆽꎍꐨꃅꇫꑟ，ꀋꎪꃅ“ꌕꀧ”ꌫꎆꏱꎆꌫꅐꌠꇬꊱꁨꐨꌭꈬꇬꎷ，ꇩꏤꎕꏦ“ꌕꀧ”ꌫꎆ“ꌕꀧ”ꌫꎆꇬꂴꊁꊱꁨꐨꌭꈬꇬꎷ，ꄐꌗꄐꁆꌠꌋꆀꊭꎆꁆꄻꌠꃅꋒ，“ꌕꀧ”ꌤꃆꅐꇁꌠꄴꏮ。<br><br> (ꌕ)ꃅꄷꍔꃚꎝꃆꊫꄳꎆꀨꏲꋒꌬꋒ。<br><br> ꌜꊐꌠꏱꎆꌤꏲꅉꆏꃶꐚꃅꃅꄷꍔꃚꎝꃆꊫꌐꏦꏤꏲꂠꃅꎁꍬꌬꋒ，ꀉꇨꃅꏲꂠ、ꂿꄐꋊꇤ、ꂫꑟꌭꈬ。ꏣꀋꑌꃅꌐꐘꎝꃆꊫꌐꌌꎆꏣꐧꋦꀻꎆꌠꊥꎆꂿꄐꋊꇤ，ꏲꂠꉺꏦꄻꐛꒆ，ꀋꉬꀋꉆꁁꏯꏓꌵ，ꂴꅑꄉꎆꇱꐛꉻꄻꃪ，ꄉꄐꃅꌐꐘꎝꊫꌐꉀꐕꌠꌌꇎꏦꇬꑟꌠꐘꃆꀉꒉꀊꂾꎆꀨꍆꁧꃅꄉ，ꐧꋦꎆꀨꀉꒉꃅꎆꇱꌠꈺꇙ。ꊋꀥꇱꄉꌤꃅꅉꐮꈴꋮꄮꐮꐊ，ꐳꃅꎝꃆꊫꌐꃑꌬ，ꐘꑘꀉꒉꀊꂾꁥꋈꄻꌠꄹꇙ，ꏛꃅꐥꇐꌤꃅꃷꁨꏓꐛ。ꏦꇨꃅꌐꐘꎝꃆꊫꌐꐘꃆꏤꍬꐨꍤꌗꌋꆀꃨꆰꐨꋎꍅꄉ，ꌐꐘꎝꊫꌐꆹꀋꎪꃅꌌꊌꐨꈨꐥꌠꐘꃆꀉꒉꀊꂾꌠꇬꌬ，ꎆꏓꄉꈁꆏꐘꃆꈲꊌꌠꌋꆀꐮꆽꏣꌠꄉꀧ。ꃅꄷꍔꃚꎝꊫꌐꏦꃤꇬꈴꄉꌌꉻꈲꐨꐥꌠꎆꀨꌫꅐꌠꇬꀉꄂꌬꉆ，ꌌꅉꀕꃅꌬꌠꇬꌬꀋꉆ，ꎝꃆꊫꄳꎆꀨꌌꃄꎆ、ꌤꃅꅉꏮꌬꌫꁌ、ꃀꌠꀨꎹꎆꑠꃑꁵꌠꏢꑲ。ꏦꇨꃅꃅꄷꍔꃚꎝꊫꌐꏤꈉꑟꇬꁵꊒꌠꃅꎁꃄꌬ，ꃅꄷꍔꃚꎝꊫꌐꃨꆰꐨꑞꑌꇫꅐꀋꇁꌠꄉꀧ。<br><br> (ꇖ)ꐳꃅꏱꎆꇗꏸꏦꉻꄺꀱ。<br><br> ꇩꏤꏱꄻꉻꑫꌋꆀꏱꄻꄐꊋꐛꏀꈴꌠꄹꎆꌠꇬꆼꒆꄉ，ꐪꊛꄉꃹꅼꃅꏱꎆꇗꏸꏦꉻꄺꀱ。ꏟꈯꃅꍏꑷꌋꆀꃅꄷꎆꏲꌅꈌꌋꆀꌬꐨꃅꎁꁷꄻꄺꀱꌠꄹꎆ，ꄉꈁꀊꅰꃅꀉꒉꌠꇗꏸꊨꁌꊰꈭꐨꍏꑷꌋꆀꃅꄷꊌꐨꁷꄻꄺꀱꄹꎆꄐꉻꃄꌬꑞꅉꑟ，ꌅꈌꃅꎁꊨꄅ、ꎆꊋꋮꄮ、ꃄꁕꐮꆽꏣꌠꍔꃚꇢꊭꇬꏱꎆꐮꃆꂮꄻꐛꌠꄹꇙ。ꀒꁨꋍꁘꃅꆹꏮꁵꄻꐘꃆꄐꄻꌠꄻꃪꈴ，ꆹꏮꁵꄻꏲꂠꌠꋊꍬꐨ、ꈆꑪꐨꌋꆀꇿꋌꐥꐨꉀꐕ。ꎕꏦꈆꑪ、ꋊꍬꂿꉆ、ꏢꑲꊋꑌꌠꄐꌗꄹꏦꄻꐛꒆ，ꄐꌗꌫꎆꎕꏦꉻꑫꄻꐛꒆ，ꌫꎆꎕꏦꌫꄻꉺꏦꄻꐛꒆ。ꐊꑷꃅꍔꃚꎆꐪꆿꂷꅇꄜꁰꄻꌤꃅꌠꍔꆙ。ꎍꐽꃅꃅꄷꇗꏸꉻꑫꄺꀱꐛꒆꌠꄹꎆ，ꇗꏸꁌꐮꃆꂮꎵꃪ，ꃅꄷꏱꎆꁳꊌꐨꇁꀦꎍꐽꌠꀊꅰꀉꑌꃅꐥꎻ。ꇗꏸꎴꏦꏤꏥꏦꇖꐨꃅꇫꑟ，ꐳꃅꁌꎆꇗꏸ、ꌬꈧꇗꏸ、ꈜꀸꇗꏸꑠꇗꏸꑫꉹꏦꃤꏤꄻꌤꃅꌠꄹꇙ。ꀋꆏꃅꉪꇩꏤꎆꏣꀻꎆꐨꌋꆀꐮꄉꄐꌠꈜꀸꇗꏸꄹꏦꄻꐛꒆ。ꃹꅼꃅꇩꁨꎆꀨꇩꁨꎆꏂꑘꄺꀱ，ꎆꀨꏲꌠꌌꀨꇬꄉꌠꇩꁨꁨꇐꍞꏲꏦꉻꄻꐛꒆꌠꄹꇙ。ꏟꈯꃅꇩꁨꎆꀨꏓꋧꋍꃱꃅꏲꂠꌠꄹꎆ，ꋍꁘꋍꁘꃅꎆꒉꎆꇁꇩꁨꎆꀨꀰꏢꄐꌗꌠꃅꋒ。ꀑꐱꃅꇩꁨꎆꀨꄹꁆꆹꏮꌊꐧꋦꄜꏂꀧꎆꀨꇬꇱꌠꌤꃅꌐ。<br><br> (ꉬ)ꐊꑷꃅꄐꌗꃅꐨꇿꋌꏲꂠ。<br><br> ꐳꃅꈁꉬꁁꏯ、ꈁꉬꈴꎁ、ꉱꑷꈴꌠꄐꌗꃅꐨꇿꋌꏲꂠꉻꑫꏓꄻ，ꄐꌗꏲꂠꑟꐨꌋꆀꏱꁈꃄꌬꇿꋌꉀꐕ。ꌅꈌꃅꎁꐮꆌ、ꊋꊡꌗꊡꌠꄐꌗꃅꐨꇿꋌꏲꂠꉺꏦꄻꐛꒆ，ꃅꐨꇿꋌꏲꂠꄹꏦ、ꃅꐨꇿꋌꌐꁧꌋꆀꎕꏦꉻꑫꄻꐛꒆ，ꀨꊰꈲꁧꎥꃪꃄꄻꌠꎥꃪꄉ，ꄐꌗꁰꄻꄻꃪꌠꎁꃅꁢꊧꇲꁵ。ꌤꏲꅉꉻꄜꌫꎆꃅꐨꇿꋌꏲꂠꌠꎹꎥ，ꀊꏀꃅꄻꅐꇁꌠꏱꁈ、ꌫꎆꐘꃆꀉꒉꀊꂾꌠꌌꌤꃅꂾꃅꐨꇿꋌꄤꎖꌠꃅ，ꊋꀥꇱꄉꃅꐨꇿꋌꁻꌐꍤꄻ，ꃅꐨꇿꋌꁻꌐꏢꑲꊋꃤꉀꐕ，ꃅꐨꇿꋌꃄꌬꍞꏲꌠꃅꋒ。ꏟꈯꃅꀋꉬꀋꉆꌠꃅꐨꇿꋌꉉꍣꌠꌤꃅ，ꃅꐨꇿꋌꉉꍣꌠꌌꊇꁧꍔꐯꌠꄹꇙ，ꉉꍣꊇꁧꌋꆀꉌꒊꉆꐨꉀꐕ。ꀉꇨꃅꄽꂫꐛꐨꌬꈧ，ꈋꍣꐛꐨꌋꆀꄐꌗꋊꄻ、ꏲꂠꄻꃪ、ꏱꁈꊛꇺꉺꏦꏓꊛꌠꄻꐛꒆ，ꎆꌬꇬꆏꇿꋌꐥ，ꇿꋌꀋꐥꇬꆏꅑꎹ，ꇿꋌꀁꑌꌠꆏꀉꑌꃅꍅꊨ，ꇿꋌꐥꌠꆏꀉꑌꃅꄐꁆ。ꊋꀉꒉꃅꃅꐨꇿꋌꈴꌗꄇꄜꋊꌠꄹꇙ，ꏣꀋꑌꃅꌕꁁꏯꌠꏲꉻꄐꏁꌋꆀꋊꍬꄉꃅꐨꇿꋌꉉꍣꌠꇬꐊꈽ。<br><br> (ꃘ)ꑴꐚꃅꏓꄊꏦꃤꇬꈴꄉꄐꌗꍤꄻꍞꊟꌠꅇꃅ。<br><br> ꃹꅼꃅ《ꏓꄊꄐꌗꍤꄻꍞꊟꌠꀋꉬꀋꉆꌠꌫꎆꄐꌗꌋꆀꏱꁈꏭꉜꄉꍔꐯꌠꃆꂮꄐꇺꉜꐨ》ꌋꆀꇩꏤꑭꊂꏓꄊꄚꃆꂮꐥꌠꇖꐨꃅꈴꌬꈴ，ꑴꐚꃅꄐꌗꌗꂫꇽꌠꍤꄻꍞꊟ。ꎔꎗꃅꏓꄊꁧꎁꌋꆀꐧꋦꋍꑞꋍꁆꏯꉜꐨꇖꐨꅱꄻ，ꏟꈯꀕꃅꄈꍏꑷ、ꇩꃷꑼꀉꒉꀊꂾꃅꏤꇽꄐꇺꌠꃄꌬꇫꑟꌠꇬꆼꒆꄉ，ꄐꌗꅇꄜꌋꆀꄐꄉꌠꁰꄻꌤꃅꌠꄻꃪ，ꌫꎆꄐꌗꌋꆀꏱꁈꈆꑪꐨꐥꌠꇿꋌꐥꐨꉀꐕ。ꎔꎗꃅꏓꄊꌋꆀꋍꎮꊈꉼꄚꃆꂮꐥꌠꄐꌗꏤꐪꌋꆀꌗꂫꇽꏤꐪꃄꌬꇫꑟ。ꏣꀋꑌꃅꄐꌗꈄꏍꏓꇱꍞꊟꄹꎆꈽ。ꇩꁨꁨꇐꏲꂠꃆꂮꏓꇱꅇꄜꌠꌋꆀꄚꃆꂮꐥꌠꌐꐘꅇꄜꌠꌤꃅꋒ。ꏣꀋꑌꑴꇙꃅꏓꄊꁧꎁꉈꇬꌠꏭꅇꏮ，ꉉꀽꉉꄻꌤꃅꋒ，ꀊꅰꉾꃪꃅꏓꄊꁧꎁꏦꃤꈴꄉꃅꎁꃅꌠꁧꃤꃅ。<br><br> ꁧꎁꊈ：<br><br> ꀋꃋꋋꇅꇬꌋꆀꋌꊂꋍꊭꇬ，ꉪꇩꏤꀻꎆꌠꂾꎍꌠꊋꋠꐨꆹꋌꃀꑠꐥꀋꋻ，2020ꈎꏱꎆꄐꌗꌤꃅꂿꃆꊋꋠꀉꇖ。ꉪꊇꆏꀊꅰꃅꑖꑟꃅꋯꑌꌊꐋꀨꑮꏣꀻꈯꄜꃅꄉꌠꄈꍏꑷꈭꇍꄉ，ꀋꎪꃅꑮꏣꀻꃅꋊꀊꏀꋎꌠꍏꇩꐛꐨꐧꋦꉪꏦꉪꇐꌌꄐꇺꅍꃅꄉ，ꑴꐚꃅꇩꏤꑭꊂꏓꄊꁳꍞꊟꎻ，ꎔꎗꃅꇩꏤꑭꊂꍔꑠꉜꐨꌋꆀꇖꐨꅱꄻ，ꂅꈿꏿꄉꃅ、ꃶꐚꃅꒃꉇꀋꎪꃅꃅ，ꉌꋧꊋꏓ、ꈢꇓꀖꊋꋠꌠꆼꑣ，ꃅꋊꀊꏀꋎꌠꏱꎆꄺꀱꀻꎆꌤꃅꌠꇬꄉꐛꐨꀊꏀꃅꐨꀊꏀꌠꊌꅜ，“ꋍꉐꈎꑍꂷ”ꉈꈽꑞꅉꁻꌐꃅꇫꑟ、ꍏꉸꊿꋅꇰꀋ꒜ꃅꀱꌄꆣꇁꌠꍏꇩꉪꐨꃅꇫꑟꌠꎁꃅꊋꃤꅐꌞ。<br><br> （ꑝꉸꎹꀙꏢ5ꆪ30ꑍꈨꇁꇬ）</span></div> <div class="wb_4"></div> <div class="one_2 wb_8"> </div> </div> <div class="one_right"> <div class="one_3">ꁰꒌ</div> <div class="one_4"> <ul><li><img src="/mediafile/201405/15/F2014051517285081467301002.jpg" width="210" height="140" border="0"><br /></li> <li><img src="/mediafile/201405/15/F2014051515351905667300997.jpg" width="210" height="140" border="0"><br /></li> <li><img src="/mediafile/201405/15/F2014051515354231367300999.jpg" width="210" height="140" border="0"><br /></li> <li><img src="/mediafile/201405/15/F2014051515353066667300998.jpg" width="210" height="140" border="0"><br /></li> <span style="font-size:14px; font-weight:bold; line-height:100%;">特别鸣谢<br>中国民族语文翻译局彝文翻译室<span><li><img src="/mediafile/201405/15/F2014051515393518167301000.jpg" width="210" height="140" border="0"><br /></li> </ul> </div> </div> </div> <div class="line"><img src="/img/2009yiyu/images/line1.gif" alt="" /></div> <!--copyright--> <div id="copyright"> ꅏꄻꌅꈌꆹꏓꂱꃤꈄꏍꃤ,ꄯꒉꈴꄉꌅꈌꀋꁵꌠꌬꀋꉆ </div> <script src="/css/2010tianrun/webdig_test.js" language="javascript" type="text/javascript"></script> </body> </html> <img src="http://counter.people.cn:8000/e.gif?id=15813777;0" width=0 height=0 style="display:none;">